ខេត្តស្វាយរៀង ៖ លោកស្រី ហៅ ច័ន្ទសិរីទេពី ចៅ ភិរុណ អនុប្រធានគណៈកម្មាធិការសាខាកាកបាទក្រហមកម្ពុជាខេត្តស្វាយរៀង តំណាង លោក ម៉ែន វិបុល ប្រធានគណៈកម្មាធិការសាខា នៅព្រឹកថ្ងៃទី ១៩ ខែធ្នូ ឆ្នាំ ២០១៨ បានអញ្ជើញជាអធិបតីនៅក្នុងពិធីអបអរសាទរទិវាអន្តរជាតិនៃអ្នកស្ម័គ្រចិត្ត ៥ ធ្នូ ២០១៨ ក្រោមប្រធានបទ ៖ អ្នកស្ម័គ្រចិត្តដើម្បីសហគមន៍យើង ។
ពិធីនេះបានប្រព្រឹត្តទៅនាទីស្នាក់ការសាខាកាកបាទក្រហមកម្ពុជាខេត្តស្វាយរៀងព្រមទាំងមានការអញ្ជើញចូលរួមផងដែរពីសំណាក់ លោក លោកស្រី ជាសមាជិក សមាជិកាគណៈកម្មាធិការសាខា ក្រុមប្រតិបត្តិសាខា គណៈកម្មាធិការអនុសាខាក្រុង ស្រុកទាំង ៥ ទីប្រឹក្សាយុវជន យុវជនកាកបាទក្រហម និងអ្នកស្ម័គ្រចិត្ត សរុបចំនួន ៩៣ នាក់ ។
លោក សរ វណ្ណា នាយក សាខាបានធ្វើមានប្រសាសន៍ឱ្យដឹងថា ៖ សាខាមានអ្នកស្ម័គ្រចិត្តដែលបានជ្រើសរើស និងអនុវត្តតាមគម្រោងនីមួយៗមានចំនួនសរុប ៤០២ នាក់ ក្រោយធ្វើបច្ចុប្បន្នភាពនៅឆ្នាំ ២០១៦ នៅសល់ ៣៤៣ នាក់ ដោយមូលហេតុដោយវ័យចំណាស់ ចំណាកស្រុក និងលាឈប់ ដោយសារគ្មានគម្រោងអនុវត្តបន្ត ។ រីឯអ្នកស្ម័គ្រចិត្តដែលមកចូលរួម និងទទួលប័ណ្ណសរសើនាថ្ងៃនេះបាននឹងកំពុងអនុវត្តគម្រោងមាននៅបន្ត និងអ្នកស្ម័គ្រចិត្តខ្លះ ឃើញថាបានចូលរួមសកម្មជួយការងារនៅពេលគ្រោះមហន្តរាយកើតឡើង ។
មានប្រសាសន៍សំណេះសំណាលនាឱកាសនោះ លោកស្រី ហៅ ច័ន្ទសិរីទេពី ចៅ ភិរុណ អនុប្រធានគណៈកម្មាធិការសាខា បានពាំនាំប្រសាសន៍របស់សម្តេចកិត្តិព្រឹទ្ធ បណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលផ្តាំផ្ញើសួរសុខទុក្ខ ថ្លែងអំណរគុណ និង កោតសរសើរយ៉ាងជ្រាលជ្រៅចំពោះអ្នកស្ម័គ្រចិត្តទាំងអស់ ដែលបានបរិច្ចាគធនធាន ពេលវេលា កម្លាំងកាយ ចិត្ត ចូលរួមចំណែកជួយដល់ជនរងគ្រោះ និងជនងាយរងគ្រោះនៅក្នុងសហគមន៍ ។
លោកស្រី បានគូសបញ្ជាក់បន្ថែមថា ទិវាអន្តរជាតិនៃអ្នកស្ម័គ្រចិត្ត គឺជាការលើកកម្ពស់ការចូលរួមដោយស្ម័គ្រចិត្តក្នុងការងារមនុស្សធម៌របស់ចលនាកាកបាទក្រហម អឌ្ឍចន្ទក្រហម ដែលមានអាយុកាល ១៥៥ ឆ្នាំ មកហើយ ។ ទិវានេះ បានផ្តោតលើគុណតម្លៃនៃការងារស្ម័គ្រចិត្ត ដែលជាឆ្អឹងខ្នងរបស់ចលនាកាកបាទក្រហម អឌ្ឍចន្ទក្រហម និងជាកម្លាំងប្រតិបត្តិករមនុស្សធម៌ប្រកបដោយប្រសិទ្ធភាព និងទាន់ពេលវេលា ។ ជាក់ស្តែង កាកបាទក្រហមកម្ពុជា បានពង្រឹង និងពង្រីកកម្លាំងអ្នកស្ម័គ្រចិត្តបានរហូតដល់ជាង ៤ ម៉ឺននាក់នៅទូទាំងប្រទេស ដែលសុទ្ធតែជាកម្លាំងមិនអាចខ្វះបាន ក្នុងការផ្តល់ក្តីសង្ឃឹម និងភាពកក់ក្តៅដល់ជនរងគ្រោះបំផុតបានទាន់ពេលវេលា និងគ្រប់ទីកន្លែង ។ ក្នុងពិធីនោះ សាខាបានឧបត្ថម្ភដល់អ្នកស្មគ្រ័ចិត្ត ៥៥ នាក់ ក្នុងម្នាក់ មុងសុវត្ថិភាព ១ អាវយឺត ១ ថវិកា ៤០,០០០ រៀល ក្នុងនោះថវិកាលោកជំទាវអនុប្រធានគណៈកម្មាធិការសាខា ២០,០០០ រៀល យុវជនកាកបាទក្រហមកម្ពុជា ១១ នាក់ ក្នុង ម្នាក់អាវយឺត ១ ថវិកា ២០,០០០ រៀល ក្នុងនោះថវិកាលោកជំទាវអនុប្រធានគណៈកម្មាធិការសាខា ១០,០០០ រៀលផងដែរ ៕ ដោយ ៖ វ៉ៃគោ
