ភ្នំពេញ ៖ Facebook ផ្លូវការរបស់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ត្រូវជនអនាមិក Hack ហើយ នៅវេលាម៉ោងជិត១២៖០០ ថ្ងៃត្រង់ ថ្ងៃទី២៥ ខែកុម្ភៈ ឆ្នាំ២០១៩នេះ បន្ទាប់ពីពួកគេលួចចូល ហើយលុបទិន្នន័យជាបន្តបន្ទាប់។
នៅព្រឹកថ្ងៃទី២៥ ខែកុម្ភៈ ឆ្នាំ២០១៩នេះ ទំព័រ Facebook ផ្លូវការរបស់សម្តេចតេជោ ត្រូវបានជនអនាមិកចូលទៅលុបទិន្នន័យជាបន្តបន្ទាប់។
ជនអនាមិក បានសរសេរនៅលើ Facebook ផ្លូវការរបស់សម្តេចតេជោ យ៉ាងដូច្នេះថា៖ «ក្រុមហ៊ុន ហ្វេសប៊ុក បានលុប និងព្យាយាមបិទគណនីរបស់ខ្ញុំ។ តែខ្ញុំ ហ៊ុន សែន សូមប្រាប់ទៅវិញថា “បើអ្នកឯងហ៊ានបិទហ្វេសប៊ុករបស់ខ្ញុំ ខ្ញុំនិងបិទលែងឲ្យប្រើហ្វេសប៊ុកនៅស្រុកខ្មែរ»។
នៅខណៈពេលនេះ ក្រុមការងារ បច្ចេកទេសព័ត៌មានវិទ្យារបស់សម្តេចតេជោ ហ៊ុន សែន កំពុងទំនាក់ទំនងដោះស្រាយបញ្ហា Hack នេះ។
បើតាមផេកហ្វេសប៊ុកសម្ដេចតេជោនាយករដ្ឋមន្ត្រីនៅរសៀលថ្ងៃទី 25 ខែកុម្ភៈនេះបានបញ្ជាក់ជាថ្មីថា “នៅមុននេះបន្តិច មានក្រុមឧក្រឹដ្ឋកម្មបច្ចេកវិទ្យា (Hacker) បានចូលមកលួច Account Facebook ខ្ញុំ ហើយបានលួចលុបទិន្នន័យព័ត៌មានអស់មួយចំនួនធំ។
ពេលនេះ ខាងក្រុមហ៊ុន Facebook កំពុងសើបអង្កេតជនអគតិដែលមានចេតនាអាក្រក់បំពុល និងបំផ្លាញព័ត៌មាននៅក្នុងសង្គមជាតិយើង”។
សូមបញ្ជាក់ថា ក្រុមហេគបានចូលក្នុង page របស់សម្តេច ហើយបានលុបទិន្នន័យមួយចំនួនធំ ប៉ុន្តែនៅរសៀលថ្ងៃនេះ ក្រុមការងារអាយធីរបស់ស្ដេច បានគ្រប់គ្រង page facebook សម្តេចឡើងវិញហើយនិងបានគ្រប់គ្រង ព័ត៌មានមួយចំនួន ដែលបាត់បង់នោះ ក៏មានឡើងវញផងដែរ៕ ដោយ ៖ កូឡាប
