ព្រំដែនកម្ពុជា-ថៃ ៖ នៅរសៀលថ្ងៃទី១៣ខែធ្នូឆ្នាំ២០១៧ មេយោធភូមិភាគទី៥ កម្ពុជានិងកងទ័ពភូមិភាគទី១ ថៃជួបឆ្លាស់វេនប្រចាំឆ្នាំនៅលើស្ពានមិត្តភាពកម្ពុជា ថៃ នៃច្រកទ្វារអន្តរជាតិប៉ោយប៉ែត នៃខេត្តបន្ទាយមានជ័យ-ខ្លងលឹក នៃខេត្តស្រះកែវ។
គណ: ប្រតិភូយោធភូមិភាគទី៥ មាន១៣នាក់ ដឹកនាំដោយលោកឧត្តមសេនីយ៍ឯក ប៊ុន សេង មេបញ្ជការរងកងទ័ពជើងគោក និងជាមេបញ្ជាការយោធភូមិភាគទី៥ និងប្រតិភូកងទ័ពភូមិភាគទី១ ចំនួន១៣នាក់ ដឹកនាំដោយលោកឧត្តមសេនីយ៍ទោ គូគាត ស្រ៊ីណាកា មេបញ្ជាការកងទ័ពភូមិភាគទី១ និងជាមេបញ្ជាការមជ្ឈមណ្ឌលប្រតិបត្តិការកងទ័ពទី១ ។
ភាគីទាំង២ បានដើរប្រទេសរបស់ខ្លួនមកជួបគ្នាលើស្ពាន ថតរូបរូមគ្នា និងសំណេះសំណាលសួរសុខទុក្ខគ្នា ជូនពរគ្នានៅក្នុងជំនួបឆ្លាស់វេនប្រចាំឆ្នាំនេះ។
តមក ភាគីទាំងពីរ ទៅជួបពិភាក្សាគ្នានៅបន្ទប់ប្រជុំនៃកងអនុសេនាធីតខ្មោ ប្រចាំច្រកព្រំដែនអន្តរជាតិខ្លងលឹក ដោយ២ភាគី មានចំនួន៦នាក់។
ភាគីទាំងពីរអះអាងពីការគោរពបទបញ្ជាមេបញ្ជាការថ្នាក់លើតាមឋានានុក្រម គោរពគោលនយោបាយនៃរាជរដ្ឋាភិបាលរៀងៗខ្លួន និងបំពេញការងារបម្រើពលរដ្ឋនៃប្រទេសរៀងខ្លួន ហើយបន្តពង្រឹងពង្រីកកិច្ចសហប្រតិបត្តិការ មិត្តភាពអ្នកជិតខាងល្អ និងអភិវឌ្ឍន៍។ ក៏ប្តេជ្ញារួមគ្នាបង្រួមទំនាស់ឬការយល់ច្រលំគ្នា ហើយពង្រីកកិច្ចទំនាក់ទំនង មិត្តភាព។ ពង្រឹងសន្តិសុខ សន្តិភាពនិងបង្ក្រាបបទល្មើសនានានៅបណ្តោយព្រំដែនក្នុងកម្រិត និងក្របខ័ណ្ឌនៃយោធភូមិភាគទាំងពីរ។
ប្រតិភូទាំងពីរ ពិភាក្សាការងារនិងការជូនវត្ថុអនុស្សាវរីយ៍គ្នាទៅវិញទៅមក៕ ដោយ ៖ បន្ទាយ
