បាត់ដំបង: កីឡាករ​អុំទូក​ជាង ២២ នាក់ ដែល​ជាប់​ចំណាត់ថ្នាក់​អន្តរជាតិ​កន្លងមក បាន​ចុះ​ហ្វឹកហាត់​សម​ដៃ នៅ​ក្នុង​ដងស្ទឹង​សង្កែ ខេត្ត​បាត់ដំបង ដើម្បី​ចេញ​ទៅ​ប្រកួត​ជា​មិត្តភាព​ថ្នាក់​អន្តរជាតិ នៅ​ប្រទេស​ឥណ្ឌូណេស៊ី នៅ​ថ្ងៃ​ទី​២៨ ខែកក្កដា ឆ្នាំ​២០១០ ខាងមុខនេះ ។​

​    ​លោក រស់ រ៉េ​ន រដ្ឋលេខាធិការ​ក្រសួង​ទេសចរណ៍​បាន​មានប្រសាសន៍​ប្រាប់ឲ្យដឹង​ថា ការប្រកួតប្រណាំង​អុំទូក​តាម​បែប​បច្ចេកទេស​ជា​មិត្តភាព ខ្នាត​អន្តរជាតិ​នេះ គឺ​បាន​ធ្វើ​នៅ​កម្ពុជា​យើង​ម្ដង​កាលពី​ឆ្នាំ​២០០៦-២០០៧ គឺ​អុំ​នៅមុខ​វាំង​រាជធានី​ភ្នំពេញ ។ ពេលនេះ​បាន​មក​ធ្វើ​នៅ​ខេត្ត​បាត់ដំបង ដើម្បី​ឲ្យ​កីឡា​ករទាំង ២២ នាក់​នេះ បាន​អុំ​ហ្វឹកហាត់​សម​ដៃ​ចាប់ពី​ថ្ងៃ​ទី​១៥ ដល់​ថ្ងៃ​ទី​២៧ ខែកក្កដា ២០១០ ។ កីឡា​ករទាំង ២២ នាក់ ដែល​កំពុង​ហ្វឹកហាត់​នោះ​អុំទូក​ពីរ​ប្រភេទ គឺ​ទូក​ចំណុះ ២២ នាក់ និង​ទូក​ចំណុះ ១២ នាក់ ដែល​ជា​ទូក​ខ្នាត​អន្តរជាតិ ។ លោក​បាន​បន្តថា ការប្រកួត​កីឡារ​អន្តរជាតិ​នេះ មាន​រយៈពេល ២ ឆ្នាំ​ម្ដង គឺ​បាន​ធ្វើ​ចំនួន ៤ លើក​រួច​ហើយ នៅ​កម្ពុជា​នៅ​ឆ្នាំ​២០០៧ ហើយ​ធ្វើ​នៅ​ប្រទេស​ថៃ ប្រទេស​ចិន និង​នៅ​ប្រទេស​ម៉ាឡេស៊ី ។ នៅ​ឆ្នាំ​២០១០ នេះ​គឺ​ធ្វើ​នៅ​ប្រទេស​ឥណ្ឌូណេស៊ី ។ លោក​បាន​បញ្ជាក់ថា កីឡាករ​កម្ពុជា​យើង គឺ​នៅ​មាន​មោទនភាព​ដណ្ដើម​ចំណាត់​ថ្នាក់​ដដែល​នៅ​ឆ្នាំ​២០១០ នេះ ។​

​    ​លោក​បានឲ្យដឹងថា ការប្រកួត​កីឡា​នេះ គឺ​មាន​គណកម្មាការ​កីឡា​អូរ​ឡាំ​ពិ​ក​ជា​អ្នកដឹកនាំ ប៉ុន្តែ​ការ​ការអញ្ជើញ​របស់​គណៈ​កម្មា​ការកីឡា​អូឡាំពិក គឺ​បាន​អញ្ជើញ​ក្រសួងទេសចរណ៍​ចូលរួម​សហការ ដែល​មាន​លោក ថោង ខុន រដ្ឋមន្ត្រី​ក្រសួង​ទេសចរណ៍​បាន​សម្រេច​ជ្រើសរើស​យក​ទូក​ខេត្តបាត់ដំបង ប្រមូលផ្ដុំ​អ្នកអុំទូក​ដែល​ជាប់​ចំណាត់ថ្នាក់​អន្តរជាតិ ស្រាប់​បានមក​ហ្វឹកហាត់​អុំទូក​នាពេលនេះ ៕