កណ្ដាល ៖ បុរសម្នាក់ ត្រូវបាននារីជាសង្សារ ចាក់សម្លាប់នៅក្នុងផ្ទះសំណាក់យីហោ សំណាងណាស់។ ករណីឃាតកម្មនេះ សមត្ថកិច្ចជំនាញបញ្ជាក់ថា គឺជាករណីឃាតកម្មហើយសមត្ថកិច្ចកំពុងកសាងសំណុំរឿងនិងធ្វើការស្រាវជ្រាវស្វែងរកឃាតករដែលចាក់សម្លាប់ជនរងគ្រោះដើម្បីចាត់ការតាមនីតិវិធីច្បាប់។ ករណីឃាតកម្ម បានបង្កឲ្យមានការភ្ញាក់ផ្ងើលឡើងនៅវេលាម៉ោង១៨និង១០នាទី ថ្ងៃទី២១ ខែមករា ឆ្នាំ២០១៨ ស្ថិតនៅភូមិត្រពាំងសុក្រំ ឃុំបែកចាន ស្រុកអង្គស្នួល ខេត្តកណ្ដាល ។
មន្ដ្រីនគរបាលស្រុកអង្គស្នួលបានឲ្យដឹងថា ជនរងគ្រោះមានឈ្មោះ នួន សុភាព ភេទប្រុស អាយុ៥៨ឆ្នាំ ជនជាតិខ្មែរ មុខរបរបើកហាងម៉ាស្សា និងសារព័ត៌មានសំឡេងប្រជាជន បច្ចុប្បន្នស្នាក់នៅភូមិស្រែអំពិល សង្កាត់ស្នោរ ខណ្ទពោធិសែនជ័យ រាជធានីភ្នំពេញ។ បុរសម្នាក់នេះ បានឌុបនារីជាសង្សាររបស់ខ្លួន មកដេកក្នុងផ្ទះសំណាក់យីហោ សំណាងណាស់ លុះដេកប្រហែលជា៣ម៉ោង ស្រាប់តែនារីជាសង្សារយកកូនកាំបិតចាក់ទៅលើបុរសម្នាក់រូបនេះ បណ្ដាលឲ្យស្លាប់ រួចជិះម៉ូតូរបស់បុរសរូបនេះគេចខ្លួនបាត់។ ក្នុងករណីខាងលើនេះ សមត្ថកិច្ចបានធ្វើការដកហូតវត្ថុតាងរួមមាន៖ កាំបិតចុងស្រួលដងខ្មៅលាយសប្រឡាក់ឈាមចំនួន១ ភួយ១ពណ៌ផ្កាឈូក កន្សែង១ពណ៌ក្រហម ប្រលាក់ឈាម ខ្នើយ១ពណ៌គ្របមុខជនរងគ្រោះ កម្រាលពូកពណ៌ផ្កាឈូកប្រលាក់ឈាម ខោទ្រនាប់ពណ៌ក្រហម វ៉ែនតា១ ស្រោមអានាម័យចំនួន២មិនទាន់ប្រើប្រាស់ វិទ្យុទាក់ទង១គ្រឿង ខោជើងវែងពណ៌ត្រីអ៊ី និងអាវយឺតដៃវែង ពណ៌សខ្មៅលាយខៀវ អាវវាលឃ្លៀកដៃខ្លី ពណ៌ខ្មៅ ស្រោមជើងមនុស្សស្រី១គូរ ពណ៌ខ្មៅ មួកសុវត្ថិភាពចំនួន១ ខ្សែកលោហធាតុពណ៌លឿងមានបន្តោង១ខ្សែ ស្រោមជើងពណ៌ខ្មៅ១គូរ ស្បែកជើង នាឡិកាដៃ និងខ្សែចង្កេះប្រាក់១ខ្សែ។
តាមការបំភ្លឺរបស់ឈ្មោះ ចែម ប៊ុនធី ភេទប្រុស អាយុ៣៤ឆ្នាំ មុខរបរអ្នកមើលការខុសត្រូវផ្ទះសំណាក់យីហោ សំណាងណាស់ បានឲ្យដឹងថា នៅមុនពេលកើតហេតុ ថ្ងៃទី២១ ខែមករា ឆ្នាំ២០១៨ នៅម៉ោង១២ថ្ងៃត្រង់ ជងរងគ្រោះបានជិះម៉ូតូម៉ាកហុងដាឌ្រីម សេ១២៥ ស៊េរីឆ្នាំ២០១៧ ពណ៌ខ្មៅ មកចូលផ្ទះសំណាក់ ដោយបានដឹកនារីជាសង្សារម្នាក់មកជាមួយ រួចចូលដេកក្នុងបន្ទប់លេខ១១ ។ លុះប្រហែលម៉ោង១៣និង៤៣នាទី ឈ្មោះ ចាន់ សុខនីម ភេទស្រី អាយុ៣២ឆ្នាំ មុខរបរមើលការខុសត្រូវផ្ទះសំណាក់ បានឃើញនារីជាសង្សាររបស់ជនរងគ្រោះដែលមកជាមួយគ្នានោះ បានចេញមកក្រៅបន្ទប់ ហើយអង្គុយលើម៉ូតូរបស់ជនរងគ្រោះ ដោយនិយាយទូរស័ព្ទ ភ្លាមនោះនារីសង្សារក៏ជិះម៉ូតូចេញទៅក្រៅបាត់ទៅដោយមិនឃើញត្រឡប់មកវិញ ។
លុះដល់ម៉ោងប្រមាណ១៨ល្ងាច ថ្ងៃខែឆ្នាំដដែល ដោយមានការសង្ស័យមិនឃើញនារីជាសង្សារត្រឡប់មកវិញ ឈ្មោះ ចាន់ សុខនីម ក៏ដើរទៅមើលបន្ទប់លេខ១១ ក៏ឃើញទ្វារបន្ទប់ហើបបន្តិច ហើយឃើញនៅក្នុងបន្ទប់មានសភាពរញ៉េរញ៉ៃនិងឃើញបុរសម្នាក់ដេកស្លាប់លើឥដ្ឋការ៉ូ ដោយមានប្រឡាក់ឈាម ក៏រត់ទៅប្រាប់ប្ដីថាមានមនុស្សស្លាប់ក្នុងបន្ទប់លេខ១១ ក៏បានបង្កឲ្យមានការភ្ញាក់ផ្អើល រួចបានរាយការណ៍ទៅសមត្ថកិច្ចដើម្បីមកធ្វើការពិនិត្យសាកសព ។
សមត្ថកិច្ចបានឲ្យដឹងថា សាកសពមានស្នាមចាក់នឹងកាំបិតចុងស្រួចចំនួន១៧កន្លែង ត្រង់ក្បាលពោះជម្រៅដល់ក្នុង២សង់ទីម៉ែត្រ នៅចង្អុលដៃស្ដាំសពមានដាច់មុតមួយកន្លែង ត្រង់ខ្នងដៃខាងឆ្វេងមានមុតទំហំបីសង់ទីម៉ែត្រជម្រៅដល់ឆ្អឹង ថ្លើមដៃខាងឆ្វេងមុតទំហំ៣សង់ទីម៉ែត្រជម្រៅដល់ឆ្អឹង ភ្លៅខាងស្ដាំមុតមួយកន្លែង៕ ដោយ៖បញ្ញាស័ក្តិ
