ភ្នំពេញ ៖ ពាក់ព័ន្ធនឹងទំនាស់ដីធ្លីជាង២ហិកតានៅខណ្ឌព្រែកព្នៅ ដែលមានជនសង្ស័យ៩នាក់ ក្នុងមាន៣នាក់ ត្រូវតុលាការចេញដីកាឃុំខ្លួនដាក់ពន្ធនាគាររួចហើយនោះ មេធាវីតំណាង លោកស្រី ឡោក ខេង អ្នកតំណាងរាស្ដ្រ មណ្ឌលភ្នំពេញ លោកស្រី ឡោក ខេង និងបងថ្លៃឈ្មោះ យស ម៉ាលីណា ដែលបច្ចុប្បន្នជាម្ចាស់ដី ពិតជាបានទិញដីពីឈ្មោះ ស ថាវី អនុរដ្ឋលេខាធិការក្រសួងការពារជាតិពិតប្រាកដមែន។ មេធាវី បានបញ្ជាក់ថា ការទិញ-លក់ដីមួយកន្លែងនេះ ធ្វើឡើងដោយស្របច្បាប់ និងមានការដឹងលឺ ពីអាជ្ញាធរភូមិសង្កាត់និងខណ្ឌព្រែកព្នៅ។
លោកមេធាវី ហ៊ល ស៊ីណា តំណាង លោកស្រី ឡោក ខេង អ្នកតំណាងរាស្ដ្រ មណ្ឌលភ្នំពេញ នៅថ្ងៃទី៣ ខែមីនា ឆ្នាំ២០២០ បានចេញលិខិតបំភ្លឺមួយ បានឲ្យដឹងថា ដីទំហំ ២២.៩០០ម៉ែត្រការ៉េ ដែលមានទីតាំង ស្ថិតនៅភូមិសំរោងត្បូង សង្កាត់សំរោង ខណ្ឌព្រែកព្នៅ រាជធានីភ្នំពេញ គឺជាដីដែលលោកស្រី ឡោក ខេង ទិញពីឈ្មោះ ស ថាវី អតីតអភិបាល ខេត្តឧត្តរមានជ័យ និងបច្ចុប្បន្ន ជាអនុរដ្ឋលេខាធិការ ក្រសួងការពារជាតិ ក្នុងតម្លៃ៦០ដុល្លារ ក្នុងមួយម៉ែត្រការ៉េ ដែលជាតម្លៃលក់ សមស្របតាមទីផ្សារជាក់ស្តែង មិនដូចជាការផ្សព្វផ្សាយថា លោកស្រី ទិញដីនេះ ក្នុងតម្លៃត្រឹមតែ១៥ម៉ឺនដុល្លារ ។
ដោយឡែក ចំពោះមូលប្បទានប័ត្រ ១៥ម៉ឺនដុល្លារ របស់ធនាគារកាណាឌីយ៉ា នោះ គឺជាទឹកប្រាក់មួយចំនួន ប៉ុណ្ណោះ ដែលត្រូវទូទាត់ ជូនម្ចាស់ដើម ក្នុងចំណោម ទឹកប្រាក់សរុប តាមការឯកភាព ពីលោក ស ថាវី (អាចមើលឯកសារ ភ្ជាប់ខាងក្រោម)។
ចំពោះប្រតិបត្តិការទិញលក់វិញ ត្រូវបានបញ្ជាក់ថា មានការដឹងលឺ ពីអាជ្ញាធរគ្រប់ជាន់ថ្នាក់ បានដឹងលឺ ដោយមានការចូលរួម វាស់វែង កំណត់ព្រំប្រទល់ ដីច្បាស់លាស់ បានបង់ពន្ធប្រថាប់ត្រា និងបានធ្វើលិខិតផ្ទេរសិទ្ធិ កាន់កាប់អចលនទ្រព្យ ត្រឹមត្រូវ ឲ្យមកឈ្មោះ យស ម៉ាលីណា ត្រូវជាបងថ្លៃរបស់កូនក្ដី របស់លោកស្រី ឡោក ខេង ដោយជឿជាក់តាមឯកសារ របស់អាជ្ញាធរមូលដ្ឋាន ជាពិសេសសាលាខណ្ឌព្រែកព្នៅ។
ចំពោះការចោទប្រកាន់ថា បានធ្វើរបងស័ង្កសី ព័ទ្ធជុំវិញដី ដែលកំពុងមានវិវាទនេះ ត្រូវបានបកស្រាយថា គឺជាភាពចាំបាច់ ក្នុងការការពារ និងថែរក្សាដី ក្រោយពីការធ្វើសកម្មភាព របស់ឈ្មោះ ភឺន ផល្លា និងបក្សពួក ហើយការរៀបចំ សាងសង់របងស័ង្កសី ព័ទ្ធជុំវិញដី គឺធ្វើឡើងនៅមុនពេល មានកិច្ចប្រជុំ នៅសាលាខណ្ឌព្រែកព្នៅ និងមិនមានការហាមឃាត់ ពីសំណាក់អាជ្ញាធរមូលដ្ឋាន ឬគំហាត់ពីតុលាការ ណាមួយឡើយ។
ដោយឡែកពាក់ពន្ធ័ នឹងការកាន់កាប់ដីវិញ មេធាវីតំណាងលោកស្រី ឡោក ខេង បានពន្យល់ថា ក្នុងកាលៈទេសៈ នៃការប្រទាញប្រទង់គ្នា ពីការទាមទារសិទ្ធិ ជាម្ចាស់កម្មសិទ្ធិលើដី រវាងឈ្មោះ ភឺន ផល្លា និងឈ្មោះ ស ថាវី ជាអ្នកត្រូវទទួលខុសត្រូវ ក្នុងឋានៈ ជាអ្នកលក់ដី ទើបកូនក្ដី របស់លោក នៅតែបន្តការកាន់កាប់ និងថែរក្សាដីជាធម្មតា តាមការលក់ទិញ ដែលមានការដឹងលឺ ពីសំណាក់អាជ្ញាធរ សាលាខណ្ឌព្រែកព្នៅ ដោយរង់ចាំសេចក្ដីសម្រេច អំពីសិទ្ធិ កម្មសិទ្ធិនេះ ពីអាជ្ញាធរមានសមត្ថកិច្ច ឬតុលាការ ចប់ជាស្ថាពរ ស្របតាមស្មារតី នៃកិច្ចប្រជុំ នៅសាលាខណ្ឌព្រែកព្នៅ កាលពីថ្ងៃទី១១ ខែធ្នូ ឆ្នាំ២០១៩ ។
ម្យ៉ាងវិញទៀត តាមរយៈការទាមទារ ខាងលើនេះ នៅមិនទាន់មាន សេចក្ដីសម្រេចណាមួយ ពីតុលាការ ដែលបានសម្រេច ប្រគល់សិទ្ធិ កម្មសិទ្ធិដីនេះ ឲ្យទៅភាគីណា ជាអ្នកឈ្នះនៅឡើយទេ ដោយភាគីវិវាទ នៅតែបន្តប្រើប្រាស់ យន្តការច្បាប់ សម្រាប់ការទាមទារ និងដោះស្រាយ ពីសិទ្ធិ កម្មសិទ្ធិនេះ។
គួរបញ្ជាក់ថា នៅរយៈពេលចុងក្រោយនេះ មានការផ្សព្វផ្សាយព័ត៌មានមិនពិត និងមិនគ្រប់ជ្រុងជ្រោយ បណ្ដាលឲ្យមានការភ័ន្ដច្រឡំមកលើ លោកស្រី ឡោក ខេង អ្នកតំណាងរាស្ដ្រ មណ្ឌលភ្នំពេញ ពាក់ព័ន្ធនឹងវិវាទដី ទំហំ២២ ៩០០ម៉ែត្រការ៉េនេះ។ ដីនេះបច្ចុប្បន្ន កំពុងតែមានវិវាទ រវាងឈ្មោះ ភឺន ផល្លា ជាឧត្តមសេនីយ៍ទោ នៅមេបញ្ជាការរង កងពលតូចលេខ៧០ និងឈ្មោះ ស ថាវី អតីតអភិបាល ខេត្តឧត្តរមានជ័យ និងបច្ចុប្បន្ន ជាអនុរដ្ឋលេខាធិការ ក្រសួងការពារជាតិ ដោយម្នាក់ៗ សុទ្ធតែអះអាងថា ជាម្ចាស់កម្មសិទ្ធិ ស្របច្បាប់ និងកំពុងតតាំងបណ្តឹង នៅតុលាការ។
យ៉ាងណាក៏ដោយ តាមរយៈមេធាវី លោកស្រី ឡោក ខេង និងបច្ចុប្បន្នជាម្ចាស់ដី ដែលទិញដីពីឈ្មោះ ស ថាវី បានបញ្ជាក់ថា ការទិញ-លក់ដីមួយកន្លែងនេះ ធ្វើឡើងដោយស្របច្បាប់ និងមានការដឹងលឺ ពីអាជ្ញាធរភូមិសង្កាត់និងខណ្ឌ។ ចំពោះវិវាទ ដែលបានកើតឡើង គឺទុកឲ្យឈ្មោះ ភឺន ផល្លា និងឈ្មោះ ស ថាវី ដោះស្រាយគ្នា នៅតុលាការតាមផ្លូវច្បាប់។
លោក សាយ ណូរ៉ា ព្រះរាជអាជ្ញារងអមសាលាដំបូងរាជធានីភ្នំពេញ នៅព្រឹកថ្ងៃទី២ ខែមីនា ឆ្នាំ២០២០នេះ បានសម្រេចចោទប្រកាន់ លោក ស ថាវី អនុរដ្ឋលេខាធិការក្រសួងការពារជាតិ និងជាអតីតអភិបាលខេត្តឧត្តរមានជ័យ ជាមេគំនិតឆបោក និងបក្ខពួកចំនួន៣នាក់ទៀត ពាក់ព័ន្ធការលួចដីគេលក់ឲ្យអ្នកដទៃតម្លៃ១៥ម៉ឺនដុល្លារ នៅសង្កាត់សំរោង ខណ្ឌព្រែកព្នៅ រាជធានីភ្នំពេញ។ បន្ទាប់ពីបានចោទប្រកាន់រួចហើយ តើចាំមើលតុលាការហ៊ានចាប់ខ្លួនលោក ស ថាវី ញាត់គុកដែរទេ ឬក៏ជាប់តែជនតូចតាច៣នាក់នោះ។
លោក ស ថាវី អតីតអភិបាលខេត្តឧត្តរមានជ័យ បច្ចុប្បន្នជាអនុរដ្ឋលេខាធិការក្រសួងការពារជាតិ ត្រូវបានតំណាងអយ្យការចោទប្រកាន់ពីបទ ផ្តើមគំនិតក្នុងអំពើលួចលក់អចលនវត្ថុដែលមិនមែនជារបស់ខ្លួន។ ចំណែកបក្ខពួកផ្សេងទៀត ដែលក្នុងនោះមាន៧នាក់ ត្រូវបានគេស្គាល់ឈ្មោះ ត្រូវបានចោទប្រកាន់ពីបទ លួចលក់អចលនវត្ថុដែលមិនមែនជារបស់ខ្លួន។ ក្នុងចំណោមជនសង្ស័យ៧នាក់នោះ មាន៣រូប ដែលត្រូវសមត្ថកិច្ចចាប់ខ្លួន រួមមាន ឡុង ដារ៉ា អាយុ៣៥ឆ្នាំ, ឡូញ រស់ ភេទប្រុស អាយុ៤០ឆ្នាំ និង ប៉ូច ថេន ភេទប្រុស អាយុ៥២ឆ្នាំ។ ឯ៤នាក់ទៀតកំពុងរត់គេចខ្លួន។ ជនទាំង៣នាក់នេះ ត្រូវចាប់ខ្លួនកាលពីថ្ងៃទី២៧ ខែកុម្ភ: ឆ្នាំ២០២០ ជាប់ពាក់ព័ន្ធរឿងលួចលក់ដីអ្នកដទៃមានទំហំ ២២៩០០ម៉ែត្រការ៉េ មានទីតាំងស្ថិតនៅភូមិសំរោងត្បូង សង្កាត់សំរោង ខណ្ឌព្រែកព្នៅ រាជធានីភ្នំពេញ កាលពីអំឡុងឆ្នាំ២០១៨ ។ នគរបាលការិយាល័យព្រហ្មទណ្ឌកម្រិតស្រាល នៃនាយកដ្ឋានព្រហ្មទណ្ឌក្រសួងមហាផ្ទៃ បានបញ្ជូនក្រុមជនសង្ស័យទាំង៣រូបនេះ មកកាន់តុលាការ កាលពីរសៀលថ្ងៃទី២៩ ខែកុម្ភៈ ឆ្នាំ២០២០។
ដីការបស់ព្រះរាជអាជ្ញា សយ ណូរ៉ា បានសម្រេចចោទប្រកាន់បើកការស៊ើបសួរ លើមនុស្សចំនួន៩នាក់ ១៖ លោក ស ថាវី អាយុ៥៣ឆ្នាំ ក្រៅឃុំ , ២៖ លោក ឡុង ដារ៉ា ហៅ ណាង មានខ្លួន , ៣៖ លោក ប៉ូច ថេន អាយុ៥២ឆ្នាំ មានខ្លួន
, ៤៖ លោក ឡូញ រស់ អាយុ៤០ឆ្នាំ មានខ្លួន, ៥៖ លោក អ៊ុក ភក្តី កើតឆ្នាំ១៩៦៦ ក្រៅឃុំ, ៦៖ លោក យិន អ៊ិម ក្រៅឃុំ, ៧៖ លោក ម៉ាត់ ឌី អាយុ៥០ឆ្នាំ ក្រៅឃុំ, ៨៖ លោកស្រី យស់ ម៉ាលីណា ក្រៅឃុំ និង៩៖ និង គូកន ក្រៅឃុំ។
យោងតាមកំណត់ហេតុរបស់សមត្ថកិច្ច បានបញ្ជាក់ថា កាលពីឆ្នាំ២០១៨ ឈ្មោះ ឡុង ដារ៉ា បានលក់ដីទំហំ ២២៩០០ម៉ែត្រការ៉េ ទៅឱ្យឈ្មោះ ប៉ូច ថេន ក្នុងតម្លៃទឹកប្រាក់ (១៥ម៉ឺនដុល្លារអាមេរិក) ហើយបានចែកលុយនោះឲ្យទៅមេធាវីចំនួន៧ម៉ឺនដុល្លារ ចែកទៅឲ្យលោក យិន អ៊ិម ចៅសង្កាត់សំរោង ៤ម៉ឺនដុល្លារ ជាថ្លៃធ្វើឯកសារលក់ដីខាងលើ និងចែកមនុស្សមួយចំនួនទៀត។ ឈ្មោះ ឡុង ដារ៉ា បានសារភាពថា នៅសល់ប្រាក់៣០០០០ដុល្លារអាមេរិក។ ជនសង្ស័យ ឡុង ដារ៉ា បានបញ្ជាក់ប្រាប់សមត្ថកិច្ចទៀតថា ដីនេះឈ្មោះ ប៉ូច ថេន ជាអ្នកឈរឈ្មោះទិញទៅឱ្យឈ្មោះ ស ថាវី ហើយចំពោះប្រាក់ចំនួន ១៥ម៉ឺនដុល្លារនោះ ឈ្មោះ ឡុង ដារ៉ា បានទទួលពីឈ្មោះ ស ថាវី អ្នកស្រី ឡោក ខេង តាមរយៈមូលប្បទានបត្ររបស់ធនាគារកាណាឌីយ៉ា។
លោកផែង វណ្ណៈ បានថ្លែងថា “ក្នុងរឿងនេះមានលោកជំទាវតំណាងរាស្ត្រម្នាក់នៅពីក្រោយខ្នងអ្នកទិញ ។ ទោះបីដឹងថាខ្លួនទិញដីពីចោរហើយក៏ដោយក៏មិនព្រមប្រគល់ដីឲ្យម្ចាស់គេវិញដែរ ថែមទាំងទៅធ្វើរបងព័ទ្ធយកថែមទៀតផង ។ អនុរដ្ឋលេខាធិការក្រសួងមហាផ្ទៃ នៅពីក្រោយខ្នងចោរលក់ដី ។ លោកជំទាវតំណាងរាស្ត្រម្នាក់ នៅពីក្រោយខ្នងអ្នកទិញដីចោរ “។
ឈ្មោះ ឡុង ដារ៉ា បានសារភាពប្រាប់សមត្ថកិច្ចថា ចំពោះដីស្រែដែលខ្លួនបានលក់នោះដែរ គឺជាដីស្រែរបស់ លោក ភឺន ផល្លា ដោយមាន លោក ស ថាវី ជាអ្នកបញ្ជាឲ្យខ្លួនជាអ្នកលក់ទៅឲ្យឈ្នោះ ប៉ូច ថេន ហើយរាល់ឯកសារទាំងអស់ពាក់ព័ន្ធនឹងការទិញលក់ដីនេះ គឺឈ្មោះ អ៊ុ ភក្តី ជាអ្នករៀបចំឡើង។
ចំណែកលោកវីល្លាម បានថ្លែងថា សូមជួយពន្យល់ខ្ញុំផង ថាតើសមឬអត់ ដែលលោក ស ថាវី ជាអនុរដ្ឋលេខាធិការក្រសួងមហាផ្ទៃផង និងជាអនុរដ្ឋលេខាធិការក្រសួងការពារជាតិផង ? ឥឡូវអតីតអភិបាលខេត្តឧត្តមានជ័យ និងជាអនុរដ្ឋលេខារូបនេះ កំពុងជាប់ពាក់ព័ន្ធវ័ន្តករ ចំពោះការប្រើអំណាចធ្វើស៊ីដីរបស់គេ រហូតអយ្យការក្រុងភ្នំពេញទើបសម្រេចចោទប្រកាន់ កាលពីល្ងាចមិញនេះ។ ដោយឡែករឿងដែលខ្ញុំឆ្ងល់ គឺឆ្ងល់ថា តើគាត់ជាអនុរដ្ឋលេខានៅក្រសួងការពារជាតិ ចុះនៅក្រសួងមហាផ្ទៃ គាត់នៅតែជាអនុរដ្ឋលេខាធិការទៀតឬអត់ ? ប្រសិនជាមុខងារស្ទួនគ្នា តើវាសមឬអត់ ?៕ដោយ៖កូឡាប
