ខេត្តស្វាយរៀង ៖ យុវជនម្នាក់បានរងរបួសធ្ងន់ដោយសាររោទិ៍ម៉ូតូដាក់ក្រុមស្ទាវត្រូវក្រុមស្ទាវកាប់និងកាំបិតប៉័ងតោ ហើយនាំគ្នាព្រួតវ៉ៃស្ទើរស្លាប់ស្ទើរស់។ ករណីបង្កហឹង្សាដោយចេតនាមួយនេះកើតឡើងនៅយប់ថ្ងៃអាទឹត្យទី ២១ ខែមករា ឆ្នាំ២០១៨ វេលាម៉ោង២០និង៣០នាទីយប់ នៅត្រង់ចំណុចមុខផ្ទះឈ្មោះ សាំង សារ៉ន ហៅ នី ស្ថិតក្នុងភូមិ បាវិតកណ្ដាល សង្កាត់ បាវិត ក្រុង បាវិត ខេត្តស្វាយរៀង។
បើតាមសមត្ថកិច្ចបានអោយដឹងថា៖នៅមុនពេលកើតហេតុនាក្បាលប្រលប់មានក្រុមក្មេងមួយក្រុមមានគ្នា៥នាក់បានសីុផឹកនៅផ្ទះជួលម្តុំផ្លូវទៅវត្តតាឡុករួចក៏នាំគ្នាទៅចូលផឹកនៅហាងមួយទៀតដែលមានលក់សាច់ក្របីមួយកន្លែងនៅម្តុំវត្តព្រៃយាយ។ ក្រោយពីផឹកស៊ីរួចហើយនោះ លុះដល់ម៉ោងកើតហេតុខាងលើក៏នាំគ្នាដើរតាមផ្លូវចេញមកផ្ទះ ពេលដល់ពាក់កណ្តាលផ្លូវ ស្រាប់តែយុវជនរងគ្រោះជិះមកដល់ហើយបានរោទិ៍ម៉ូតូដាក់ក្រុមជនសង្ស័យ។
ប្រភពដដែលបានបន្តឱ្យដឹងទៀតថា ៖ ដោយក្រុមក្មេងស្ទាវខឹងនឹងយុវជនជិះម៉ូតូ រោទិ៍ដាក់ក៏នាំដេញវ៉ៃ និងកាប់ទៅលើជនរងគ្រោះបណ្តាលឱ្យត្រូវចំក្បាលជនរងគ្រោះមួយកាំបិត ដងខ្លួនមានស្នាមជាំដោយត្រូវគេវ៉ៃជាច្រើនកន្លែង។ក្រោយពីធ្វើសកម្មភាពវ៉ៃ និងកាប់មកលើត្រូវបានប្រជាពលរដ្ឋជួយសង្គ្រោះ ហើយរាយការណ៍មកសមត្ថកិច្ចក្នុងពេលនោះសមត្ថកិច្ចក៏បានចុះមកអន្តរាគមន៍ភ្លាមៗ ចាប់បានម្នាក់រួចបន្តចាប់បានជាបន្តបន្ទាប់រហូតដល់៤នាក់ នៅបន្ទប់ជួលហើយជនបង្កម្នាក់ទៀត ឈ្មោះជាតិពេលឃើញសមត្ថកិច្ចមកដល់ក៏បានរត់គេចខ្លួនបាត់ទៅ។
សមត្ថកិច្ចបានបន្ថែមទៀតថា៖ ជនបង្កខាងលើដែលសមត្ថកិច្ចឃាត់ខ្លួនបានទី1.ឈ្មោះ ក្រាញ់ សុភាព ភេទ ប្រុស អាយុ ២៣ ឆ្នាំ មុខរបរ បុគ្គលិកកាស៊ីណូ Good luck មានទីលំនៅភូមិ ជាសឫស្សី ឃុំ កំពង់ចំលង ស្រុក ស្វាយជ្រំ ខេត្តស្វាយរៀង។ 2.ឈ្មោះ ពៅ សង្ហា ភេទប្រុស អាយុ ២០ ឆ្នាំ មុខរបរ បុគ្គលិក កាស៊ីណូ Good luck មានទីលំនៅភូមិ បាសាក់ ឃុំបាសាក់ ស្រុកស្វាយជ្រំ ខេត្ត ស្វាយរៀង។ ៣.ឈ្មោះ ខែម ស៊ីនឿន ភេទប្រុស អាយុ ២២ឆ្នាំ មុខរបរ បុគ្គលិក កាស៊ីណូ Good luck មានទីលំនៅភូមិ ក្បាលដំរី ឃុំ ស្វាយយា ស្រុកស្វាយជ្រំ ខេត្តស្វាយរៀង។ ឈ្មោះ ម៉ៅ ចាំ ភេទ ប្រុស អាយុ ២៦ ឆ្នាំ មុខរបរ បុគ្គលិក កាស៊ីណូ Good luck មានទីលំនៅភូមិ អង្គសាលា ឃុំ ចំបក់ ស្រុក ស្វាយជ្រំ ខេត្ត ស្វាយរៀង។ ឈ្មោះ ជាតិ អាយុ ២៤ ឆ្នាំ មុខរបរ មិនពិតប្រកដ មានទីលំភូមិ គយត្របែក សង្កាត់ គយត្របែក ក្រុងស្វាយរៀង ខេត្តស្វាយរៀង។ អ្នកទាំង៥បង្កហិង្សាដោយបានព្រួតគ្នា វាយនិងកាប់ដោយកាំបិតបុ័ងតោទៅលើជនរងគ្រោះ ឈ្មោះ ភុក វុទ្ធី ភេទ ប្រុស អាយុ ២៦ ឆ្នាំ មុខរបរ មិនពិតប្រាកដ មានទីលំនៅភូមិ បាវិតកណ្ដាល សង្កាត់បាវិត ក្រុង បាវិត ខេត្តស្វាយរៀង ត្រូវចំក្បាលមួយកាំបិតបណ្ដាលអោយរងរបួសធ្ងន់ត្រូវសមត្ថកិច្ចហៅរថយន្តសង្គ្រោះដឹកយកមកសង្គ្រោះនៅមន្ទីរពេទ្យខេត្ត។ ហើយជនរងគ្រោះត្រូវបានក្រុមគ្រួសាបញ្ជួនបន្តទៅព្យាបាលនៅមន្ទីពេទ្យនៅភ្នំពេញដោយសភាពធ្ងន់ធ្ងរពេក រីឯជនសង្ស័យសមត្ថកិច្ចឃាត់ខ្លួនបានចំនួន០៤នាក់និងនៅសល់១នាក់ ឈ្មោះ ជាតិ ក្រោយពីប្រព្រឹត្តរួច បានរត់គេចខ្លួនបាត់។
សមត្ថកិច្ចកំពុងស្រាវជ្រាវរុករកចាប់ជនសង្ស័យមកផ្ដន្នទាទោសតាមផ្លូវច្បាប់។បច្ចុប្បន្នជនសង្ស័យត្រូវបានសមត្ថកិច្ចឃាត់ខ្លួនបណ្តោះអាសន្ននៅប៉ុស្តិ៍នគរបាលរដ្ឋបាលបាវិតដើម្បីកសាងសំណុំរឿងបញ្ជូនទៅការរិយាល័យជំនាញខេត្តចាត់ការបន្ត។ មូលហេតុ ៖ ទំនាស់ពាក្យសំដីក្នុងពេលបើកបរម៉ូតូនៅលើដងផ្លូវ៕វ៉ៃកូ
