មណ្ឌលគិរី ៖ សមាជិកឧត្តមក្រុមប្រឹក្សាពិគ្រោះនិងផ្ដល់យោបល់ពីគណបក្សខ្មែរក្រោក បានចុះមកផ្ទាល់ភ្លាមៗ នៅខេត្តមណ្ឌលគិរីបន្ទាប់ពីលេចលឺព័ត៌មានថា ចៅហ្វាយស្រុកលួចព័ទ្ធរបងយកដីចំការស្រល់ដែលជាដីរបស់រដ្ឋនិងមានដើមស្រល់ជាស្នាព្រះហស្ថរបស់អតីតព្រះមហាវីរក្សត្រ នរោត្តម សីហនុ ក្នុងទំហំ ២២៥ហិចតា ឋិតក្នុងភូមិពូព្យាម ឃុំសែនមនោរម្យ ស្រុកអូរាំង ខេត្តមណ្ឌលគីរី ។
បើតាមផេកហ្វេសប៊ុក លោក វឌ្ឍនា សាពង្ស ហៅវីល្លាម កាលពីថ្ងៃទី១៨កុម្ភៈ បាននិយាយថា ក្នុងបេសកកម្មនេះ យើងខ្ញុំពិនិត្យឃើញថាពិតជាមានការព័ទ្ធរបងរំលោភយកដីរដ្ឋ និងចំការស្រល់ដែលជាស្ថាព្រះហស្ថរបស់អតីតព្រះមហាក្សត្រ យ៉ាងពិតប្រាកដមែនហើយមានព័ទ្ធរបងក្នុងទំហំធំទៀតផង ជាពិសេសករណីរំលោភនេះមានពាក់ព័ន្ធនិងជំទាវឧកញ៉ា ធំៗមួយចំនួនទៀត ។
យោងតាមប្រភពព័ត៌មាននានា និងការចុះប្រតិបត្តិការជាក់ស្ដែង សមាជិកឧត្តមក្រុមប្រឹក្សាពិគ្រោះនិងផ្ដល់យោបល់ពីគណបក្សខ្មែរក្រោក បានទទួលតំរុយច្បាស់ការ និងភស្តុតាងនានា គ្រប់គ្រាន់ឈានដល់ការកសាងរបាយការណ៍បញ្ជូនទៅ រាជរដ្ឋាភិបាលដេីម្បីដាក់វិធានការទប់ស្កាត់ ដាក់ទោសជនខិលខូចទាំងនោះ ក្នុងស្មារតីការពារកេរតំណែលរបស់ សម្ដេចព្រះករុណាព្រះបាទ នរោត្តម សីហនុ ព្រះមហាវីរក្សត្រ ជាទីគោរពសក្ការៈដ៏ខ្ពង់ខ្ពស់ ។
បើតាមបណ្តាញសារព័ត៌មានក្នុងស្រុកបានលើកឡើងថា មន្ត្រីមូលដ្ឋាននៅស្រុកអូររាំង កាន់តែច្រើនបានទម្លាយព័ត៌មាន ជុំវិញករណីរំលោភយកដីចម្ការស្រល់រាប់រយហិកតា ពីអ្នកមានអំណាច ខណៈប្រជាពលរដ្ឋកំពុងរង់ចាំមើលចំណាត់ការរបស់ថ្នាក់ដឹកនាំខេត្តមណ្ឌលគិរី លើអ្នកពាក់ព័ន្ធដីរដ្ឋទាំងនេះ។ លោកស្រី ខ្វាន់ ត្រែល មេឃុំសែនមនោរម្យបាននិយាយថា “ដីចម្ការស្រល់ដែលគេបានយករបងទៅហ៊ុំព័ទ្ធជាច្រើនកន្លែងនោះ មិនមានឯកសារផ្ទេរអីទេ…តែមេ (លោក នង ទុណ្ណារី អភិបាលស្រុកអូររាំង) គាត់ឲ្យខ្ញុំធ្វើឯកសារកាន់កាប់ដី ទៅអ្នកធំហ្នឹងមិនមានឯកសារអីទេ ឃើញគាត់ធ្វើកាន់កាប់តែម្តង ដោយគាត់អ្នករៀបចំឯកសារខាងភូមិឃុំ អ្នកចុះចារបញ្ជូន ទៅខាងស្រុកវិញ” ។
លោកស្រីមេឃុំបន្តថា “ដោយសារតែខ្លាចមានបញ្ជាដល់ខ្លួន ឯកសារដែលលោកអភិបាលស្រុក បញ្ជាឲ្យ មេភូមិមេឃុំចុះហត្ថលេខា ត្រូវពួកគាត់ពន្យាពេលអស់ជាង១០ថ្ងៃក្រោយមកដោយ ខ្លាចឥទ្ធិពលរបស់លោកអភិបាលស្រុក គាត់ក៏យល់ព្រមចុះហត្ថលេខា ទាំងប្រថុយតែម្តង”។ ចំពោះឈ្មោះអ្នកកាន់កាប់ដីក្នុងឯកសារ ដែលអភិបាលស្រុកបញ្ជាឲ្យមេភូមិមេឃុំបោះត្រា និងចុះហត្ថលេខា លោកស្រីមេឃុំ មិនហ៊ានបញ្ចេញឈ្មោះទេ គ្រាន់តែបញ្ជាក់ថា គឺអ្នកធំ។ លោកស្រី ខ្វាន់ ត្រែល បានឲ្យដឹងទៀតថា “នៅពេលលោក នង ទុណ្ណារី យកឯកសារឲ្យចុះហត្ថលេខាគឺអះអាងថា ដីនេះមិនមានបញ្ហាអីទេ ទោះគាត់ប្រកែកមិនព្រមចុះហត្ថលេខាក៏ដោយ” ។
លោក ខាត់ សាក់ មេបញ្ជាការសឹករងស្រុកអូររាំងបានឲ្យដឹងថា ដោយមើលឃើញពីភាពមិនប្រក្រតី នៅតំបន់ដីចម្ការស្រល់ ព្រោះមានគេយកបង្គោលរបងទៅបោះកំណត់ជាព្រំ កម្មសិទ្ធិពាសពេញដីយ៉ាងអនាធិបតេយ្យ កាលពីថ្មីៗនេះ លោកក៏បានដឹកនាំកម្លាំងយករបងថ្មទៅបោះ កំណត់សម្គាល់ដីរបស់រដ្ឋ ចៀសវាងការរំលោភយកដោយខុសច្បាប់ពីជនមុនស្គាល់មុខ ស្រាប់តែលោកអភិបាល ស្រុកអូររាំង បានបញ្ជាតាមទូរស័ព្ទឲ្យលោកដករបងពីដីទាំងនោះវិញឮដូច្នេះលោក ខាត់ សាក់ ក៏បានឆ្លើយតបថា បើឲ្យខ្ញុំដកបង្គោលទាំងនេះ សូមលោកអភិបាលជួយឲ្យគេ ដករបងដែលធ្វើព័ទ្ធដីចម្ការស្រល់របស់រដ្ឋវិញផង ព្រោះដើមស្រល់នេះទាហានបានដាំតាំងពីឆ្នាំ២០០៤ លើផ្ទៃដី២២៥ហិកតា ថែទាំរយៈពេល៥ឆ្នាំទើបប្រគល់ ឲ្យមន្ទីរកសិកម្មខេត្តអ្នកថែរក្សាបន្តមិនមែនគាត់ទៅដាំរបងយកជាកម្មសិទ្ធិខ្លួនឯងឡើយ ។
យោងតាមកំណត់ហេតុចុះត្រួតពិនិត្យរបស់ក្រុមការងារដឹកនាំដោយលោកនាយរងខណ្ឌរដ្ឋបាលព្រៃឈើ ចំណុះឲ្យមន្ទីរកសិកម្មខេត្ត ថ្ងៃទី១៤ ខែកុម្ភៈ ឆ្នាំ២០១៩ ដោយគ្មានវត្តមានអភិបាលស្រុក អភិបាលរងស្រុក និងចៅសង្កាត់ ប្រហែលជាភ័យគេចវេស ឬរត់ទៅឱបជើងមន្ត្រីថ្នាក់ណាមួយ ដើម្បីបង្វែកំហុសរបស់ខ្លួនទៅដាក់អ្នកផ្សេង ឬប្រែក្រឡាស់សឲ្យទៅជាខ្មៅ ទើបមិនចូលរួមជាមួយមន្ត្រីជំនាញ ដើម្បីពិនិត្យឲ្យដឹងពិតប្រាកដថា ដីចម្ការស្រល់ជាង ២២៥ហិកតា កំពុងព័ទ្ធរបងហ៊ុំយកធ្វើជាកម្មសិទ្ធិក្រោមចុងប៊ិចអភិបាលស្រុក និងជាសមាជិកគណៈកម្មការទប់ស្កាត់បង្ក្រាបធនធានធម្មជាតិទៀតផង ។
នៅក្នុងកំណត់ហេតុបានសង្កត់ធ្ងន់ ដោយការលើកឡើងរបស់លោក សារូ រតនា នាយរងខណ្ឌរដ្ឋបាលព្រៃឈើ មណ្ឌលគិរី ដោយអះអាងថា ការរំលោភកើតឡើងដោយសារ ហាងឆេងដីត្រូវប៉ាន់ ការយកឈ្នះអ្នកមានអំណាច មុខមាត់ តួនាទីមុខងារ ធ្វើជាឈ្នាន់ បន្លាចដល់អ្នកតូចតាច ហើយទន្ទ្រានកាន់កាប់ដោយខុសច្បាប់គ្មានកោតក្រែង ឬគោរពច្បាប់បន្តិចសោះឡើយ។ លោកនាយរងខណ្ឌបានបន្ទោសធ្ងន់ៗ ដល់អាជ្ញាធរដែលធ្វេសប្រហែស បណ្តោយឲ្យមានការរំលោភដីរដ្ឋ ក្នុងចម្ការស្រល់នេះបាន៕ ដោយ ៖ កូឡាប
