ភ្នំពេញ ៖ អភិបាលរាជធានីភ្នំពេញ ឃួង ស្រេង បានស្នើឱ្យថ្នាក់ដឹកនាំ និងប្រធានអង្គភាព ចំណុះរដ្ឋបាលរាជធានីភ្នំពេញទាំងអស់ ត្រូវប្រតិបត្តិខ្លួនជាមេដឹកនាំ បម្រើរាស្ត្រដោយស្មោះត្រង់ ហើយត្រូវអនុវត្តឱ្យស្របតាមបាវចនាទាំង០២ និង អភិក្រមទាំង០៥ របស់សម្តេតេជោនាយករដ្ឋមន្ត្រី គឺ កែទម្រង់ខាងក្នុង ពង្រីកមិត្តខាងក្រៅ និង ឆ្លុះកញ្ចក់ ងូតទឹក ដុះក្អែល ព្យាបាលនិងវះកាត់ ដើម្បីបន្តនិរន្តរភាពរដ្ឋបាល និង បន្តអនុវត្តន៍ស្នាដៃការងារឱ្យមានប្រសិទ្ធភាព តម្លាភាព និងគណនេយ្យភាព។
ការស្នើដូចនេះ បានធ្វើឡើងនៅក្នុងពិធី ប្រកាសតែងតាំងមុខដំណែង ប្រធានរតនាគាររាជធានីភ្នំពេញ កាលពីរសៀលថ្ងៃទី១៥ ខែ មីនា ឆ្នាំ២០១៩ នៅសាលារាធានីភ្នំពេញ ក្រោមវត្តមានលោក ឆាន់ វឌ្ឍនៈ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លោក ម៉ម សារិន ប្រធានក្រុមប្រឹក្សារាជធានីភ្នំពេញ លោកឃួង ស្រេង អភិបាលរាជធានីភ្នំពេញ និងមានការចូលរួមពីថ្នាក់ដឹកនាំ ប្រធានអង្គភាព និងមន្ត្រីអ្នកមុខអ្នកការជាច្រើននាក់ទៀត។
លោកឃួង ស្រេង បានមានប្រសាសន៍ថា ការប្រកាសតែងតាំងមន្ត្រីរាជការ ធ្វើឡើងជាធម្មតា ក្នុងដំណើរការមុខងារសាធារណៈ របស់មន្ត្រីរាជការ ស៊ីវិល ដែលតែងតែមាន ការតែងតាំង ការផ្ទេរភារកិច្ច សម្រួលភារកិច្ច និងចូលនិវត្តន៍ ទៅតាមនិតិវិធីដែលបានកំណត់ដោយច្បាប់។
ពិធីប្រកាសផ្ទេរភារកិច្ច និងចូលកាន់មុខដំណែងនេះ គឺត្រូវបានតែងតាំងលោក ស៊ាង ដារ៉ា ជាប្រធានរតនាគារាជធានីភ្នំពេញ ជំនួសលោក កែ ប៊ុនឡេង ដែលត្រូវចូលនិវត្តន៍។
លោកអភិបាលបានបញ្ជាក់ថា ការគ្រប់គ្រងហិរញ្ញវត្ថុសាធារណៈ គឺជាផ្នែកមួយដ៏សំខាន់ នៃការអនុវត្តកម្មវិធីកំណែទម្រង់ ចំនួន៤របស់រាជរដ្ឋាភិបាល ដែលក្នុងនោះមាន ការប្រយុទ្ធប្រឆាំងអំពើរពុករលួយ កំណែទម្រង់ច្បាប់ និងប្រព័ន្ធយុត្តិធម៌ កំណែទម្រង់រដ្ឋបាលសាធារណៈ និងកំណែទម្រង់ កងកម្លាំងប្រដាប់អាវុធ ដើម្បីប្រើប្រាស់ឱ្យអស់សក្កដានុពល និងកាលានុវត្តភាពទាំងឡាយដែលមាន ទាំងនៅថ្នាក់ជាតិ និងថ្នាក់ក្រោមជាតិ មានភាពច្បាស់លាស់ ចំទិសដៅ ទាន់សភាពការណ៍ ឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋ និងដំណើរវិវឌ្ឍន៍នៃសង្គម សេដ្ឋកិច្ច និងនយោបាយ។
លោកអភិបាលបញ្ជាក់ថា ថ្វីត្បិតតែរតនាគាររាជធានីភ្នំពេញ គឺជាអង្គភាពមូលដ្ឋាន ចំណុះឱ្យអគ្គនាយកដ្ឋានរតនាគារជាតិ នៃក្រសួងសេដ្ឋកិច្ច និង ហិរញ្ញវត្ថុ ប៉ុន្តែជាកត្តាសត្យានុម័ត អង្គភាពនេះ ក៏ត្រូវមានគណនេយ្យភាព ចំពោះមុខរដ្ឋបាលរាជធានីភ្នំពេញ ជុំវិញការអនុវត្តលិខិតបទដ្ឋានគតិយុត្តិជាធរមាន ក្នុងតួនាទី និងភារកិច្ចស្នូល ចំនួន៤ក្នុងក្របខណ្ឌរាជធានីភ្នំពេញ ផងដែរ។ ដូច្នេះ ប្រធានរតនាគាររាជធានីថ្មី ត្រូវតែបន្តពង្រឹងអភិបាលកិច្ច ក្នុងការគ្រប់ គ្រងហិរញ្ញវត្ថុសាធារណៈ ក៏ដូចជាបន្តយកចិត្តទុកដាក់អនុវត្តការងារឱ្យបានល្អ បង្កើនសាមគ្គីភាព មិត្តភាព រក្សាឯកភាពផ្ទៃក្នុង និង បន្តកិច្ចសហប្រតិបត្តការជាមួយស្ថាប័ន្ធពាក់ព័ន្ធជុំវិញឱ្យបានកាន់តែល្អថែមទៀត។
លោក ស៊ា ដារ៉ា ប្រធានរតនាគាររាជធានីភ្នំពេញ ថ្មី ក៏បានប្តេជ្ញាអនុវត្តឱ្យបានល្អ តាមគោលនយោបាយ របស់រាជរដ្ឋាភិបាល ពិសេសអនុវត្តតាមអនុសាសន៍ ដ៏ថ្លៃថ្លារបស់ប្រមុខរាជរដ្ឋាភិបាល ក៏ដូចជាបទបញ្ជារបស់ក្រសួងសាម៉ី និងផែនការសកម្មភាព របស់រដ្ឋបាលរាជធានីភ្នំពេញ សំដៅបម្រើដល់ផលប្រយោជន៍ប្រជាពលរដ្ឋក្នុងរាជធានី និងសង្គមជាតិទាំងមូល៕ ដោយ ៖ កូឡាប
