ភ្នំពេញ: ​ដោយ​ដឹងថា​រដ្ឋាភិបាល​ខ្លួន​អាច​នឹង​បរាជ័យ​យ៉ាង​អាម៉ាស ក្នុង​កិច្ចប្រជុំ​គណៈកម្មាធិការ​បេតិកភណ្ឌ  ពិភពលោក នៅ​ប្រទេសប្រេ​ស៊ីល​នោះ ថៃ​បាន​បង្វែ​សភាពការណ៍​មក​តាម​តំបន់​ព្រំដែន​វិញ ។

​    ​លោក ផានី​ថា​ន វ៉ា​តា​ណា​យ៉ាក​ន អ្នកនាំពាក្យ​រង​នៃ​រដ្ឋាភិបាល​លោក អាប់​ភី​ស៊ីត បាន​និយាយប្រាប់ ទូរ​ស្សន៍​ប៉ុស្តិ៍​លេខ​៣​ថៃ​ថា​ ៖ ថៃ​និង​លើក​កងទ័ព​ទន្ទ្រាន​ចូល​ទឹកដី​កម្ពុជា​ទំហំ​៤,៦​គីឡូម៉ែត្រ ស្ថិតនៅ​ក្បែរ ប្រាសាទ​ព្រះវិហារ ។​

​    ​លោក ទិត សុធា អ្នកនាំពាក្យ​អង្គភាព​ពត៌មាន និង​ប្រតិកម្ម​រហ័ស នៃ​ទីស្តីការគណៈរដ្ឋមន្ត្រី បាន​មាន ប្រសាសន៍​បញ្ជាក់​ថា​ ៖ លោក​ពុំ​ទាន់​បានទទួល​ព័ត៌មាន​ច្បាស់លាស់​នៅឡើយ​ទេ តែបើ​មាន​ការប្រកាស បែប​នេះ​មែន​នោះ វា​ជា​ចេតនា​បង្កហេតុ បង្កើតឡើង​ដោយ​ភាគី​ថៃ ក្នុង​គោលបំណង​ទន្ទ្រាន​ចូល​កម្ពុជា ។​    ​

​    ​លោក ទិត សុធា បាន​មានប្រសាសន៍​បន្ត​ទៀត​ថា​ ៖ បើ​មាន​ការរំលោភបំពាន​ដោយ​កងទ័ព​ពី​សំណាក់ ប្រទេស​ថៃ​ចូល​ទន្ទ្រាន​ទឹកដី​កម្ពុជា គឺ​កម្ពុជា​និង​ប្រើប្រាស់​សិទ្ធិ​ស្វ័យ​ការពារ​។ លោក​បាន​បញ្ជាក់ទៀតថា គ្មាន​ទេ​ផ្ទៃដី​៤,៦​គីឡូម៉ែត្រ​, វា​ត្រូវ​បាន​បង្កើតឡើង​ដោយ​ភាគី​ថៃ​ដែល​ជា​ផែនទី​ចោរ នៅ​ក្នុង​មហិច្ឆតា​ចង់បាន ទឹកដី​របស់​កម្ពុជា ។​

​    ​លោក ទិត សុធា បាន​ពន្យល់​ទៀត​ថា កម្ពុជា​និង​ថៃ​មាន​ព្រំប្រទល់​ច្បាស់លាស់​ផ្អែក​តាម​ផែនទី​ដង រែក ដែល​ទទួលស្គាល់​ដោយ​តុលាការ​យុត្តិធម៌​អន្តរជាតិ​ទី​ក្រុងឡាអេ ។​

​    ​សម្តេច​តេជោ ហ៊ុន សែន ធ្លាប់​បាន​មានប្រសាសន៍ ប្តេជ្ញា​ការពារ​ព្រំដែន​បូរណភាព​ទឹកដី​កម្ពុជា មិនឱ្យ​មាន​ការបាត់បង់​សូម្បី​តែ​១​មី​លី​ម៉ែត្រ ហើយ​កងទ័ព​កម្ពុជា​ក៏​មិន​ទៅ​ឈ្លានពាន​ថៃ​ដែរ ៕