សៀមរាប៖ នាថ្ងៃទី ១៨ ខែ មិថុនា ឆ្នាំ 2020 កម្លាំងផ្នែកគ្រប់គ្រងជនបរទេសដឹកនាំដោយលោកវរសេនីយ៍ទោ អារុណ រតនា អធិការរងទទួលការងារគ្រប់គ្រងជនបរទេស សហការជាមួយកម្លាំងប៉ុស្តិ៍នគរបាលរដ្ឋបាលស្វាយដង្គំ ចុះធ្វើការត្រួតពិនិត្យ នៅចំណុចផ្លូវសុខសាន ស្ថិតនៅភូមិស្ទឹងថ្មីសង្កាត់ស្វាយដង្គំ លើជនបរទេសម្នាក់ លួចស្នាក់នៅដោយខុសច្បាប់ ក្នុងក្រុងសៀមរាប។
ជនបរទេសម្នាក់ ឈ្មោះClARKE ANTHONY DAVID ភេទប្រុស ជនជាតិអង់គ្លេស ឆ្នាំកំណើត១៨ ឧសភា ឆ្នាំ១៩៥៦ លិខិតឆ្លងដែនលេខ៥៤០៦២៩១៩២ ។
តាមការឆ្លើយបំភ្លឺ ជនបរទេសថា រូបគេបានចូលមក រាជាណាចក្រកម្ពុជា តាមច្រកទ្វារព្រលានយន្តហោះខេត្តព្រះសីហនុ អំឡុងខែ កញ្ញា ឆ្នាំ ២០១៧ គោលបំណង អ្នកទេសចរណ៍។ ក្រោយពីបន្តទិដ្ឋាការ ជាអ្នកវិនិយោគ រួចមក ខ្លួនបានធ្វើដំណើរ មកស្នាក់នៅ ខេត្តសៀមរាប អស់រយៈពេល ជាងមួយឆ្នាំ ដោយពុំបានប្រកប របបអ្វីនោះទេ បន្ទាប់មកទៀត ធ្វើដំណើរទៅកាន់ ខេត្តកំពត អស់រយៈពេល ៣ខែ នឹងបន្តស្នាក់នៅខេត្តកំពង់ចាមអស់រយៈពេលជាងពីរសប្តាហ៍ ចុងក្រោយ ធ្វើដំណើរតាមរថយន្តក្រុងមកកាន់ ក្រុងសៀមរាប នៅថ្ងៃចន្ទទី ១៥ ខែមិថុនាឆ្នាំ ២០២០។ ទិដ្ឋាការ បានផុតកំណត់ នៅថ្ងៃទី ១០ ខែ កុម្ភៈ ឆ្នាំ 2019។
បច្ចុប្បន្នជនបរទេសរូបនេះ គ្មានថវិកា ក្នុងការចំណាយ ហូបចុក និងស្នាក់នៅ ក្នុងក្រុងសៀមរាប ជាហេតុធ្វើឲ្យប៉ះពាល់ដល់សាធារណជន និងទេសចរណ៍ក្រុងសៀមរាប។
ក្រោយការសាកសួរកសាងសំណុំរឿងចប់ ដោយមានការឯកភាព ពីលោកវរសេនីយ៍ឯក ណុប សារ៉ាក់ ជាអធិការ យើងបញ្ជូនជនបរទេសរូបនោះ ចេញពីអធិការដ្ឋាននគរបាលក្រុង ឲ្យទៅការិយាល័យសើបអង្កេតនិងអនុវត្តនីតិវិធី នៃស្នងការដ្ឋាននគរបាលខេត្តសៀមរាប ចាត់ការតាមនីតិវិធីបន្ត៕
ដោយ៖បញ្ញាស័ក្តិ
