ខេត្តស្វាយរៀង៖ លោក សុខ រស់ អភិបាលរងខេត្តស្វាយរៀង ព្រឹកថ្ងៃទី១០ ខែកក្កដា ឆ្នាំ២០២០នេះ បានអញ្ជើញជាអធិបតី ក្នុងពិធីបើកកិច្ចប្រជុំផ្សព្វផ្សាយសារាចរណែនាំលេខ០០៤សហវ ចុះថ្ងៃទី២៥ ខែមិថុនា ឆ្នាំ២០២០ ស្តីពីការរៀបចំផែនការយុទ្ធសាស្ត្រ ២០២១-២០២៣ និងសារាចរណែនាំលេខ ០០៥ សហវ ស្តីពីនីតិវិធីបច្ចេកទេសគ្រោងថវិកា ឆ្នាំ២០២១ ជូនរដ្ឋបាលខេត្ត ក្រុង ស្រុក និងឃុំ សង្កាត់ ទាំងអស់ក្នុងខេត្តស្វាយរៀង ដែលពិធីនេះ បានប្រព្រឹត្តទៅនៅសាលប្រជុំសាលាខេត្តស្វាយរៀង។
លោក អភិបាលរងខេត្តស្វាយរៀង បានមានប្រសាសន៍ឲ្យដឹងថា ផែនការយុទ្ធសាស្ត្រថវិកា គឺជាមគ្គុទ្ទេសក៍ ហើយក៏ជាបច្ចេកទេសដ៏សំខាន់ សម្រាប់ណែនាំដល់រដ្ឋបាលនីមួយៗ ក្នុងការរៀបចំផែនការយុទ្ធសាស្ត្រ រយៈពេលបីឆ្នាំរំកិល (២០២១.២០២៣) ដោយផ្សារភ្ជាប់អាទិភាពគោលនយោបាយ របស់រដ្ឋបាលថ្នាក់ក្រោមជាតិ ទៅនឹងគោលដៅតាមវិស័យ និងផែនការអភិវឌ្ឍន៍រយៈពេល៥ឆ្នាំ ព្រមទាំងកម្មវិធីវិនិយោគបីឆ្នាំរំកិលរបស់រដ្ឋបាលនីមួយៗ ដើម្បីបង្កើនប្រសិទ្ធភាព នៃការគ្រប់និងប្រើប្រាស់ថវិកាឲ្យចំគោលដៅ និងបម្រើឲ្យសកម្មភាពអាទិភាពពិតប្រាកដ របស់រដ្ឋបាលថ្នាក់ក្រោមជាតិ។ ផែនការយុទ្ធសាស្ត្រថវិកា និងក្លាយជាផែនការយុទ្ធសាស្ត្ររួម តាមរយៈការធ្វើសមាហរណកម្មផែនការ របស់រដ្ឋបាលថ្នាក់ក្រោមជាតិ និងការតម្រឹមជាមួយនឹងអាទិភាពតាមវិស័យ នៃក្រសួងស្ថាប័នថ្នាក់ជាតិ (មន្ទីរជំនាញរាជធានីខេត្ត) ដើម្បីប្រើប្រាស់ធនធាន ដែលមានកម្រិតក្នុងការសម្រេចឲ្យបានសមិទ្ធផលជាអតិបរមា។ ដូច្នេះផែនការយុទ្ធសាស្ត្រថវិកាត្រូវបានឆ្លុះបញ្ចាំងឲ្យឃើញច្បាស់លាស់ អំពីការកែទម្រង់ប្រព័ន្ធថវិការដ្ឋបាលថ្នាក់ក្រោមជាតិ ឆ្នាំ២០១៩.២០២៥ ទៅតាមរចនាសម្ព័ន្ធកម្មវិធីនិងគោលនយោបាយ ដែលនឹងរួមចំណែកសម្រេចអាទិភាព គោលនយោបាយតាមវិស័យ របស់រដ្ឋបាលនីមួយៗ។
លោកបានមានប្រសាសន៍បន្ថែមទៀតថា ដោយឡែកគម្រោងថវិការបស់រដ្ឋបាល ថ្នាក់ក្រោមជាតិ សម្រាប់ការគ្រប់គ្រងឆ្នាំ២០២១ គឺស្ថិតក្នុងដំណាក់កាលមួយ ដ៏មានសារសំខាន់បំផុត សម្រាប់បញ្ជ្រាបជំរុញ និងពង្រីកការអនុវត្តសកម្មភាពកែទម្រង់ ការគ្រប់គ្រងហិរញ្ញវត្ថុសាធារណៈឲ្យដល់បណ្ដាររដ្ឋបាលថ្នាក់ក្រោមជាតិទាំងអស់ ដែលបោះទីតាំងនៅមូលដ្ឋាន និងជាខ្សែបណ្ដោយថ្នាក់ជាតិ។
លោកបានបន្តថា ការផ្សព្វផ្សាយសារាចរនេះ និងផ្ដល់ឱកាស និងពេលវេលាគ្រប់គ្រាន់ សម្រាប់ឈ្វេងយល់ និងទទួលនូវពុទ្ធិបន្ថែម លើការងារការរៀបចំផែនការយុទ្ធសាស្ត្រថវិការាជធានី ខេត្ត និងនីតិវិធីបច្ចេកទេស នៃការៀបចំគម្រោងថវិកាឆ្នាំ២០២១។ ជាពិសេសយើងទទួលបានគម្រោងចំណូលចំណាយថវិកាឆ្នាំ២០២១ កាន់តែសុក្រិតគ្រប់ជ្រុងជ្រោយ និងមានលក្ខណៈប្រាកដនិយមផ្សារភ្ជាប់ទៅនឹងគោលបំណង គោលនយោបាយរបស់រាជរដ្ឋាភិបាល ដើម្បីទទួលបានលទ្ធផលជោគជ័យ តាមការរំពឹងទុក៕ដោយ៖ វ៉ៃកូ
