មន្ត្រីក្រុងប៉េកាំង បានប្រកាសឲ្យដឹងកាលពីថ្ងៃពុធថា ការផ្ទុះវីរុសកូរ៉ូណាថ្មី ដែលបានឆ្លងទៅកាន់មនុស្សចំនួន ២៥៦នាក់នៅប៉េកាំង កាលពីដើមខែមិថុនានេះ គឺអាចគ្រប់គ្រងបាន ប៉ុន្តែនៅតែមានការព្រួយបារម្ភ ពីការហានិភ័យនៃការឆ្លងនៅក្នុងសហគមន៍។
អាជ្ញាធរបានប្រញាប់ប្រញាល់ទប់ស្កាត់ការផ្ទុះ ដែលផ្តើមចេញពីទីផ្សារលក់ដុំដ៏ធំនៅក្នុងក្រុងប៉េកាំង ក្រោយពេលការឆ្លងករណីដំបូងក្នុងរដ្ឋធានីនេះ ត្រូវបានប្រកាសកាលពីថ្ងៃទី ១១ ខែមិថុនា។
“ការរាតត្បាតវីរុសក្នុងក្រុងប៉េកាំងដែលជាប់ទាក់ទងនឹងផ្សារ Xinfadi គឺកំពុងស្ថិតក្រោមការគ្រប់គ្រង ប៉ុន្តែនៅពេលជាមួយគ្នានេះដែរ ពួកយើងបានរកឃើញការឆ្លងនៅកន្លែងធ្វើការ នៅផ្ទះ និងសហគមន៍”។ នេះបើតាមការបញ្ជាក់របស់អ្នកនាំពាក្យរដ្ឋាភិបាលក្រុងប៉េកាំង Xu Hejian។
លោកបន្ថែមថា “ស្ថានភាពការពារ និងគ្រប់គ្រងនៅតែមានភាពស្មុគស្មាញ ដូច្នេះពួកយើងមិនអាចបន្ថយការការពារបន្តិចឡើយ”។
មន្ត្រីក្រុងបានរកឃើញថា ក្នុងចំណោមអ្នកឆ្លងសរុប ២៥៦នាក់ក្នុងក្រុងប៉េកាំង មាន ២៥៣ករណីជាប់ពាក់ព័ន្ធទៅនឹងផ្សារ Xinfadi ដែលជាផ្សារផ្គត់ផ្គង់ទំនិញស្ទើរ ៨០ភាគរយទៅដល់ក្រុងប៉េកាំង។
សូមបញ្ជាក់ថា អាជ្ញាធរក្រុងប៉េកាំងបានបង្កើនការធ្វើតេស្តរកវីរុសប្រចាំថ្ងៃ ទៅលើមនុស្សពី ១០០.០០០ ទៅ ៣០០.០០០នាក់ក្នុងមួយថ្ងៃ ចាប់ពីដើមខែមិថុនាមក។ រហូតមកដល់ពេលនេះ មនុស្សជិត ៣លាននាក់ត្រូវបានធ្វើតេស្តរួច។
ករណីឆ្លងជាច្រើនកើតទៅលើកម្មករដែលមានចំណូលទាបនៅក្នុងផ្សារ Xinfadi និងក្បែរភោជនីយដ្ឋាន។ ផ្សារនោះត្រូវបានអាជ្ញាធរធ្វើការបិទចោលចាប់តាំងពីថ្ងៃទី ១៣មកម្លេះ៕
អត្ថបទប្រែសម្រួលដោយ៖ សុភ័ក្រ
ប្រភព៖ AFP
