ខេត្តស្វាយរៀង៖ មានការភ្ញាក់ផ្អើលដល់សមត្ថកិច្ចអាវុធហត្ថនិងនគរបាលក្រុងស្វាយរៀងចេញឡានទឹកចំនួន២គ្រឿងមកជួយបាញ់ពន្លត់អគ្គីភ័យមួយបណ្តាលមកពីឆ្លងចរន្តអគ្គីសនីចេញពីបារ៉ែតភ្លើងឆាបឆេះរាលដាលដល់ម៉ាស៊ីនវ៉ៃក្រណាត់និងសរស ជញ្ជាំងស័ង្កសី រោលខ្លោចខ្មៅ។ ករណីនេះបានកើតឡើងកាលពីវេលាម៉ោង២និង១៥នាទីរសៀលថ្ងៃទី១២ខែមករាឆ្នាំ២០១៨នេះនៅភូមិ ទទា សង្កាត់ ចេក ក្រុង ស្វាយរៀង ខេត្ត ស្វាយរៀង។
បើតាមសម្តីរបស់កម្មករធ្វើនៅរោងម៉ាស៊ីនដែលមានមានភ្លើងឆាបឆេះនោះបានប្រាប់ឲ្យដឹងថា៖នៅមុនពេលកើតហេតុគឺក្រណាត់ជាប់ក្នុងម៉ាស៊ីនមិនដំណើរការហើយមួយសន្ទុះក្រោយមកឆ្លងចរន្តបែកផ្កាភ្លើងឆាបឆេះតែម្តង។ ប្រភពបានបន្តទៀតថា៖ ក្រោយដោយសភាពការណ៍មិនអាចគ្រប់គ្រងបានក៏រត់ចេញមកក្រៅហៅគេឯងជួយ និងទូរស័ព្ទដើម្បីសុំជួយអន្តរាគមន៍ដោយប្រើរថយន្តពន្លត់អគ្គីភ័យ២រថយន្តទើបគ្រប់គ្រងបាន។
ដោយឡែកបើតាមសមត្ថកិច្ចវិញក៏បានអោយដឹងថា៖ម្ចាស់ផ្ទះត្រូវភ្លើងឆាបឆេះនេះមានឈ្មោះ យ៉ាន់ សាម៉េត ភេទប្រុស អាយុ ៤៣ឆ្នាំមានទីលំនៅភូមិ ឃុំ កើតហេតុខាងលើហើយផ្ទះដែលឆេះជាកន្លែងកែឆ្នៃកំទេចក្រណាត់រោងចក្រយកមកកែឆ្នៃធ្វើខ្នើយលក់។ហើយទំហំការខូចខាតយើងពុំទាន់បានដឹងនោះទេ។នេះសំណាងហើយដែលបានសមត្ថកិច្ចអាវុធហត្ថនិងនគរបាលមកជួយអន្តរាគមន៍ទាន់ពេលកុំអីមិនដឹងថាត្រូវឆាបឆេះរាលដាលដល់ផ្ទះអ្នកស្រុកនោះទេ៕ វ៉ៃកូ
