ភ្នំពេញ៖ ចំនួននៃអ្នកប្រើប្រាស់ទូរស័ព្ទអចល័តនិងអ៊ីនធឺណិតអចល័ត មានការកើនឡើងខណៈពេលដែលការប្រើប្រាស់ទូរស័ព្ទចល័ត និងអ៊ីនធឺណេតចល័ត មានការធ្លាក់ចុះ។
លោក អឹម វុត្ថា អ្នកនាំពាក្យនិយ័តករទូរគមនាគមន៍កម្ពុជា បានឲ្យដឹងថាក្នុងឆមាសទី១ ឆ្នាំ២០២០នេះការប្រើប្រាស់ទូរស័ព្ទអចល័ត និងអ៊ីនធឺណិតអចល័តដែលមានការកើនឡើងនេះ ដោយសារតែការចុះបញ្ជីសហគ្រាសធុនតូច និងមធ្យមមានការកើនឡើង ហើយពួកគាត់ត្រូវការប្រើទូរស័ព្ទ និងអ៊ីនធឺណេតនេះជាប្រចាំ និងចាត់ទុកថាមានគុណភាពសម្រាប់ដំណើរការអាជីវកម្មរបស់គាត់។
លោកបានបញ្ជាក់ថា៖ កត្ដាកើនឡើងនៃការប្រើប្រាស់ទូរស័ព្ទអចល័ត និងអ៊ីនធឺណិតអចល័តនេះ ដោយសារតែក្នុងអំឡុងស្ថានភាពកូវីដ-១៩ បានធ្វើឱ្យសិស្សានុសិស្សមិនបានទៅសិក្សានៅសាលារៀន ហើយងាកមកសិក្សាតាមប្រព័ន្ធអនឡាញនៅផ្ទះវិញ និងមនុស្សមួយចំនួនក៏ត្រូវការធ្វើការតាមអនឡាញនៅផ្ទះដែរ។
លោកថា៖«កំណើននៃការធ្វើអាជីវកម្ម តាមអនឡាញក្នុងអំឡុងពេលបច្ចុប្បន្នក៏មានការកើនឡើង ដែលត្រូវការអ៊ីនធឺណិតអចល័តនេះ ខ្លាំងសម្រាប់ផ្ដល់គុណភាពល្អដល់ពួកគាត់ក្នុងការឡាយផ្ទាល់លក់ផលិតផល ឬក៏ផ្ដល់រូបភាពបានល្អជាងការប្រើប្រាស់អ៊ីនធឺណេតចល័ត»។ លោកលើកឧទាហរណ៍ថា៖«ទន្ទឹមនេះ អ៊ីនធឺណេតអចល័តនេះ ភាគច្រើនប្រើប្រាស់ខ្សែកាបអុបទិច ដែលមានល្បឿនលឿន និងសេវាល្អធ្វើឱ្យបងប្អូនប្រជាពលរដ្ឋ អាជីវករ ពាណិជ្ជករ ឬអ្នកប្រកបអាជីវកម្មផ្សេងៗត្រូវការសេវានេះ»។
គិតត្រឹមចុងខែឧសភា ឆ្នាំ២០២០ ឆ្នាំ២០២០នេះ អ្នកជួលជាវសេវាទូរស័ព្ទចល័ត (ប្រតិបត្តិករចំនួន៦) មានសរុប ២០.៤៨១.០៥៤នាក់ (ឬស៊ីមកាត) ត្រូវនឹង ១២៤.០៩ភាគរយ នៃចំនួនប្រជាជនសរុប។ ចំនួននេះ ថយចុះ -០,០៨ភាគរយ បើធៀបនឹង ៥ខែ ឆមាសទី១ ឆ្នាំ២០១៩។ នេះបើយោងតាមស្ថិតិពីក្រសួងប្រៃសណីយ៍ និងទូរគមនាគមន៍។
អ្នកជួលជាវសេវាទូរស័ព្ទអចល័ត មានខ្សែនិងគ្មានខ្សែ (ប្រតិបត្តិករចំនួន ៦) សរុប ៥២.៤៨០ នាក់ ត្រូវនឹង ០,៣២ភាគរយ នៃចំនួនប្រជាជនសរុប ថយចុះ -២១,៦២ភាគរយ បើធៀបនឹង ៥ខែឆ្នាំ២០១៩។ អ្នកជួលជាវសេវាអ៊ីនធឺណិតចល័ត (ប្រតិបត្តិករចំនួន ៧) សរុប ១៤.៨៦៣.៤៣៥ នាក់ (ឬស៊ីមកាត) ត្រូវនឹង ៩០,០៥ភាគរយ នៃចំនួនប្រជាជនសរុប ថយចុះ -២,៣៦ភាគរយ បើធៀបនឹង ៥ខែឆ្នាំ២០១៩។
របាយការណ៍បន្តថា ចំពោះអ្នកជួលជាវសេវាអ៊ីនធឺណេតអចល័ត (ប្រតិបត្តិករចំនួន ៣៧) សរុប ២៤៩.១៣២នាក់ ត្រូវនឹងចំនួន ១,៥១ភាគរយ នៃចំនួនប្រជាជនសរុបកើនឡើង៣៣,០៧ភាគរយ បើធៀបនឹង៥ខែឆ្នាំ២០១៩។ ដោយឡែកចំនួនអ្នកប្រើប្រាស់គណនីហ្វេសបុកនៅកម្ពុជាមានចំនួនសរុប ១០.៩៥០.០០០ គណនី។
ជាមួយគ្នានេះ សម្រាប់ការគ្របដណ្តប់សេវាតាមបច្ចេកវិទ្យា គិតត្រឹមត្រីមាសទី១ ឆ្នាំ២០២០នេះ រួមមាន បច្ចេកវិទ្យា 2G មាន ៩៩,២ភាគរយ នៃចំនួនប្រជាជនសរុប និងមានតំបន់គ្របដណ្តប់សេវា ៨៥,៧ភាគរយ នៃផ្ទៃប្រទេសកម្ពុជា។ បច្ចេកវិទ្យា 3G មាន ៨៥,១ភាគរយ នៃចំនួនប្រជាជនសរុប និងមានតំបន់គ្របដណ្តប់សេវា ៦០ភាគរយ នៃផ្ទៃប្រទេសកម្ពុជា។ បច្ចេកវិទ្យា 4G-LTE មាន ៨០,៣ភាគរយ នៃចំនួនប្រជាជនសរុប និងមានតំបន់គ្របដណ្តប់សេវា ៥២,៧ភាគរយ នៃផ្ទៃប្រទេសកម្ពុជា។ សម្រាប់បណ្តាញខ្សែកាប្លិ៍អុបទិកក្នុងប្រទេស (ប្រតិបត្តិករចំនួន ៣ មានសហគ្រាសរដ្ឋ ១ គឺទូរគមនាគមន៍កម្ពុជា) សរុបប្រវែង ៤៤.២៥១,៦គីឡូម៉ែត្រ ៕ ដោយ៖CEN
