ភ្នំពេញ៖ ព្រឹកថ្ងៃសុក្រ ទី២៩ ខែមីនា ឆ្នាំ២០១៩ លោក ឧត្តមសេនីយ៍ឯក អន សុខុន មេបញ្ជាការរងកងរាជអាវុធហត្ថលើផ្ទៃប្រទេស បានអញ្ជើញដុតបំផ្លាញសម្លៀកបំពាក់ក្លែងបន្លំ នៅកន្លែងចាក់សំរាមស្ថិតនៅខណ្ឌដង្កោ រាជធានីភ្នំពេញ។
លោក ឧត្តមសេនីយ៍ឯក អន សុខុន បានឱ្យដឹងថា ដោយមានការអនុញ្ញាតពីសំណាក់ លោក នាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមភូមិន្ទ មេបញ្ជាការកងរាជអាវុធហត្ថលើផ្ទៃប្រទេស និងជាប្រធានសហព័ន្ធកីឡាបាល់ទាត់ជាតិ និងក្រោយពីទទួលបានពាក្យបណ្តឹង ស្តីពីការក្លែងបន្លំពាណិជ្ជសញ្ញា សេវាសញ្ញា និងម៉ាកសមូហភាព ឬពានិជ្ជនាមរបស់សហគ្រាស ដែលបានប្តឹងមកស្នងការយុត្តិធម៌ កងរាជអាវុធហត្ថលើផ្ទៃប្រទេស ។ ដោយយោងទៅនឹងច្បាប់ បទបញ្ជា និងការចង្អុលបង្ហាញរបស់លោក នាយឧត្តមសេនីយ៍ មេបញ្ជាការ កម្លាំងស្នងការយុត្តិធម៌កងរាជអាវុធហត្ថលើផ្ទៃប្រទេស បានដំណើរការស៊ើបង្កេត នូវរាល់ការក្លែងបន្លំ ពានិជ្ជសញ្ញា សេវាសញ្ញា និងម៉ាកសមូហភាព ឬពានិជ្ជនាម ដោយមានការសម្របសម្រួលពីព្រះរាជអាជ្ញាអបសាលាដំបូងរាជធានីភ្នំពេញ គឺនៅថ្ងៃទី០៧ ខែវិច្ឆិកា ឆ្នាំ២០១៨ កម្លាំងបានដំណើរការស៊ើបង្កេត និងឈានដល់ការបង្ក្រាប រឹបអូសបានសម្លៀកបំពាក់ក្លែងបន្លំចំនួនបីទីតាំង ដែលបង្ក្រាបបានខោអាវចំនួន ២៤៥៣ កំប្ល៉េ និងបានឃាត់ខ្លួនជនសង្ស័យម្នាក់ ឈ្នោះ ហេង រស្មី បញ្ជូនទៅតុលាការដើម្បីបន្តនីតីវិធីផងដែរ។
ក្នុងឱកាសនោះផងដែរ លោក ឧត្តមសេនីយ៍ឯក បានបន្តថាការបង្ក្រាបនេះគឺធ្វើយ៉ាងណា ដើម្បីកុំឱ្យមានការក្លែងបន្លំកម្មសិទ្ធិបញ្ញាទាំងឡាយ ដែលបានកើតឡើងនៅទូទាំងប្រទេស ហើយក៏ជាសញ្ញាមួយដែលបញ្ជាក់ថា នៅព្រះរាជាណាចក្រកម្ពុជា ជាប្រទេសនីតិរដ្ឋ ហើយជនណាដែលបានប្រព្រឹត្តនូវអំពើក្លែងបន្លំ ដែលច្បាប់ហាមឃាត់ គឺដាច់ខាតត្រូវតែមានការបង្ក្រាប និងអនុវត្តទៅតាមនីតិវិធីដែលបានចែង ហើយថ្ងៃនេះជាក់ស្តែងសម្លៀកបំពាក់ចំនួន ២៤៥៣កំប្ល៉េ ដែលជាករណីនៃការក្លែងបន្លំកម្មសិទ្ធិបញ្ញានេះ គឺកម្លាំងអាវុធហត្ថបង្ក្រាបបានយ៉ាងជោគជ័យ និងទទួលបានលទ្ធផលល្អសើរ ហើយសង្ឃឹមថាការក្លែងបន្លំទាំងឡាយគឺនឹងមិនមានតទៅទៀតឡើយ។ តាមសំណូមពរបស់លោក នាយឧត្តមសេនីយ៍មេបញ្ជាការកងរាជអាវុធហត្ថលើផ្ទៃប្រទេស និងជាប្រធានសហព័ន្ធកីឡាបាល់ទាត់ជាតិ និងដោយបានការអនុញ្ញាតពីព្រះរាជអាជ្ញា ដើម្បីលុបបំបាត់ផលិតផលក្លែងក្លាយ នៅថ្ងៃនេះគឺយើងបានដំណើរការដុតបំផ្លាញចោលសម្លៀកបំពាក់ទាំងអស់ ដោយមានការចូលរូមពី ព្រះរាជអាជ្ញា តំណាងសហព័ន្ធកីឡាបាល់ទាតិជាតិ កម្លាំងអាវុធហត្ថ និងអាជ្ញាធរដែនដីផងដែរ។
ជាមួយនឹងហេតុការណ៍ដុតខោអាវនេះបណ្ដាញសង្គមហ្វេសប៊ុកជាច្រើនដោយក៏មិនបង្ហាញពីអារម្មណ៍របស់ខ្លួនថាមិនគួរបើកហាងនោះទេដោយគ្រាន់តែបកស្លាកសញ្ញាចេញហើយយកទៅចែកឱ្យអ្នកទីទាល់ក្រឬក៏តាមអើយតាមក្មេងកុមារកំព្រាពីព្រោះពួកគេទាំងនោះមិនមានខោអាវសម្រាប់ស្លៀកពាក់សមរម្យស្អាតបាតនោះទេ។
ជាមួយករណីនេះលោកអេងហ៊ីបានឆ្លើយតបទៅនឹងប្រតិកម្មរបស់មហាជនថា ខ្ញុំបាទឧត្តមសេនីយ៍ត្រី អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស សូមធ្វើការឆ្លើយតបជាមួយបងប្អូន សាធារណជនដែលបានបញ្ចេញមតិយោបល់ពាក់ព័ន្ធនឹងការដុតបំផ្លាញចោលសម្លៀកបំពាក់ក្លែងបន្លំពាណិជ្ជសញ្ញា សេវាសញ្ញា ម៉ាកសមូហភាព ពាណិជ្ជនាម និយាយជារួមគឺសម្លៀកបំពាក់ក្លែងក្លាយរូបសញ្ញាសហព័ន្ធកីឡាបាល់ទាត់កម្ពុជា ដែលប្រព្រឹត្តទៅនៅថ្ងៃទី២៩ ខែមីនា ឆ្នាំ២០១៩ នេះ។
ជាបឋមខ្ញុំបាទសូមអរគុណចំពោះមតិយោបល់របស់បងប្អូន សាធារណជនទាំងអស់នៅក្នុងការផ្សព្វផ្សាយព័ត៌មានរបស់កងរាជអាវុធហត្ថ នាពេលកន្លងទៅ ខ្ញុំបាទសុំទទួលយកនូវមតិយោបល់ទាំងនេះ។
សូមបងប្អូនមេត្តាពិចារណាមើលបន្តិចថា បើយើងយកសម្លៀកបំពាក់ទាំងអស់នេះ ទៅចែកចាយ ឬចែកអំណោយជូនទៅអ្នកដទៃនោះ មានន័យថា សមត្ថកិច្ច ឬសហព័ន្ធកីឡាបាល់ទាត់កម្ពុជាគាំទ្រនូវផលិតផលក្លែងក្លាយនោះ។
ដោយសារមានការគិតគូរវែងឆ្ងាយ និងស្របតាមផ្លូវច្បាប់ផង សហព័ន្ធកីឡាបាល់ទាត់កម្ពុជា បានស្នើសុំអយ្យការអមសាលាដំបូងរាជធានីភ្នំពេញ ធ្វើការបំផ្លាញចោលនូវសម្លៀកបពាក់ដែលចាប់យកចំនួន២.៤៥៣កំប្ល៉េ កាលពីថ្ងៃទី០៧ ខែវិច្ឆិកា ឆ្នាំ២០១៨។
អាស្រ័យដូចបានជម្រាបជូនខាងលើ សូមបងប្អូន សាធារណជនមេត្តាជ្រាបជាព័ត៌មាន។ បើបងប្អូន សាធារណជន មិនទាន់យល់អាចសួរមកយើងខ្ញុំបានគ្រប់ពេលវេលា។
សូមបងប្អូន សាធារណជនទទួលនូវការគោរពនិងសេចក្តីរាប់អានពីខ្ញុំបាទ៕ ដោយ:កូឡាប
