ភ្នំពេញ៖ ឯកឧត្តម អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស បានថ្លែងថា កងរាជអាវុធហត្ថខេត្តព្រៃវែង បានបញ្ជូនជនសង្ស័យឈ្មោះ លាប ឡាយ ទៅពន្ធនាគារខេត្តព្រៃវែង តាមអំណាចដីកាបង្គាប់ឱ្យឃុំខ្លួន របស់ចៅក្រមស៊ើបសួរនៃសាលាដំបូងខេត្តព្រៃវែង ចុះថ្ងៃទី១២ ខែឧសភា ឆ្នាំ២០២០។
ឯកឧត្តម បានបញ្ជាក់ថា លោកហួត ហ៊ាង ចៅក្រមស៊ើបសួរនៃសាលាដំបូងខេត្តព្រៃវែង បានចេញដីកាបង្គាប់ឲ្យខ្លួនជនត្រូវចោទខាងលើ ករណីបើកល្បែងជល់មាន់ ។ ជននេះត្រូវបានដាក់ឱ្យស្ថិតនៅក្រោមការត្រួតពិនិត្យ ពីបទ បើកលេងល្បែងស៊ីសងខុសច្បាប់ (ប្រជល់មាន់) ប្រព្រឹត្តនៅភូមិល្វាកោង ឃុំកំពង់ប្រាំង ស្រុកពារាំង ខេត្តព្រៃវែង។ ជនសង្ស័យឈ្មោះ លាប ឡាយ កើតឆ្នាំ១៩៨៧ ស្នាក់នៅភូមិល្វាកោង ឃុំកំពង់ប្រាំង ស្រុកពារាំង ខេត្តព្រៃវែង ត្រូវសមត្ថកិច្ចចាប់ខ្លួន កាលពីថ្ងៃទី១០ខែឧសភាឆ្នាំ២០២០ ។ ជននេះត្រូវដាក់ឲ្យស្ថិតនៅក្រោមការពិនិត្យពីបទបើកកន្លែងលេងល្បែងស៊ីសងខុសច្បាប់ (ប្រជល់មាន់) ប្រព្រឹត្តនៅភូមិល្វាកោង ឃុំកំពង់ប្រាំង ស្រុកពារាំង ខេត្តព្រៃវែង កាលពីថ្ងៃទី២៥ ខែមេសា ឆ្នាំ២០២០ មាត្រា ០៥ នៃច្បាប់ស្តីពីការបង្ក្រាបល្បែងស៊ីសង។
លោកចៅក្រម ក៏បានចេញដីកាសម្រេច បញ្ជាឲ្យភ្នាក់ងារមានសមត្ថកិច្ចនៃកម្លាំងសាធារណៈធ្វើការនាំខ្លួនជនត្រូវចោទដែលមាន លាប ឡាយ ទៅពន្ធនាគារ ខេត្តព្រៃវែង ដោយអនុវត្តតាមនីតិវិធីច្បាប់ ហើយលោកចៅក្រម បង្គាប់ឲ្យប្រធានពន្ធនាគារ ខេត្តព្រៃវែង ទទួលជននេះ និងឃុំខ្លួនជននេះរហូតដល់មានបទបញ្ជាថ្មីសម្រេចផ្សេងពីនេះ៕ដោយ៖កូឡាប
