បន្ទាយមានជ័យ ៖ ឃុំទួលពង្រ ស្រុកម៉ាឡៃ មាននៅសល់ផ្ទៃដីចំការមីន ជាង២០០ទីតាំង ដែលមានទំហំជាង២.៥០០ហិចតា មានអត្រាគ្រោះថ្នាក់ ក្លាយជាជនពិការជាង៥០០នាក់។ លោកនាយឧត្តមសេនីយ៍ មាស សុភា បានស្នើដល់បងប្អូនប្រជាពលរដ្ឋ ដែលរស់នៅក្នុងឃុំទួលពង្រ ត្រូវមានការប្រុងប្រយ័ត្ន ។
ថ្ងៃសុក្រ ទី១១ ខែមករា ឆ្នាំ២០១៩ លោកហេង រតនា អគ្គនាយកស៊ីម៉ាក់ និងថ្នាក់ដឹកនាំស៊ីម៉ាក់ បានទទួលស្វាគមន៍ ដំណើរទស្សនកិច្ចរបស់លោកនាយឧត្តមសេនីយ៍ មាស សុភា ទេសរដ្ឋមន្ត្រីទទួលបន្ទុកកិច្ចការមីន គ្រាប់យុទ្ធភណ្ឌមិនទាន់ផ្ទុះ និងការងារវិស្វកម្មកងយោធពលខេមរភូមិន្ទ ដែលស្ថិតនៅភូមិខ្លាងាប់ ឃុំទួលពង្រ ស្រុកម៉ាឡៃ ខេត្តបន្ទាយមានជ័យ។
ក្នុងឱកាសនេះ លោកនាយឧត្តមសេនីយ៍ទេសរដ្ឋមន្ត្រី បានកោតសរសើរដល់កម្លាំងបោសសំអាតមីនរបស់ស៊ីម៉ាក់ ដែលបានលះបង់អាយុជីវិត និងសេចក្តីសុខផ្ទាល់ខ្លួន នៅក្នុងកិច្ចការបោសសំអាតមីន ដើម្បីរំដោះផ្ទៃដី ដែលរងផលប៉ះពាល់ដោយសារគ្រាប់មីននិងសំណល់ជាតិផ្ទុះពីសង្គ្រាម ដើម្បីបុព្វហេតុជាតិ។
ឆ្លៀតក្នុងឱកាសនេះដែរ លោកនាយឧត្តមសេនីយ៍ទេសរដ្ឋមន្ត្រី បានជួបសំណេះសំណាល ជាមួយបងប្អូនជនពិការ ដោយសារគ្រាន់មីនឬយុទ្ធភណ្ឌមិនទាន់ផ្ទុះ។ ក្នុងពិធីសំណេះសំណាលនេះដែរ លោកនាយឧត្តមសេនីយ៍ទេសរដ្ឋមន្ត្រី បានថ្លែងអំណរគុណដល់អង្គការ JMAS ដែលបានគាំទ្រផ្នែកហិរញ្ញវត្ថុ និងគាំទ្រដល់ស៊ីម៉ាក់ ដើម្បីរំដោះផ្ទៃដែលរងផលប៉ះពាល់ ដោយសារគ្រាប់មីន និងយុទ្ធភណ្ឌមិនទាន់ផ្ទុះ ដែលស្ថិតនៅតំបន់ភូមិសាស្ត្រស្រុកម៉ាឡៃនេះ។
សូមបញ្ជាក់ថា ឃុំទួលពង្រនេះ មាននៅសល់ផ្ទៃដីចំការមីន ជាង២០០ទីតាំង ដែលមានទំហំជាង២.៥០០ហិចតា មានអត្រាគ្រោះថ្នាក់ ក្លាយជាជនពិការជាង៥០០នាក់ ឃុំពង្រនេះ នៅតែជាឃុំមានបញ្ហាមីនធ្ងន់ធ្ងរជាងគេ៕ ដោយ ៖ រចនា
