ភ្នំពេញ៖ ឆ្លើយតបទៅនឹងការប្រកាសព្យួរជំនួយ របស់សហគមន៍អឺរ៉ុប មកលើការរៀបចំការបោះឆ្នោត នៅក្នុងប្រទេសកម្ពុជា គណៈកម្មាធិការជាតិរៀបចំការបោះឆ្នោត (គ.ជ.ប) នៅថ្ងៃទី១៣ ខែធ្នូ ឆ្នាំ២០១៧នេះ បានចេញសេចក្តីថ្លែងការណ៍មួយដោយបានសម្តែងការសោកស្តាយចំពោះការសម្រេចព្យួរជំនួយនេះដោយបានបញ្ជាក់អំពីមូលហេតុចំនួន៣ចំណុច ។
នៅសេចក្តីថ្លែងការណ៍របស់គ.ជ.ប បានបញ្ជាក់ជូនសហគមន៍អឺរ៉ុបចំនួន៣ចំណុចដូចជា៖
១៖ សហភាពអឺរ៉ុប គួរតែយល់ថា គ.ជ.ប អនុវត្តការងារជាអ្នកបច្ចេកទេស ហើយសហភាពអឺរ៉ុបមិនត្រូវយករឿងរបស់តុលាការ និងបញ្ហានយោបាយ មកដោះស្រាយជាមួយ នឹងការងារបច្ចេកទេសរបស់ គ.ជ.ប ទេ។
២៖ ទោះស្ថិតនៅក្នុងកាលៈទេសៈណាក៏ដោយ គ.ជ.ប នៅតែរក្សាគោលដៅចម្បងទាំងពីរ ដែល គ.ជ.ប បានអនុវត្តក្នុងការបោះឆ្នោតឆ្នាំ២០១៧ កន្លងមកនេះដដែល នោះគឺពលរដ្ឋខ្មែរ ត្រូវមានឈ្មោះត្រឹមត្រូវ ក្នុងបញ្ជីបោះឆ្នោត ហើយសិទ្ធិសម្តែងមតិតាមរយៈសន្លឹកឆ្នោត ត្រូវតែបានរាប់យ៉ាងត្រឹមត្រូវបំផុត គ្មានលម្អៀងទៅរកគណបក្សនយោបាយណាមួយនោះទេ។ ហើយក៏ដោយសារតែ គ.ជ.ប អនវុត្តបានដូចគោលដៅទាំងពីរខាងលើនេះហើយ ទើបសហភាពអឺរ៉ុបវាយតម្លៃក្នុងសេចក្តីថ្លែងការណ៍ព័ត៌មាន ចុះថ្ងៃទី១២ ខែធ្នូ ឆ្នាំ២០១៧ របស់ខ្លួនថា៖ “សហភាពអឺរ៉ុបរីករាយក្នុងការគាំទ្រដល់ដំណើរការរៀបចំការបោះឆ្នោតជ្រើសរើសក្រុមប្រឹក្សាឃុំសង្កាត់ របស់ប្រទេសកម្ពុជា កាលពីថ្ងៃទី៤ ខែមិថុនា ឆ្នាំ២០១៧ ដែលមានការទទួលស្គាល់យ៉ាងទូលំទូលាយថា ត្រូវបានរៀបចំដោយ គ.ជ.ប ប្រកបដោយវិជ្ជាជីវៈ ព្រមទាំងមានស្តង់ដារ តម្លាភាព និងកម្រិតទុកចិត្តខ្ពស់។ អត្រាអ្នកទៅបោះឆ្នោតមានកម្រិតខ្ពស់ គឺជាសញ្ញានៃភាពជឿទុកចិត្តទៅលើប្រព័ន្ធបោះឆ្នោត ហើយលទ្ធផលនៃការបោះឆ្នោត ត្រូវបានមើលឃើញថា បានឆ្លុះបញ្ចាំងពីឆន្ទៈពិតប្រាកដរបស់អ្នកបោះឆ្នោត”។ ហេតុនេះ តើមានហេតុផលអ្វីដែលអាចវាយតម្លៃ គ.ជ.ប ថា ការបោះឆ្នោត ឆ្នាំ២០១៨ ខាងមុខ មិនមានលក្ខណៈសេរី ត្រឹមត្រូវ និងយុត្តិធម៌ទៅវិញ? បើមេដឹកនាំ គ.ជ.ប នៅដដែល? សមាជិក គ.ជ.ប ភាគច្រើននៅដដែល? មន្ត្រី គ.ជ.ប រាប់រយនាក់នៅដដែល?
ទី៣៖ សហប្រតិបត្តិការរបស់ គ.ជ.ប កន្លងមកជាមួយគ្រប់ភាគីពាក់ព័ន្ធ គឺប្រកបដោយសុច្ឆន្ទៈ បង្ហាញឱ្យឃើញផ្ទាល់ភ្នែកពីតម្លាភាព ដែល គ.ជ.ប រៀបចំការបោះឆ្នោតនេះ ហើយលទ្ធផលបានបង្ហាញយ៉ាងច្បាស់ ពីសាធារណមតិជាតិ និងអន្តរជាតិរួចទៅហើយដែរ។ ខាងមុខនេះ គ.ជ.ប នៅតែបន្តរក្សាជំហរដដែល ហើយនៅតែស្វាគមន៍តែចំពោះជំនួយអន្តរជាតិណា ដែលប្រកបដោយសុច្ឆន្ទៈពិតប្រាកដ។
គ.ជ.ប សូមបញ្ជាក់ដែរថា គ.ជ.ប បានគ្រោងថវិកាគ្រប់គ្រាន់សម្រាប់ការរបៀចំការបោះឆ្នោតនេះ រួចរាល់ហើយ។ ការសម្រេចរបស់សហភាពអឺរ៉ុប ជាសិទ្ធិយល់ឃើញរបស់ សហភាពអឺរ៉ុប រីឯសេចក្តីថ្លែងការណ៍ខាងលើ ជាសិទ្ធិយល់ឃើញរបស់ គ.ជ.ប ដែរ។
បើតាមសេចក្ដីប្រកាសព័ត៌មាន សហភាពអឺរ៉ុប នៅថ្ងៃទី១២ ខែធ្នូ ឆ្នាំ២០១៧ បានផ្សព្វផ្សាយថា ដោយសារសេចក្ដីសម្រេចរបស់តុលាការកំពូលកម្ពុជាកាលពីថ្ងៃទី ១៦ ខែ វិច្ឆិកា ក្នុងការរំលាយគណបក្សសង្គ្រោះជាតិ (CNRP) គណៈកម្មការអឺរ៉ុបបានសម្រេចចិត្តព្យួរជំនួយរបស់ខ្លួនសម្រាប់គណៈកម្មាធិការជាតិរៀបចំការបោះឆ្នោត។
សហភាពអឺរ៉ុបរីករាយក្នុងការគាំទ្រដល់ដំណើរការរៀបការចំបោះឆ្នោតជ្រើសរើសក្រុមប្រឹក្សាឃុំ/ សង្កាត់របស់ប្រទេសកម្ពុជាកាលពីថ្ងៃទី ៤ ខែ មិថុនា ឆ្នាំ ២០១៧ ដែលមានការទទួលស្គាល់យ៉ាងទូលំទូលាយថា ត្រូវបានរៀបចំដោយគណៈកម្មាធិការជាតិរៀបចំការបោះឆ្នោតប្រកបដោយវិជ្ជាជីវៈ ព្រមទាំង មានស្តង់ដារ តម្លាភាព និងកម្រិតទុកចិត្តខ្ពស់។ អត្រាអ្នកទៅបោះឆ្នោតមានកម្រិតខ្ពស់គឺជាសញ្ញានៃភាពជឿទុកចិត្តទៅលើប្រព័ន្ធបោះឆ្នោត ហើយលទ្ធផលនៃការបោះឆ្នោតត្រូវបានមើលឃើញថា បានឆ្លុះបញ្ចាំងពីឆន្ទៈពិតប្រាកដរបស់អ្នកបោះឆ្នោត។
ទោះជាយ៉ាងនេះក្ដី ចាប់តាំងពីពេលនោះមក វិធានការជាបន្តបន្ទាប់ត្រូវបានអាជ្ញាធរអនុវត្តទៅលើ គណៈបក្សប្រឆាំងដ៏ធំជាងគេដែលទទួលបានសំឡេងឆ្នោតចំនួន ៤៤,៥% នៅក្នុងការបោះឆ្នោតជ្រើស រើស អង្គនីតិបញ្ញត្តិកាលពីឆ្នាំ ២០១៣ និងចំនួន ៤៣,៨% នៅក្នុងការបោះឆ្នោតថ្នាក់មូលដ្ឋានកាលពីឆ្នាំ២០១៧ ។
សេចក្ដីសម្រេចរំលាយគណៈបក្សសង្គ្រោះជាតិ និងការបែងចែកអាសនៈរដ្ឋសភា និងក្រុមប្រឹក្សា ឃុំ/សង្កាត់ ទៅឲ្យគណបក្សដទៃ គឺជាការបដិសេធចោលនូវការជ្រើសរើសរបស់ពលរដ្ឋដែលបានបោះ ឆ្នោតជូនគណបក្សនេះនៅក្នុងការឆ្នោតឆ្នាំ ២០១៣ និងឆ្នាំ ២០១៧។
សេចក្ដីសម្រេចរំលាយគណបក្សសង្គ្រោះជាតិក៏មានន័យផងដែរថា គណបក្សនេះនឹងមិនអាច ចូលរួមក្នុងការបោះឆ្នោតជ្រើសរើសតំណាងរាស្ត្រនៅឆ្នាំ ២០១៨ ខាងមុខនេះបានឡើយ។ នៅក្នុង ដំណើរការបោះឆ្នោតមួយដែលគណបក្សប្រឆាំងត្រូវបានផាត់ចេញតាមទំនើងចិត្តនេះ ក៏មិនអាចត្រូវបាន មើលឃើញថាមានភាពស្របច្បាប់បានដែរ ៕ ដោយ ៖ បញ្ញាស័ក្តិ
