បាត់ដំបងៈកម្លាំងប៉ូលិសការិយាល័យប្រឆាំងគ្រឿងញៀនខេត្តបាត់ដំបង បានចាប់បញ្ជួនបុរស២នាក់ស្ត្រីម្នាក់ជួញដូររក្សាទុកនិងថ្នាំម៉ាទឹកកក១១ថង់ម៉ូតូមួយគ្រឿងជញ្ជីងថ្លឹងថ្នាំញៀនមួយគ្រឿង សម្ភារៈពាក់ព័ន្ធមួយចំនួនជាបន្តបន្ទាប់ កសាងសំណុំរឿងបញ្ជួនទៅតុលាការ ដើម្បីចាត់ការទៅតាមផ្លូវច្បាប់នៅរសៀលថ្ងៃទី១៨ខែកក្កដាឆ្នាំ២០២០។
ហេតុការណ៍ចាប់ឃាត់ខ្លួនជនសង្ស័យ៣នាក់នេះ បានធ្វើឡើងកាលពីម៉ោង១៧និង៣០នាទីថ្ងៃទី១៧និងព្រឹកថ្ងៃទី១៨ខែកក្កដាឆ្នាំ២០២០នៅចំណុចក្រុមទី០៦ភូមិកំពង់ឆ្លងឃុំវត្តតាមឹមស្រុកសង្កែខេត្តបាត់ដំបងនិងបន្តទៅភូមិឈើទាលឃុំឈើទាលស្រុកបាណន់ខេត្តបាត់ដំបង។
លោកសុខ និមលនាយការិយាល័យប្រឆាំងបទល្មើសគ្រឿងញៀនខេត្តបាត់ដំបង បានឲ្យដឹងថាជនសង្ស័យ៣នាក់ដែលចាប់ឃាត់ខ្លួនឈ្មោះយ៉ាយ មករាភេទប្រុសអាយុ២៦ឆ្នាំរស់នៅភូមិភូមិកំពង់ឆ្លងឃុំវត្តតាមឹមស្រុកសង្កែខេត្តបាត់ដំបងនិងឈ្មោះហួន ហ៊ានភេទស្រីអាយុ១៩ឆ្នាំរស់នៅភូមិគីឡូ១១ឃុំសិរីមានជ័យស្រុកសំពៅលួនខេត្តបាត់ដំបង។ក្នុងប្រតិបត្តការនេះ កម្លាំងដកហូតបានថ្នាំម៉ាទឹកកក០២ថង់ ម៉ូតូមួយគ្រឿង សម្ភារៈប្រើប្រាស់ថ្នាំញៀនមួយចំនួនទៀតហើយចាប់ឃាត់ខ្លួនកាលពីម៉ោង១៧និង៣០នាទីថ្ងៃទី១៧ខែកក្កដាឆ្នាំ២០២០នៅចំណុចក្រុមទី០៦ភូមិកំពង់ឆ្លងឃុំវត្តតាមឹមស្រុកសង្កែខេត្តបាត់ដំបង។ក្រោយពីសាកសួរចម្លើយឈ្មោះយ៉ាយ មករា កម្លាំងបានបន្តចុះទៅចាប់ឈ្មោះរ៉ាត់ សារួតហៅព្រីងភេទប្រុសអាយុ២៦ឆ្នាំរស់នៅភួមិឈើទាលឃុំឈើទាលស្រុកបាណន់ខេត្តបាត់ដំបងតាមការអនុញ្ញាតពីលោកនួន សានព្រះរាជអាជ្ញាអមសាលាដំបូងខេត្តបាត់ដំបង។ក្នុងប្រតិបត្តការនេះ កម្លាំងដកហូតបានថ្នាំម៉ាទឹកកក០៩ថង់ ជញ្ជីងថ្លឹងថ្នាំញៀនមួយគ្រឿងនិងសម្ភារៈប្រើប្រាស់ថ្នាំញៀនមួយចំនួនទៀតហើយចាប់ឃាត់ខ្លួនកាលពីម៉ោង០៦និង៣០នាទីថ្ងៃទី១៨ខែកក្កដាឆ្នាំ២០២០នៅចំណុចភូមិឈើទាលឃុំឈើទាលស្រុកបាណន់ខេត្តបាត់ដំបង។
លោកសុខ និមលបានបញ្ជាក់ថាកម្លាំងបានសហការជាមួយកម្លាំងប៉ូលិសស្រុក ចុះបង្ក្រាបបានករណីរនេះហើយចាប់ឃាត់ខ្លួនជនសង្ស័យ៣នាក់និងវត្ថុតាងបានភ្លាមៗជាក់ស្ដែងតែម្ដង។បច្ចុប្បន្ននេះ កម្លាំងបានកសាងសំណុំរឿងបញ្ជូនជនសង្ស័យនិងវត្ថុតាងទៅតុលាការ ដើម្បីចាត់ការទៅតាមផ្លូវច្បាប់នៅរសៀលថ្ងៃទី១៨ខែកក្កដាឆ្នាំ២០២០ហើយ៕ ដោយៈអ៊ុងសារុំ
