ភ្នំពេញ៖ កម្ពុជា មានរោងម៉ាស៊ីនកិនស្រូវ ដែលជាសមាជិកសហព័ន្ធស្រូវអង្ករកម្ពុជា ចំនួនជិត៨០ ដែលបានបំពាក់គ្រឿងបច្ចេកវិទ្យាទំនើបៗដូចជា៖ ម៉ាស៊ីនរើសពណ៌ម៉ាស៊ីនប៉ូលា និងម៉ាស៊ីនវេចខ្ចប់ បង្កើតបានបទដ្ឋានស្តង់ដា និងគុណភាព ដូចជា GMP HACCP និង ISO ជាដើម ហើយដែលមានសមត្ថភាពកិន-កែច្នៃអង្ករ បានជាង ២០,០០០តោន ក្នុងមួយថ្ងៃ។
បើតាមសហព័ន្ធស្រូវអង្ករកម្ពុជា បានឱ្យដឹងថា ក្នុងចំណោមរោងម៉ាស៊ីនកិនស្រូវទាំងនោះ មានរោងម៉ាស៊ីនកិនស្រូវចំនួន ៤៤ ត្រូវបានវាយតម្លៃថា ជារោងម៉ាស៊ីនកិនស្រូវ ដែលមានស្តង់ដារខ្ពស់ សម្រាប់ការវេចខ្ចប់ និងនាំចេញទៅប្រទេសចិន ។
បច្ចុប្បន្នសមត្ថភាពសម្ងួតស្រូវ របស់រោងម៉ាស៊ីនកិនស្រូវ មានការកើនឡើងជាបន្តបន្ទាប់ ដោយមានការផ្លាស់ប្តូរទម្លាប់សម្ងួតស្រូវ ដោយពឹងផ្អែកពន្លឺព្រះអាទិត្យទៅជាឡសម្ងួតអគ្គិសនី ឬដុតអង្កាមវិញ និងមានការកើនឡើងដល់៤០.០០០តោន ក្នុងមួយថ្ងៃ ឬ ១,២លានតោនស្រូវ ក្នុងមួយខែ និងមានសមត្ថភាពស្តុក ស្រូវ ក្នុងមួយវគ្គបានជាង ១,៦លានតោន។
សហព័ន្ធស្រូវអង្ករកម្ពុជា បានបង្ហាញនូវការគាំទ្រចំពោះគោលនយោបាយរបស់រាជរដ្ឋាភិបាល ដែលដឹកនាំដោយសម្តេចតេជោហ៊ុនសែន នាយករដ្ឋមន្ត្រីកម្ពុជា ដែលបានយកចិត្តទុកដាក់ជាអាទិភាព លើវិស័យស្រូវអង្ករ និងបានកសាងនូវមូលដ្ឋានយ៉ាងរឹងមាំ ពីប្រទេសដែលខ្វះខាតស្បៀង ទៅជាប្រទេសដែលមានអតិរេកផ្នែកស្បៀងអាហារ ជាពិសេសអង្ករសម្រាប់ការនាំចេញតែម្តង។
នៅឆ្នាំ២០០៩ កម្ពុជា បានចាប់ផ្តើមនាំចេញអង្ករទៅកាន់ទីផ្សារអន្តរជាតិ បានត្រឹមតែ ១២.៦១៣តោន ហើយក្នុងឆ្នាំ២០១៩ បានឈានឡើង ដល់៦២០,១០៦តោន និងអាចឈានដល់យ៉ាងតិច៨០០.០០០តោន ក្នុងឆ្នាំ២០២០នេះ។ កំណើននេះនឹងជំរុញឱ្យ ការនាំចេញរបស់កម្ពុជា ឈានទៅដល់១លានតោន ក្នុងឆ្នាំ២០២១ប្រកបដោយចីរភាពនៃកំណើនយ៉ាងតិច ៥% ក្នុងមួយឆ្នាំ។
គួរបញ្ជាក់ថា ក្រោយការដាក់ចេញគោលនយោបាយស្រូវអង្ករ ក្រុមហ៊ុននាំចេញ និងរោងម៉ាស៊ីនកិនស្រូវរកម្ពុជា បានទទួលក្តីរីករាយពីគោលនយោបាយនេះ ដូចជា៖ វិស័យស្រូវអង្ករ ត្រូវបានលើកលែងពន្ធលើប្រាក់ចំណេញប្រចាំឆ្នាំ។ ការលើកលែងកម្រៃសេវាទាំងឡាយ លើការនាំចេញពីក្រសួងពាណិជ្ជកម្ម និងអគ្គនាយកដ្ឋានគយ និងរដ្ឋាករ។ ទទួលបាននូវការអនុគ្រោះថ្លៃពិសេស សម្រាប់ការនាំចេញអង្ករលើសេវាប្រើប្រាស់ នៅកំពង់ផែក្រុងព្រះសីហនុ និងកំពង់ផែភ្នំពេញ។
ការទទួលបានអត្រាពិសេស លើកម្ចីសម្រាប់ទិញស្រូវ ពីធនាគារអភិវឌ្ឍន៍ជនបទ និងកសិកម្ម ដែលជំរុញឱ្យធនាគារឯកជនផ្សេងទៀត ទម្លាក់ការប្រាក់ពីជាង១២% មកដល់ក្រោម ៨%ក្នុងមួយឆ្នាំ។
ឈរលើមូលដ្ឋានផ្ដល់ឱ្យវិស័យឯកជន ពីរាជរដ្ឋាភិបាល ដែលជាទុនវិនិយោគ សម្រាប់ពង្រឹង និងពង្រីកមូលដ្ឋានផលិតកម្ម របស់រោងម៉ាស៊ីនកិនស្រូវ និងអ្នកនាំចេញ និងឈរលើមូលដ្ឋាននៃភាពបន្ស៊ាំ នៃការប្រែប្រួលទីផ្សារក្នុងរយៈពេល៥ឆ្នាំ ចុងក្រោយនេះ កម្ពុជាបានទទួលនូវភាពជោគជ័យ ប្រកបដោយចីរភាពរឹងមាំ ក្នុងវិស័យស្រូវអង្ករ សម្រាប់ការនាំចេញទៅកាន់ទីផ្សារ អន្តរជាតិចាប់ពីឆ្នាំ២០២០នេះតទៅ បើទោះបីជាស្ថានភាពជំងឺរាតត្បាតកូវីដ១៩ នៅតែបន្តក៏ដោយ៕
ដោយ៖CEN
