ប្រទេសជប៉ុនបានប្រកាសបោះបង់ចោល ការដាក់ពង្រាយប្រព័ន្ធការពារមីស៊ីល របស់អាមេរិច ដែលមានតម្លៃរាប់ពាន់លានដុល្លារ បន្ទាប់ពីសម្រចផ្អាកកម្មវិធីនោះ។ នេះបើតាមការបញ្ជាក់រដ្ឋាភិបាលជប៉ុននៅថ្ងៃព្រហស្បតិ៍នេះ។
មីស៊ីលរបស់ប្រព័ន្ធ Aegis Ashore បម្រុងនឹងធ្វើការដាក់ពង្រាយនៅក្នុងតំបន់ចំនួន ២ក្រោមកម្មវិធីដ៏ចម្រូងចម្រាស់ ប៉ុន្តែរដ្ឋាភិបាលប្តូរទិសដៅ ដោយសារតែមានសម្ពាធពីប្រជាជន ដោយពួកគេមានការព្រួយបារម្ពពីហានិភ័យ របស់ប្រព័ន្ធមីស៊ីលនៅទីធ្លាក្បែរផ្ទះពួកគេ។
“ក្រុមប្រឹក្សាសន្តិសុខជាតិបានពិភាក្សាគ្នាពីបញ្ហានេះ និងបានធ្វើការសម្រេចថា ការដាក់ពង្រាយប្រព័ន្ធ Aegis Ashore នៅក្នុងតំបន់ Akita និង Yamaguchi នឹងត្រូវដកចេញវិញ”។ នេះជាការបញ្ជាក់របស់រដ្ឋមន្ត្រីការពារជាតិជប៉ុន Taro Kono ប្រាប់កិច្ចប្រជុំនៃគណបក្សប្រជាធិបតេយ្យសេរី។
ដំបូងឡើយ រដ្ឋាភិបាលបានធ្វើការធានាថា មីស៊ីលនឹងមិនដាក់នៅតំបន់ក្បែរលំនៅដ្ឋានឡើយ កន្លែងដែលប្រព័ន្ធវាស្ថិតនៅ។
ប៉ុន្តែកាលពីសប្តាហ៍មុន នៅពេលមានការប្រកាសថា ការដាក់ពង្រាយប្រព័ន្ធមីស៊ីល ត្រូវបានផ្អាក រដ្ឋមន្ត្រីការពារជាតិខាងលើ បាននិយាយថាការសន្យាតម្រូវឲ្យមានការចំណាយច្រើន និងបង្កើនសមត្ថភាពកម្មវិធី ដែលត្រូវប្រើពេលច្រើន។
ប្រព័ន្ធ Aegis Ashore ដែលជប៉ុនទិញពីអាមេរិច ត្រូវបានអនុម័យកាលពីឆ្នាំ ២០១៧ ហើយជប៉ុនត្រូវចំណាយប្រាក់ ៤,២ពាន់លានដុល្លារក្នុងរយៈពេល ៣ទសវត្សន៍។
កិច្ចព្រមព្រៀងក្នុងការទិញប្រព័ន្ធការពារពីអាមេរិច ត្រូវបានគេមើលឃើញពីគោលបំណងពីរ ដោយជប៉ុនចង់ពង្រឹងសមត្ថភាពការពាររបស់ខ្លួន ក្រោយពេលកូរ៉េខាងជើងបានធ្វើការបាញ់មីស៊ីល និងជប៉ុនចង់បង្កើនទំនាក់ទំនងឲ្យស្និទ្ធនឹងអាមេរិចផងដែរ។
ប្រធានាធិបតីអាមេរិច ដូណាល់ ត្រាំ បានជំរុញឲ្យសម្តព័ន្ធមិត្តរបស់ខ្លួន ទិញផលិតផលពីអាមេរិចឲ្យបានច្រើន រួមមានឧបករណ៍យោធា។
កងកម្លាំងរបស់ជប៉ុនត្រូវបានដាក់កំហិតលើការការពារខ្លួន ហើយប្រទេសនេះពឹងផ្អែកខ្លាំង ទៅលើសហរដ្ឋអាមេរិចក្រោមកិច្ចព្រមព្រៀង សម្ព័ន្ធមិត្តសន្តិសុខទ្វេភាគី។
នាយករដ្ឋមន្ត្រីជប៉ុន Shinzo Abe បានថ្លែងកាលពីសប្តាហ៍មុនថា រដ្ឋាភិបាលប្តេជ្ញាចិត្តពិចារណាលើជម្រើសផ្សេងៗចំពោះប្រព័ន្ធ Aegis Ashore៕
អត្ថបទប្រែសម្រួលដោយ៖ សុភ័ក្រ
ប្រភព៖ AFP
