ខេត្តស្វាយរៀងៈ បុរសម្នាក់បានស្លាប់ និងបុរសម្នាក់ស្ត្រីម្នាក់ផ្សេងទៀត បានរងរបួសស្រាល នៅក្នុងករណីគ្រោះថ្នាក់ចរាចរណ៍មួយ រវាងម៉ូតូនិងម៉ូតូ ក្នុងទិសដៅស្របគ្នា ដែលហេតុការណ៍ខាងលើនេះ បានកើតឡើងកាលពីវេលាម៉ោង៥និង៥៥នាទីព្រឹកថ្ងៃទី ១៨ ខែ ឧសភា ឆ្នាំ ២០២០ លើផ្លូវជាតិលេខ ១៣ Km ០៥/០៦ ស្ថិតក្នុងភូមិពភ្លា សង្កាត់សង្ឃ័រ ក្រុងស្វាយរៀង ។
សមត្ថកិច្ចបានឱ្យដឹងថាៈ ម៉ូតូទី១ ម៉ាក Smash ពណ៌ខ្មៅ ពាក់ផ្លាកលេខ ស្វាយរៀង ១B ២៩៧៩ បើកបរដោយឈ្មោះ គឹម ឡៃ ភេទប្រុស អាយុ ៦៩ ឆ្នាំ មុខរបរ កសិករ រស់នៅភូមិពភ្លា សង្កាត់សង្ឃ័រ ក្រុងស្វាយរៀង ខេត្តស្វាយរៀង បើកបរពីជើងទៅត្បូង ពាក់មួកសុវត្ថិភាព ស្លាប់ពេលបញ្ជូនដល់មន្ទីរពេទ្យ ម៉ូតូខូចខាតស្រាល ។ ម៉ូតូទី២ ម៉ាក ហុងដាសេ១២៥ ពណ៌ ខ្មៅ ពាក់ផ្លាកលេខ ស្វាយរៀង ១J ៤៤៧៨ បើកបរដោយឈ្មោះ យិន ហឿនវុទ្ធី ភេទប្រុស អាយុ ១៩ ឆ្នាំ មុខរបរ កម្មកររោងចក្រ រស់នៅភូមិ គោកស្រម៉ ឃុំសង្កែ ស្រុករំដូល ខេត្តស្វាយរៀង បើកបរពីជើងទៅត្បូង រងរបួសស្រាល ពាក់សុវត្ថិភាព ម៉ូតូខូចខាតធ្ងន់។
ប្រភពដដែលបានបន្តថាៈ អ្នករួមដំណើរឈ្មោះ ឥន សំណាង ភេទស្រី អាយុ ៣៨ ឆ្នាំ មុខរបរ កម្មកររោងចក្រ រស់នៅភូមិឃុំជាមួយគ្នា ពាក់មួកសុវត្ថិភាព រងរបួសស្រាល ។ មធ្យោបាយរក្សាទុកនៅ ការិយាល័យចរាចរណ៍ ខេត្តស្វាយរៀង ដោយឡែក អ្នករបួសសម្រាកព្យាបាលនៅមន្ទីរពេទ្យខេត្តស្វាយរៀង ។ បច្ចុប្បន្ន សពត្រូវបានប្រគល់ជូនគ្រួសារ ធ្វើបុណ្យតាមប្រពៃណី ហើយមូលហេតុ ម៉ូតូម៉ាក Smash បត់ឆ្វេង ខ្វះការប្រុងប្រយ័ត្នទើបបង្កឲ្យមានគ្រោះថ្នាក់នេះកើតឡើង៕
ដោយ៖ វ៉ៃកូ
