ខេត្តស្វាយរៀង ៖ បរុសម្នាក់បានរងរបួសធ្ងន់នៅក្នុងករណីគ្រោះថ្នាក់ចរាចរណ៍មួយ បានកើតឡើងកាលពី ថ្ងៃទី៦ ខែតុលា ឆ្នាំ២០១៧ វេលាម៉ោង៦និង៤០នាទីយប់ ត្រង់ចំណុចផ្លូវជាតិលេខ១ ស្ថិតនៅភូមិដើមពោធិ៍ ឃុំស្វាយតាយាន ស្រុកកំពង់រោទិ៍ខេត្តស្វាយរៀង រវាងម៉ូតូនិងត្រាក់ទ័រសន្តោងរ៉ឺម៉ក។
តាមប្រភពពីប្រជាពលរដ្ឋដែលបានឃើញហេតុការណ៍បានឲ្យដឹងថាៈ គ្រោះថ្នាក់ចរាចរណ៍នេះគឺបានកើតឡើងរវាងត្រាក់ទ័រសន្តោងរ៉ឺម៉ក ពណ៌ក្រហម គ្មានស្លាកលេខ និងម៉ូតូ បើកបរគ្មានការប្រុងប្រយ័ត្ន ។ ប្រពភបានបន្តថា ក្រោយពេលកើតហេតុតៃកុងអាត្រាក់ទ័របានរត់គេចពីកន្លែងកើតហេតុបាត់ស្រមោល។
សមត្ថកិច្ចបានឲ្យដឹងថា ត្រាក់ទ័រខាងលើ បើកបរពីទិសខាងលិចទៅកើត មកដល់កន្លែងកើតហេតុក៏ត្រូវម៉ូតូម៉ាកហុងដាឌ្រីមពណ៌ខ្មៅ ស្លាកលេខ ភ្នំពេញ 1FA 5761 បុកពីក្រោយ ក្នុងទិសដៅស្របគ្នា។ អ្នកបើកបរម៉ូតូឈ្មោះ ពេជ ឈន ភេទប្រុស អាយុ៣៥ មានមុខរបរជាកម្មករ រស់នៅភូមិ ក្អាម ឃុំអង្គប្រស្រែ ស្រុករមាសហែក ខេត្តស្វាយរៀង រងរបួសធ្ងន់ (មិនពាក់មួក) ករណីនេះអ្នករងរបួសធ្ងន់ បានបញ្ចូនទៅមន្ទីរពេទ្យខេត្តស្វាយរៀង ។
ចំណែកមធ្យោបាយទាំងពីរគ្រឿងបានរក្សាទុកនៅអធិការដ្ឋាននគរបាលស្រុកស្វាយទាបដើម្បីរង់ចាំការដោះស្រាយតាមនិតិវិធីច្បាប់ ៕ វ៉ៃកូ
