ខេត្តស្វាយរៀង ៖ បុរសជាជាងសំណង់ម្នាក់ បានស្លាប់ភ្លាមៗនៅកន្លែងកើតហេតុ ដោយសារគ្រោះថ្នាក់ចរាចរណ៍ រវាងម៉ូតូបុកម៉ូតូសណ្តោងរ៉ឺម៉ក និងរថយន្តកុងតឺន័រ ក្នុងទិសដៅស្របទិសគ្នា ចន្លោះគីឡូម៉ែត្រ ១១៧.១១៨នៅត្រង់ចំណុចភូមិថ្ម ស ឃុំស្វាយជ្រំ ស្រុកស្វាយជ្រំ ខេត្ត ស្វាយរៀង បានកើតឡើងកាលពីវេលាម៉ោង១៩និង៣០នាទីយប់ ថ្ងៃទី១៥ ខែកក្កដា ឆ្នាំ២០២០។
សមត្ថកិច្ចបានឱ្យដឹងថា ម៉ូតូជនរងគ្រោះម៉ាក C125 ស៊េរី2018 ពណ៌ខ្មៅពាក់ផ្លាកលេខ ស្វាយរៀង 1I .2135 បើកបរដោយឈ្មោះ ឃួន ចាន់រ៉ា ភេទប្រុស អាយុ 42 ឆ្នាំ មុខរបរកម្មករ នៅភូមិចំបក់កោង ឃុំតាសួស ស្រុកស្វាយជ្រំ ស្លាប់នៅកន្លែងកើតហេតុ។
ប្រភពដដែលបានបន្តថា ចំណែករថយន្តបង្កម៉ាក ហ៊ីយ៉ាន់ដាយ ពណ៌ស ផ្លាកលេខ ភ្នំពេញ 3E 9822 ផ្លាកលេខរ៉ឺម៉ករថយន្ត 4A 7659 បើកបរដោយឈ្មោះ ប៉ែន រ៉ុម ភេទប្រុស អាយុ 62 ឆ្នាំ រស់នៅភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ គ្មានរបួស ។
បច្ចុប្បន្នអ្នកបើកបរថយន្តនឹងមធ្យោបាយរក្សាទុក នៅអធិការដ្ឋាននគរបាលស្រុកស្វាយជ្រំ ដើម្បីចាត់ការបន្តទៅតាផ្លូវច្បាប់ ។ ហើយ មូលហេតុជនរងគ្រោះបើកម៉ូតូជែង ក្នុងស្ថានភាពគ្រោះថ្នាក់ ទៅបុកកន្ទុយរ៉ឺម៉កម៉ូតូដឹកឪឡឹក ហើយក៏បានដួលនៅកណ្តាលថ្នល់ ត្រូវរថយន្តបុកកិនចំក្បាលបណ្តាលឲ្យស្លាប់ រីឯម៉ូតូរ៉ឺម៉ករត់គេចពីកន្លែងកើតហេតុ៕ដោយ៖ វ៉ៃកូ
