​​ព្រំដែន​កម្ពុជា​-​ថៃ: អ្នកកាសែត​មកពី​ប្រទេស ឡាវ មី​យ៉ាន់​ម៉ា កម្ពុជា វៀតណាម និង​ថៃ​ជា​ម្ចាស់ផ្ទះ សរុប​ចំនួន​ ៦០ ​នាក់ បាន​ជួបជុំគ្នា​ដើម្បី​ផ្លាស់ប្តូរ​បទពិសោធន៍ ទំនាក់ទំនង​សហប្រតិបត្តិការ​លើវិស័យ​ព័ត៌មាន ក្នុងអនុតំបន់ ប្រារព្ធ​ធ្វើឡើង​រយៈពេល​ ២ ​ថ្ងៃ នៅ​ខេត្ត​សុ​រិន្ទ ព្រះរាជាណាចក្រ​ថៃ ក្រោម​កិច្ច​ឧបត្ថម្ភ​រៀបចំ​ដោយសហគមន៍​អ្នកកាសែត ភូមិភាគ​ប្រទេស​ថៃ ។​

​    ​លោក ធៀង វណ្ណា ដា​រ៉ុង ទីប្រឹក្សា​រដ្ឋបាល​កម្ពុជា និង​អតីត​អនុ​រដ្ឋលេខា​ក្រសួង​ព័ត៌មាន បាន​ដឹកនាំ​ប្រតិភូ​អ្នកសារព័ត៌មាន​កម្ពុជា ចំនួន​ ៣៩​ នាក់ ដើម្បី​សហប្រតិបត្តិការលើ​វិស័យ​ព័ត៌មាន អង្គភាព​សារព័ត៌មាន មកពី​បណ្តា​ប្រទេស​ក្នុង​អនុតំបន់ រួមមាន​អ្នកសារព័ត៌មាន​មកពី ប្រទេស​ឡាវ មី​យ៉ាន់​ម៉ា ថៃឡង់ កម្ពុជា បាន​ជួបជុំគ្នា​ផ្លាស់ប្តូរ​បទពិសោធ​ម៍ គ្នា​ទៅវិញទៅមក ដើម្បី​ធ្វើឲ្យ​ប្រសើរឡើង​នូវ​ទំនាក់ទំនង​ល្អ រវាង​អ្នក​ប្រកប​វិជ្ជាជីវៈ​សារ​ព័ត៌​មាន នៅតាម​បណ្តា​ព្រំដែន ប្រទេសជិតខាង​នេះ ។​

​    ​លោក សេក សុខុម អនុប្រធាន​មន្ទីរ​ព័ត៌មាន​ខេត្តបន្ទាយមានជ័យ​ ជា​អ្នកឆ្លើយឆ្លង​ព័ត៌មាន​ឲ្យ​អ្នកកាសែត ទូរទស្សន៍ ពី​តំបន់​ភាគ​ពាយ​ព្យ នៃ​ប្រទេស​កម្ពុជាបានឲ្យដឹងថា ជា​ញឹកញាប់​សហគម​អ្នកកាសែត​ថៃ ដែល​មាន​លោក ប្រាសិទ​សែង រុងរឿង នាយក​សមាគម បាន​រៀបចំ​កិច្ចប្រជុំ​សំរាប់​អ្នកសារព័ត៌មាន នៅ​ប្រទេស​ជិតខាង សំដៅ​ពង្រឹង​កិច្ចសហប្រតិបត្តិការ ផ្លាស់ប្តូរ​គំនិត​ច្នៃប្រឌិត ឲ្យ​អ្នក​ប្រកប​វិជ្ជាជីវៈ​សារព័ត៌មាន យក​អាជីព​អ្នក​ផ្សព្វផ្សាយ អ្នកសរសេរ​អត្ថបទ​ព័ត៌មាន ប្រកបដោយ​តម្លាភាព ធ្វើឲ្យ​ទំនាក់ទំនង​រវាង​ប្រទេសជិតខាង កម្ពុជា ថៃ ឡាវ វៀតណាម មី​យ៉ាន់​ម៉ា ល្អប្រសើរ​ឡើង ៕