បាត់ដំបង៖ កម្លាំងចម្រុះ២៥នាក់ ដែលមានអាជ្ញាធរ កងកម្លាំងប្រដាប់អាវុធ និងប្រជាពលរដ្ឋ បានបន្តប្រតិបត្តិការរុករកប្រជាពលរដ្ឋខ្មែរចំនួន២នាក់ ដែលបានបាត់ខ្លួន នៅចំណុចព្រំដែនកម្ពុជា-ថៃ ដែលរងគ្រោះដោយជំនន់ទឹកភ្លៀងវាយប្រហារបណ្តាលឱ្យដីភ្នំបាក់សង្កត់លើ បាត់ខ្លួនមិនដឹងថា រស់ ឬស្លាប់នោះ។
នាយឧត្តមសេនីយ៍ ឈុំ សុជាត អ្នកនាំពាក្យក្រសួងការពារជាតិ នៅថ្ងៃទី១៨ខែកញ្ញា ឆ្នាំ២០១៩នេះ បានសរសេរលើហ្វេសប៊ុកថា នៅថ្ងៃនេះ កម្លាំងចម្រុះ២៥នាក់ ដែលមានអាជ្ញាធរ កងកម្លាំងប្រដាប់អាវុធ និងប្រជាពលរដ្ឋ បានបន្តប្រតិបត្តិការរុករកប្រជាពលរដ្ឋខ្មែរចំនួន២នាក់ ដែលបានបាត់ខ្លួន នៅចំណុចព្រំដែនកម្ពុជា-ថៃ ច្រកពាមតា ឃុំតាតោក ស្រុកសំឡូត ខេត្តបាត់ដំបង កាលពីថ្ងៃទី១៦ ខែកញ្ញា ឆ្នាំ២០១៩។ ដោយសារតែពលរដ្ឋខ្មែរទាំង២រូបនេះ បាត់ខ្លួននៅក្នុងទឹកដីថៃ ភាគីកម្ពុជាក៏បាន និងកំពុង សហការជាមួយភាគីថៃ ដើម្បីរុករកជនរងគ្រោះផងដែរ។
លោកអ្នកនាំពាក្យ បានថ្លែងថា “ប្រតិបត្តិការនេះ កំពុងទទួលបានការយកចិត្តទុកដាក់ និងបញ្ជាផ្ទាល់ពី ឯកឧត្តម គន់ គីម ទេសរដ្ឋមន្រ្តីទទួលបន្ទុកបេសកកម្មពិសេស និងជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ ខណៈដែលក្រុមការងារ កំពុងតែមមាញឹកក្នុងប្រតិបត្តិការរុករក”។
សូមបញ្ជាក់ថា កាលពីថ្ងៃចន្ទ មានពលរដ្ឋ៧នាក់ បានចូលទៅក្នុងព្រៃ នៅចំណុចព្រំដែនកម្ពុជា-ថៃ ច្រកពាមតា ឃុំតាតោក ហើយត្រូវបានជំនន់ទឹកភ្លៀងវាយប្រហារបណ្តាលឱ្យដីភ្នំបាក់សង្កត់ ក្នុងនោះមានពលរដ្ឋ៤នាក់ បានរត់រួចខ្លួន ម្នាក់រងរបួសធ្ងន់ និង២នាក់បាត់ខ្លួន។
យោងតាមព័ត៌មានបឋមពីមន្ត្រីយោធាបានរាយការណ៍ថា វត្ថុតាងមួយចំនួនដែលគេសង្ស័យថា ជារបស់ប្រជាពលរដ្ឋ២នាក់ដែលកំពុងបាត់ខ្លួន ដោយសារដីភ្នំបាក់សង្កត់ ត្រូវបានគេប្រទះឃើញនៅក្នុងគំនរដីដែលបាក់ហូរពីលើភ្នំមួយកន្លែង កាលពីរសៀលថ្ងៃទី១៧ កញ្ញា ដែលនៅជិតព្រំដែនខ្មែរ-ថៃ ក្នុងភូមិសាស្ត្រភូមិអូរត្រែង ឃុំតាតោក ស្រុកសំឡូត។ រហូតមកដល់ព្រឹកថ្ងៃទី១៨ ខែកញ្ញានេះ នៅមិនទាន់មានតម្រុយពីជនរងគ្រោះ២នាក់ ដែលសង្ស័យដីភ្នំរលំសង្កត់បាត់ខ្លួននោះនៅឡើយទេ។
ប៉ុន្តែទោះយ៉ាងណា ប្រជាពលរដ្ឋនៅក្នុងតំបន់នោះ បានរកឃើញវត្ថុតាងទាំងនោះ មាន ស្បែកជើង មួក និងមានកំណាត់ពោះវៀនដាច់រាយប៉ាយពេញដី (សង្ស័យជាពោះវៀនមនុស្ស) ដែលត្រូវបានរកឃើញដោយក្រុមគ្រួសារជនរងគ្រោះ និងមន្ត្រីយោធាប៉ុន្មាននាក់ផង ដែលបានចុះទៅដល់ទីនោះ។
ប្រភពពីមន្ត្រីយោធាថា ពួកគេបានរកឃើញតែវត្ថុតាងប៉ុណ្ណឹង រីឯជនរងគ្រោះទាំង២នាក់នោះ គេមិនទាន់ដឹងថា ក្លាយជាសាកសពកប់នៅក្នុងដីល្បាប់ ដែលបាក់ហូរពីលើភ្នំឬយ៉ាងណានោះទេ ព្រោះពេលនោះពួកគេបានរុករកមិនឃើញសោះ ។ ប៉ុន្តែដោយសារមេឃកាន់តែងងឹត និងជិតយប់ទៅហើយ ទើបពួកគនាំគ្នាផ្អាកការរុកររកជាបណ្ដោះសិន និងបន្តការរុករកនេះ នៅថ្ងៃទី១៨ កញ្ញា នេះបន្តទៀត។
សូមបញ្ជាក់ថា ពលរដ្ឋចំនួន៣នាក់ បានជួបគ្រោះធម្មជាតិដ៏មហន្តរាយនេះ កាលពីរសៀលថ្ងៃទី១៦ កញ្ញា ខណៈដែលពួកគេបានសំងំជ្រកភ្លៀងនៅលើចង្កេះភ្នំមួយកន្លែង ដែលពួកគេមិនស្គាល់ឈ្មោះ ដែលស្ថិតក្នុងភូមិសាស្ត្រ ភូមិអូរត្រែង ឃុំតាតោក ស្រុកសំឡូត ។
ប៉ុន្តែនៅក្នុងឧប្បត្តិហេតុដ៏រន្ធត់នោះ ពលរដ្ឋម្នាក់ឈ្មោះព្រិន កុសល ភេទប្រុសអាយុ២៥ឆ្នាំ ។ បុរសនេះ មានស្នាមរបួសពេញខ្លួន ហើយបាននិយាយប្រាប់គ្រូពេទ្យថា ខ្លួនបានព្យាយាមរត់រួចពីលំហូរដីល្បាប់ពីលើភ្នំ និងគេចផុតពីដើមឈើយ៉ាងប្រផុតប្រផើយ ខណៈគូកន២នាក់ទៀតអាចត្រូវដីបាក់សង្កត់លើ៕ដោយ៖បញ្ញាស័ក្តិ
