ធនាគារជាតិនៃកម្ពុជាបានឲ្យដឹងនៅការងារប្រចាំឆមាសទី១ និងទិសដៅការងារឆមាសទី២ ឆ្នាំ២០២០ ថាសេដ្ឋកិច្ចពិភពលោកកំពុងទទួលរងផលប៉ះពាល់ធ្ងន់ធ្ងរពីការរីករាលដាលជំងឺកូវីដ១៩ ហើយសេដ្ឋកិច្ចកម្ពុជាក៏បានទទួលឥទ្ធិពលអវិជ្ជមាននេះផងដែរ ជាពិសេសវិស័យទេសចរណ៍ កម្មន្តសាល និងសំណង់។ ប៉ុនតែរាជរដ្ឋាភិបាល បានដាក់ចេញនូវវិធានការប្រកបដោយប្រសិទ្ធភាពក្នុងការទប់ស្កាត់ការឆ្លងជំងឺកូវីដ១៩។ ជា មួយគ្នានេះ វិធានការគាំទ្រចំពោះវិស័យដែលប៉ះពាល់និងប្រជាពលរដ្ឋងាយរងគ្រោះ ត្រូវបានដាក់ជាបន្បន្ទាប់ ដែលបានកាត់បន្ថយផលប៉ះពាល់និងរក្សានិរន្តរភាពនៃអាជីវកម្មនិងជីវភាពរស់នៅរបស់ប្រជាពលរដ្ឋ។
ធនាគារជាតិនៃកម្ពុជាបានបន្តថាជញ្ជីងទូទាត់ត្រូវបានប៉ាន់ស្មានថាមានអតិរេក ដោយសារលំហូរចូលគណនីហិរញ្ញវត្ថុនៅតែអាចផាត់ទាត់ការកើនឡើងឱនភាពគណនីចរន្តដែលបណ្តាលមកពីការធ្លាក់ចុះចំណូលពីទេសចរ និងប្រាក់បង្វែររបស់ពលករក្រៅប្រទេស។ ទុនបម្រុងអន្តរជាតិរក្សាបានកម្រិតខ្ពស់ ដែលអាចធានាការនាំចូលទំនិញនិងសេវាសម្រាប់គ្រាបន្ទាប់ប្រមាណ ១០ខែ ខ្ពស់ជាងកម្រិតអប្បបរមាសម្រាប់ប្រទេសកំពុងអភិវឌ្ឍន៍គួរមាន ៣ខែ។
អតិផរណារួមមានកម្រិតទាបក្នុងអត្រា ២,៥% ដោយសារការធ្លាក់ថ្លៃក្រុមទំនិញនិងសេវាពាក់ព័ន្ធនឹងប្រេងឥន្ធនៈ ដែលបានបន្ថយសម្ពាធនៃកំណើនថ្លៃក្រុមម្ហូបអាហារ។ ជាមួយគ្នានេះ អត្រាប្តូរប្រាក់រៀលធៀបនឹងប្រាក់ដុល្លារអាមេរិកបានកើនឡើងបន្តិច។ រូបិយវត្ថុទូទៅ M2 មានកំណើន ១១,៥%មានកំណើនទាបជាងបើធៀបរយៈពេលដូចគ្នាកាលពីឆ្នាំមុន ដែលមានចំនួន ២៣,៤ភាគរយ។ កំណើនទាបនេះដោយសារកត្តាចម្បងបណ្តាលមកពីកំណើនទាបនៃប្រាក់បញ្ញើជារូបិយប័ណ្ណ ៧២ ភាគរយ ដោយសារការថយចុះសកម្មភាពសេដ្ឋកិច្ចក្នុងស្រុក ទោះបីជាប្រាក់បញ្ញើជារៀលបានបន្តកើនឡើងខ្ពស់ (៤១%) ក៏ដោយ។
ចំពោះការអនុវត្តគោលនយោបាយរូបិយវត្ថុ ធនាគារជាតិនៃកម្ពុជាបានទម្លាក់អត្រាប្រាក់បម្រុងកាតព្វកិច្ចលើប្រាក់បញ្ញើនិងកម្ចីអនិវាសជនមកត្រឹម ៧% ដែលអាចផ្តល់សន្ទនីយភាពបន្ថែមដល់គ្រឹះស្ថានធនាគារនិងហិរញ្ញវត្ថុ។
អត្រាការប្រាក់លើមូលបត្រអាចជួញដូរបាន NCD និងប្រតិបត្តិការផ្តល់សន្ទនីយភាពដោយមានការ LPCO ក៏ត្រូវបានបន្ទាបចាប់ពីខែមីនាមក ដើម្បីបង្កើនកម្រិតសន្ទនីយភាពក្នុងប្រព័ន្ធធនាគារ និងកាត់បន្ថយថ្លៃដើមលើប្រាក់កម្ចីជារៀល។
ការចេញផ្សាយមូលបត្រអាចជួញដូរបាន NCD និងប្រតិបត្តិការផ្តល់សន្ទនីយភាពដោយមានការ LPCOបានកើនឡើង ២,១ទ្រីលានរៀល និង ១៣,៤ប៊ីលានដុល្លាររៀងគ្នា ។ ចំណែកឯប្រតិបត្តិការ LPCO ត្រូវបានធ្វើឡើងចំនួន ១២លើក ដោយទំហំទឹកប្រាក់ដេញថ្លៃឈ្នះបានកើនឡើង ដល់ ៨ ទ្រីលានរៀល។
វិស័យធនាគារបន្តមានវឌ្ឍនភាពប្រកបដោយទំនុកចិត្ត និងបានរួមចំណែកយ៉ាងសកម្មគាំទ្រសកម្មភាពសេដ្ឋកិច្ច ដោយទ្រព្យសកម្មរបស់គ្រឹះស្ថានធនាគារនិងហិរញ្ញវត្ថុបានកើនឡើង ១៧,៤ភាគរយ , ឥណទានកើន១៩ភាគរយ និងប្រាក់បញ្ញើកើនឡើង ១២ភាគរយ។
វិធានការគាំទ្រក្នុងវិស័យធនាគារចំពោះផលប៉ះពាល់ពីជំងឺកូវីដ១៩ រួមមាន៖ i/- ការទម្លាក់អត្រាប្រាក់បម្រុងកាតព្វកិច្ចដែលគ្រឹះស្ថានធនាគារនិងហិរញ្ញវត្ថុត្រូវរក្សានៅធនាគារជាតិនៃកម្ពុជា ក្រោយទទួលបានប្រាក់បញ្ញើអតិថិជននិងកម្ចីពីបរទេស ii/- ការពន្យារការអនុវត្តការពង្រឹងទ្រនាប់ដើមទុនបន្ថែម និងការទទួលស្គាល់ប្រាក់ចំណេញក្នុងត្រីមាសក្នុងការគណនាដើមទុន និង iii/- ការផ្តល់កម្ចីក្នុងអត្រាការប្រាក់ទាបដល់គ្រឹះស្ថានធនាគារនិងហិរញ្ញវត្ថុ តាមរយៈប្រតិបត្តិការផ្តល់សន្ទនីយភាពដោយមានការធានា។
លើសពីនេះ ធនាគារជាតិនៃកម្ពុជាបានលើកកម្ពស់បរិយាបន្នហិរញ្ញវត្ថុ និងកិច្ចការពារអតិថិជន ដោយបានសហការជាមួយភាគីពាក់ព័ន្ធ ដើម្បីបញ្ជ្រាបការអប់រំផ្នែកហិរញ្ញវត្ថុដល់សាធារណជន ការផ្សព្វផ្សាយពីវិស័យមីក្រូហិរញ្ញវត្ថុនៅកម្ពុជានៅតាមមូលដ្ឋាន ការដោះស្រាយបណ្តឹងអតិថិជន៕ ដោយ ៖ CEN
