ភ្នំពេញ៖ អាជ្ញាធររាជធានីភ្នំពេញសុំឲ្យ ខណ្ឌទាំង១២ បំផុសប្រជាពលរដ្ឋនៅតាមមូលដ្ឋានសង្កាត់ ខណ្ឌក៏ដូចមន្ទីរ ស្ថាប័នរដ្ឋ និងវិស័យឯកជនទាំងអស់ ត្រូវនាំគ្នាលើកទង់ជាតិឲ្យបានផុលផុសឡើង ដើម្បី ចូលរួមអបអរសាទរទិវាបុណ្យជាតិ ៧មករា ខួបលើកទី៣៩ដែលជាថ្ងៃប្រវត្តិសាស្ត្ររបស់កម្ពុជា។
ក្នុងកិច្ចប្រជុំ ស្តីពីការពង្រឹងសន្តិសុខរៀបរយ នៃពិធីបុណ្យជាតិ៧មករា ខួបលើកទី៣៩ នៃថ្ងៃរំដោះ៧ មករា ឆ្នាំ១៩៧៩ កាលពីព្រឹកថ្ងៃទី២ មករា នៅសាលារាជធានីភ្នំពេញ លោកឃួង ស្រេង អភិបាលរាជធានីភ្នំពេញមានប្រសាសន៍ថា ដើម្បី អបអរសាទរខួបលើកទី៣៩ថ្ងៃជ័យជំនៈ៧មករា ជាថ្ងៃ ប្រវត្រិសាស្ត្រកម្ពុជា អាជ្ញាធរខណ្ឌទាំង១២ ត្រូវណែនាំ និងបំផុសប្រជាពលរដ្ឋនៅតាមមូលដ្ឋាន ក៏ដូចមន្ទីរ ស្ថាប័នរដ្ឋ និងវិស័យឯកជនទាំងអស់ ត្រូវនាំគ្នាលើកទង់ជាតិនៅតាមខ្នងផ្ទះ ដើម្បី ចូលរួមអបអរសាទរទិវាបុណ្យជាតិ៧មករា ខួបលើកទី៣៩ដែលជាថ្ងៃប្រវត្តិសាស្ត្ររបស់កម្ពុជាឲ្យបានអធឹកអធំ ព្រោះ ទិវាបុណ្យជាតិនេះ ជាកំណើតទីពីររបស់យើងទាំងអស់គ្នា បើគ្មានថ្ងៃ៧មករាក៏មិនមានថ្ងៃនេះដែរ។
លោកបញ្ជាក់ថា “ថ្ងៃនេះក្នុងកិច្ចការប្រារព្ធពិធីថ្ងៃ៧មករា ដែលជាថ្ងៃប្រវត្តិសាស្ត្រនិងជាថ្ងៃរំដោះអាយុជីវិតយើង ទាំងអស់គ្នាឲ្យរួចផុតពីរបបប្រល័យពូជសាសន៍ ហើយពេលនេះ៧មករាក៏បានក្លាយទៅជាទីវាបុណ្យជាតិ ដែលខ្មែរទាំងអស់ចងចាំនិងប្រារព្ធពិធីនេះក្នុងន័យរំឭកថ្ងៃរំដោះ៧មករាចឹងខណ្ឌត្រូវចលនាប្រជាពលរដ្ឋតាមសង្កាត់ខណ្ឌរបស់ខ្លួនឲ្យដាក់ទង់ជាតិនៅមុខផ្ទះទាំងអស់ហើយទង់ជាតិឲ្យបានសមរម្យផងចឹងខណ្ឌទាំងអស់ត្រូវយកចិត្តទុកដាក់បញ្ហានេះ”។
លោក មាន ចាន់យ៉ាដា អភិបាលរងរាជធានីភ្នំពេញបានបញ្ជាក់ថា ទិវាបុណ្យជាតិ៧មករាលើកទី៣៩ឆ្នាំនេះ នឹងធ្វើឡើង ដោយមានមហាជនចូលរួមប្រមាណជា៤៥០០០នាក់ ចំនួននេះសម្រាប់រាជធានីភ្នំពេញមានមហាជន មកពីបណ្តាលខណ្ឌទាំង១២មាន២៥០០០នាក់។ លោកបញ្ជាក់ថា ទិវាបុណ្យជាតិ៧មករាលើកទី៣៩ឆ្នាំនេះ ធ្វើឡើងធំជាងបណ្តាលឆ្នាំមុនៗ ដោយកន្លងមកធ្លាប់តែធ្វើនៅក្នុងទីតាំងគ៨៥ទីស្នាក់ការគណបក្សប្រជាជនកម្ពុជានៅចំការមន ដែលផ្ទុកមហាជនតែប្រមាណ១៦០០នាក់ប៉ុណ្ណោះ។ ដូច្នេះ សម្រាប់ឆ្នាំនេះ គឺជាលើកទី១ហើយ ដែលនឹងធ្វើឡើងដោយមានមហាជនចូលរួមរហូតដល់ចំនួន៤៥០០០នាក់។
សូមបញ្ជាក់ថា៖វាបុណ្យជាតិ៧មករាលើកទី៣៩ឆ្នាំ២០១៨នេះត្រូវប្រារព្ធធ្វើឡើងនៅមជ្ឈមណ្ឌលកោះពេជ្រ ក្រោមអធិបតីភាពសម្តេចអគ្គមហាសេនាបតីតេជោហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្ត្រីនៃព្រះរាជាណាចក្រកម្ពុជា ៕ ដោយ៖កូឡាប