ភ្នំពេញ៖ តាមរយៈលទ្ធផលនៃការសិក្សាស្រាវជ្រាវ ពីការវិនិយោគលើការត្រួតពិនិត្យថ្នាំជក់នៅកម្ពុជាឆ្នាំ២០១៩ របស់កម្មវិធីអភិវឌ្ឍន៍អង្គការសហប្រជាជាតិ អង្គការសុខភាពពិភពលោក និងលេខាធិការដ្ឋាននៃអនុសញ្ញាស្ដីពីការត្រួតពិនិត្យផលិតផលថ្នាំជក់ បានឲ្យដឹងថា ការប្រើប្រាស់ផលិតផលថ្នាំជក់ធ្វើឲ្យប្រជាជនកម្ពុជាចំនួន ១៥ ០០០ នាក់ស្លាប់ជារៀងរាល់ឆ្នាំ ដែល៣៣%នៃអ្នកស្លាប់ទាំងអស់ កើតឡើងចំពោះប្រជាពលរដ្ឋដែលមានប្រាក់ចំណូលទាបបំផុត។ មិនតែប៉ុណ្ណោះ ការប្រើប្រាស់ថ្នាំជក់ បណ្តាលអោយខាតបង់ទឹកប្រាក់ចំនួន $649 លានដុល្លារអាមេរិក ដែលស្មើនឹង 3% នៃផលិតផលក្នុងស្រុកសរុប (GDP) របស់កម្ពុជា។
បើតាមសេចក្តីប្រកាសព័ត៌មាន នៅថ្ងៃទី១៦ ខែមិថុនា ឆ្នាំ២០២០ លោកវេជ្ជបណ្ឌិត មុំ គង់ នាយកប្រតិបត្តិអង្គការចលនាដើម្បីសុខភាពកម្ពុជា បានទទួលពានទិវាពិភពលោកគ្មានថ្នាំជក់ ២០២០
ពីអគ្គលេខាធិការអង្គការសុខភាពពិភពលោក ចំពោះកិច្ចខិតខំប្រឹងប្រែង និងសមិទ្ធផលក្នុងការត្រួតពិនិត្យផលិតផលថ្នាំជក់នៅកម្ពុជា។ អស់រយៈកាលជាង ២០ឆ្នាំ ក្នុងការប្រយុទ្ធប្រឆាំងនិងថ្នាំជក់នៅកម្ពុជា លោកវេជ្ជបណ្ឌិត បានធ្វើការតស៊ូមតិ និងបានធ្វើយុទ្ធនាការជាច្រើន ជាមួយស្ថាប័នពាក់ព័ន្ធ ប្រព័ន្ធផ្សព្វផ្សាយព័ត៌មាន យុវជន ស្ត្រី គ្រូបង្រៀន ព្រះសង្ឃ និងជនរងគ្រោះដោយសារថ្នាំជក់ ក្នុងការជំរុញអោយមានច្បាប់ស្ដីពីការត្រួតពិនិត្យផលិតផលថ្នាំជក់នៅកម្ពុជា ដែលច្បាប់នោះត្រូវបានអនុម័តនៅឆ្នាំ២០១៥។
ដូចដែលយើងបានដឹងហើយថា ឧបសគ្គចម្បងមួយក្នុងការបង្កើត និងអនុវត្តច្បាប់ ស្តីពីការត្រួតពិនិត្យផលិតផលថ្នាំជក់ គឺការជ្រៀតជ្រែករបស់ឧស្សាហកម្មថ្នាំជក់។ ឆ្លើយតបនឹងបញ្ហានេះ យុទ្ធនាការ “ ដល់ពេលហើយ! ឈប់ចាញ់បោកក្រុមហ៊ុនថ្នាំជក់” ត្រូវបានបង្កើតឡើង ដើម្បីបំផុសអោយយុវជនចូលរួមក្នុងការទប់ស្កាត់ឧបាយកលរបស់ឧស្សាហកម្មថ្នាំជក់។
នាពេលបច្ចុប្បន្នលោកវេជ្ជបណ្ឌិត មុំ គង់ បានកំពុងដឹកនាំអង្គការចលនាដើម្បីសុខភាពកម្ពុជា ដើម្បីបន្តឆន្ទៈ ក្នុងការការត្រួតពិនិត្យផលិតផលថ្នាំជក់នៅកម្ពុជា ដើម្បីឈានទៅកាន់បន្ថយគ្រោះថ្នាក់ដល់អាយុជីវិត និងសេដ្ឋកិច្ចរបស់ពលរដ្ឋខ្មែរ ដែលបណ្ដាលមកពីការប្រើប្រាស់ថ្នាំជក់។ លោកវេជ្ជបណ្ឌិត បានធ្វើការតាមដាន និងត្រួតពិនិត្យការអនុវត្តច្បាប់ស្តីពីការត្រួតពិនិត្យថ្នាំជក់ ជាទៀងទាត់ និងធ្វើរបាយការណ៍ជូនស្ថាប័នមានសមត្ថកិច្ច និងអាជ្ញាធរមូលដ្ឋាន ដើម្បីចាត់វិធានការ។
ក្នុងឱកាសនោះដែរ លោកស្រីវេជ្ជបណ្ឌិត Li Ailan តំណាងអង្គការសុខភាពពិភពលោកប្រចាំប្រទេសកម្ពុជា បានថ្លែងថា ការរៀបចំពិធីប្រគល់ពានដ៏សំខាន់មួយនេះ ដែលជាការប្រារព្ធទិវាពិភពលោកគ្មានថ្នាំជក់ ២០២០ ស្របពេលដែលអង្គការសុខភាពពិភពលោក ទទួលស្គាល់បុគ្គល ឬស្ថាប័ន ចំពោះស្នាដៃឆ្នើមនិងសមិទ្ធផលក្នុងវិស័យត្រួតពិនិត្យផលិតផលថ្នាំជក់ ដែលទទួលស្គាល់ដោយការិយាល័យទាំង៦ប្រចាំតំបន់របស់ខ្លួន។
លោកស្រី បានបញ្ជាក់ថា យើងពិតជាមានមោទនភាពណាស់ដែល “ ពានពិសេសរបស់អគ្គលេខាធិការនៃអង្គការសុខភាពពិភពលោក “ ត្រូវបានផ្ដល់ជូនដៃគូកម្មវិធីត្រួតពិនិត្យផលិតផលថ្នាំជក់របស់យើង គឺលោកវេជ្ជបណ្ឌិត មុំ គង់ នាយកប្រតិបត្តិអង្គការចលនាដើម្បីសុខភាពកម្ពុជា។ កម្មវិធីនេះគឺជាដំណើរការប្រកាសជាផ្លូវការ បន្ទាប់ពីការជ្រើសរើស ដោយអង្គការសុខភាពពិភពលោកប្រចាំប្រទេសកម្ពុជា គាំទ្រដោយប្រធានការិយាល័យអង្គការសុខភាពពិភពលោកប្រចាំតំបន់អាស៊ីប៉ាស៊ីហ្វិក មុនពេលអនុម័តចុងក្រោយ ដោយអគ្គលេខាធិការនៃអង្គការសុខភាពពិភពលោក។
យើងមានមោទនភាពដែលសមភាគីររបស់យើង ត្រូវបានទទួលស្គាល់ពីអគ្គលេខាធិការ នៃអង្គការសុខភាពពិភពលោកថាជា ជើងឯកក្នុងវិស័យត្រួតពិនិត្យផលិតផលថ្នាំជក់ ។
យើងសុទ្ធតែដឹងគ្រប់គ្នាថា ថ្នាំជក់គឺជាមូលហេតុដ៏សំខាន់មួយ នៃការស្លាប់ជុំវិញពិភពលោក ដែលយើងអាចទប់ស្កាត់បាន ហើយវាបានសម្លាប់ប្រជាជនប្រមាណច្រើនជាង ៨ លាននាក់ក្នុងមួយឆ្នាំៗ។ ដោយឡែកនៅកម្ពុជា ប្រជាជនច្រើនជាង ១៥ ០០០នាក់ បាត់បង់ជិវិតដោយសារការប្រើប្រាស់ផលិតផលថ្នាំជក់ដោយផ្ទាល់ និងស្រូបផ្សែងបារីពីគេ។ ដោយសារតែផលិតផលថ្នាំជក់ បានសម្លាប់អ្នកប្រើប្រាស់ផលិតផលរបស់ខ្លួន ជាងពាក់កណ្ដាល ឧស្សាហកម្មថ្នាំជក់បន្តស្វែងរក “អ្នកជំនួស” ជាអតិថិជនថ្មីដើម្បីរក្សាមុខជំនួញរបស់ពួកគេឱ្យរីកចម្រើន។ ប៉ុន្មានឆ្នាំនេះ ឧស្សាហកម្មថ្នាំជក់បានប្ដូរមុខមាត់ថ្មីដោយណែនាំផលិតផលថ្នាំជក់ថ្មី និងផលិតផលនីកូទីនញៀនថ្មី ដូចជា បារីអេឡិចត្រូនិច និងឧបករណ៍ Vape ផ្សេងៗទៀត ដើម្បីទាក់យកអ្នកប្រើប្រាស់ជំនាន់ថ្មី។
អ្នកជក់បារីងាយនឹងឆ្លងជំងឺកូវីដ-១៩ ដូចជាសកម្មភាពជក់បារី ដោយយកម្រាមដៃប៉ះមាត់ អាចចម្លងវីរុសពីដៃចូលទៅក្នុងមាត់។ អ្នកជក់បារីប្រហែលជាមានជំងឺសួត ឬសមត្ថភាពសួតចុះអន់ថយ ដែលវាអាចកើនឡើងហានិភ័យខ្ពស់នៃការកើតជំងឺធ្ងន់ធ្ងរ។ ឧបករណ៍ជក់ដូចជា បំពង់ជក់តែងតែបឺតរួមគ្នា និងទុយោដែលអាចចម្លងជំងឺកូវីដ-១៩ តាមរយៈការប្រើប្រាស់រួមគ្នាគ្នាដោយគ្មានរក្សាគម្លាតសង្គម។
សេចក្ដីសង្ខេបបែបវិទ្យាសាស្ត្ររបស់អង្គការសុខភាពពិភពលោក ចំពោះការជក់បារីនិងជំងឺកូវីដ-១៩ បានសន្និដ្ឋានថា ផ្អែកលើភស្ដុតាងមានស្រាប់ ការជក់បារីជាប់ពាក់ព័ន្ធជាមួយ ការកើនឡើងនៃភាពធ្ងន់ធ្ងរនៃជំងឺ និងអ្នកស្លាប់នៅក្នុងមន្ទីរពេទ្យដោយជំងឺកូវីដ-១៩។
ប្រធានបទឆ្នាំនេះ ចំពេលដែលយើងផ្ដោតការយកចិត្តទុក ទៅលើការបកអាក្រាតល្បិចកលដ៏ពិសពុល របស់ឧស្សាហកម្មថ្នាំជក់ និងឧស្សាហកម្មពាក់ព័ន្ធ ក្នុងការបំភាន់ដល់យុវជន។ ឧស្សាហកម្មថ្នាំជក់ និងឧស្សាហកម្មពាក់ព័ន្ធផ្សេងៗទៀត ដាក់គោលដៅចំៗទៅលើ់យុវជន ដោយប្រើប្រាស់កលល្បិច ដែលអូសទាញយុវជនដូចជា ការប្រើប្រាស់រសជាតិច្រើនជម្រើ់ស ការរចនាបែបទាក់ទាញ ផ្សព្វផ្សាយផលិតផលថ្មីដោយប្រើពាក្យ “កាត់បន្ថយគ្រោះថ្នាក់” ឬ “ អនាម័យជាង” ជំនួសបារីធម្មតា ឧបត្ថម្ភតារាល្បីៗ/មនុស្សមានឥទ្ធិពលនៅក្នុងសង្គមឱ្យជួយផ្សព្វផ្សាយផលិតផលពួកគេ ប្រើប្រាស់យុទ្ធសាស្ត្រទីផ្សារនៅកន្លែងលក់រាយ និងកន្លែងតាំងបង្ហាញដែលមានកុមារចេញចូលញឹកញាប់ តាមរយៈភាពយន្ត ទូរទស្សន៍ និងបណ្ដាញសង្គមផ្សេងៗទៀត។
យើងត្រូវតែបន្តតាមដានឱ្យទាន់នៅនឹងការវិវឌ្ឍន៍យ៉ាងឆាប់រហ័ស របស់ឧស្សាហកម្មថ្នាំជក់ និងការរីកចម្រើនផលិតផលថ្នាំជក់ថ្មី ដើម្បីការពារយុវជន ពីកលល្បិចអាក្រក់របស់ឧស្សាហកម្មថ្នាំជក់ និងឧស្សាហកម្មពាក់ព័ន្ធផ្សេងៗទៀត។ ប៉ុន្តែការប្រឹងប្រែងរបស់យើង មិនត្រូវធ្វើតែឯកឯងទេ ក្នុងនាមជាជើងឯកសុខភាពសាធារណៈ។ យើងត្រូវការជំរុញភាពក្លាហានយុវជន ឱ្យក្រោកឈរតតាំងនឹងឧស្សាហកម្មថ្នាំជក់ធំៗ។ យើងត្រូវអប់រំយុវជនឱ្យចេះទប់ទល់នឹងការស្វែងរកទីផ្សាររបស់ឧស្សាហកម្មថ្នាំជក់ បដិសេធគ្រប់ផលិតផលថ្នាំជក់ សារធាតុនីកូទីន និងផ្សព្វផ្សាយចំណេះដឹងទៅដល់យុវជនដ៏ទៃទៀត។ ទាំងអស់គ្នា យើងអាចសម្រេចបានជំនាន់គ្មានថ្នាំជក់។
ក្នុងឱកាសនេះ យើងជួបជុំគ្នាដើម្បីថ្លៃអំណរគុណដល់លោកវេជ្ជបណ្ឌិត មុំ គង់ ម្ចាស់ពានពិសេសរបស់អគ្គលេខាធិការ នៃអង្គការសុខភាពពិភពលោកប្រចាំឆ្នាំនេះ។ ការងាររបស់លោកវេជ្ជបណ្ឌិតជាង២ទសវត្សរ៍មកនេះ បាននាំនូវសមិទ្ធផលច្រើនអនេកនៅក្នុងវិស័យត្រួតពិនិត្យផលិតផលថ្នាំជក់។ លោកវេជ្ជបណ្ឌិត មុំ គង់ គឺជាបុគ្គលសំខាន់មួយរូបក្នុងការជំរុញឱ្យមានការអនុម័តច្បាប់ ស្ដីពីការត្រួតពិនិត្យផលិតផលថ្នាំជក់នៅឆ្នាំ២០១៥ ការដកការផ្សាយពាណិជ្ជកម្មថ្នាំជក់ នៅហាងមិនជាប់ពន្ធនៅអាកាសយានដ្ឋាន ការប្រឆាំងនិងទប់ស្កាត់ការជ្រៀតជ្រែតរបស់ឧស្សាហកម្មថ្នាំជក់ ទៅលើការត្រួតពិនិត្យផលិតផលថ្នាំជក់នៅកម្ពុជា។
តាមរយៈភាពជាអ្នកដឹងនាំរបស់លោកវេជ្ជបណ្ឌិត លោកមានលទ្ធភាពបង្កើតកិច្ចសហប្រតិបត្តិការ ជាមួយដៃគូនៅក្នុងជួររដ្ឋាភិបាល ក្រុមសង្គមស៊ីវិល និងប្រព័ន្ធផ្សព្វផ្សាយក្នុងការជំរុញការត្រួតពិនិត្យផលិតផលថ្នាំជក់។ អ្វីដែលសំខាន់មួយទៀត លោកវេជ្ជបណ្ឌិតបានជំរុញឱ្យមានការចូលរួមពីយុវជនកម្ពុជា នៅក្នុងការខិតខំប្រឹងប្រែងក្នុងវិស័យត្រួតពិនិត្យផលិតផលថ្នាំជក់។ លោកវេជ្ជបណ្ឌិត មុំ គង់ គឺជាបុគ្គលតែមួយរូបដែលទទួលបានពានពិសេស របស់អគ្គលេខាធិការនៃអង្គការសុខភាពពិភពលោកនៅឆ្នាំនេះ ហើយវាជាលើកដំបូងបង្អស់សម្រាប់ប្រទេសកម្ពុជា៕
ដោយ៖កូឡាប
