ប៉ារីស, បារាំង: Neymar da Silva Santos Junior តាមធម្មតាត្រូវបានអ្នកគាំទ្រទូទាំងសាកលលោកស្គាល់ឈ្មោះខ្លីគឺ Neymar កើតនៅទីក្រុង Mogi das Cruzes រដ្ឋ Sao Paulo ប្រទេស ប្រេស៊ីល នៅទីថ្ងៃ៥ ខែកុម្ភ: ឆ្នាំ១៩៩២ បច្ចុប្បន្នវ័យ២៨ឆ្នាំ គឺជាតារាបាល់ទាត់កំពុងប្រកបអាជីពនៅក្លឹបអ្នកមានជាន់ថ្មី ក្នុងប្រទេស បារាំង Paris Saint Germainនិងក្រុមជម្រើសជាតិប្រេស៊ីល។ គាត់ត្រូវបានគេចាត់ទុកជាកំពូលខ្សែប្រយុទ្ធម្នាក់ក្នុងចំណោមខ្សែប្រយុទ្ធលំដាប់ពិភពលោក។
Neymar បានផ្ញើសារដ៏ច្បាស់លាស់បំផុតទៅកាន់អតីតក្លឹបចាស់របស់គាត់ Fc Barcelona ថា “អំឡុងពេលនេះខ្ញុំគឺជាកីឡាករ PSG ខ្ញុំមិនបានគិតចង់ទៅណាទេ ក្នុងខួរក្បាលរបស់ខ្ញុំគឺនៅជាកីឡាករ PSG ខ្ញុំគិតតែមួយគត់គឺត្រូវជួយ PSG លើកពានឆែមពានស៍ លីគ ឆ្នាំ ២០២០នេះឲ្យបាន រឿងអ្វីទៀតខ្ញុំមិនខ្វល់ទេ”។
Neymar កាលពីឆ្នាំ២០១៧បានចាកចេញពីក្លឹបនៅតំបន់ កាតាឡាន់ ដែលមានមូលដ្ឋាននៅ Nou Camp Fc Barcelona ទៅកាន់ក្លឹបថ្មី Paris Saint Germain ក្នុងតម្លៃខ្លួនបំបែកឯតទគ្គកម្មពិភពលោក១៩៨លានផោន ស្មើប្រមាណ២៧០លានដុល្លារក្នុងអំឡុងពេលនោះ ហើយវានៅតែជាកំណត់ត្រាមួយដែលមិនទាន់មានកីឡាករថ្មីណាមួយបំបែកបាននៅឡើយទេ។
តារាលេចធ្លោមួយចំនួនរបស់ក្លឹប FC Barcelona រួមមាន Lionel Messi និង Gerard Pique បានទទូចសុំឲ្យ ប្រធានក្លឹបទិញ Neymar ត្រឡប់មកវិញ មិនតែប៉ុណ្ណោះពួកគេថែមទាំងបាននិយាយទៀតថា ពួកគេសុខចិត្តឲ្យក្លឹបកាត់ប្រាក់ខែដើម្បីធ្វើយ៉ាងណាទិញ Neymar មករួមក្រុមសាជាថ្មី។
ទោះជាយ៉ាងនេះក្តី PSG បានប្រកាន់ជំហរដ៏រឹងមាំបំផុតថា ស្ថិតក្នុងតម្លៃណាក៏ដោយគឺពួកយើងមិនលក់ Neymar ដាច់ខាត ព្រោះពួកយើងចង់បង្កើតប្រវត្តិសាស្ត្រថ្មី គឺត្រូវលើកពាន ឆែមពានស៍លីគ។
នៅចុងក្រោយនេះ Neymar បានបញ្ជាក់ពីជំហររបស់គាត់ហើយថានឹងមិនចេញពី PSG ដាច់ខាត
និងបានប្រាប់បន្ថែមទៀតថា គាត់កំពុងមានទម្រង់លេងល្អ ដែលនេះដោយសារមានជំនួយពីមិត្តរួមក្រុម ហើយអ្វីដែលពិសេសបំផុតនោះគឺបានទទួលការសាទរច្រើនពីអ្នកគាំទ្រដែលនៅពីក្រោយខ្នង៕ ដោយ៖ វិច្ឆិកា
