ពលរដ្ឋក្រុងបេរ៉ុត (Beirut) បានសម្តែងការខឹងសម្បារយ៉ាងខ្លាំងចំពោះរដ្ឋាភិបាលលីបង់ និងទាមទារឲ្យមានការផ្តល់ចម្លើយ បន្ទាប់ពីមានសោកនាដកម្មផ្ទះដ៏កក្រើកកាលពីថ្ងៃអង្គារកន្លងទៅនេះ។
ប្រធានាធិបតីលីបង់ Michel Aoun បាននិយាយថា ការផ្ទុះនោះបង្កឡើងដោយសារធាតុអាម៉ូញ៉ូមនីត្រាតចំនួន ២.៧៥០តោន ដែលត្រូវគេរក្សាទុកដោយគ្មានសុវត្ថិភាពនៅក្នុងឃ្លាំងមួយ នៅកំពង់ផែ។
ប្រជាពលរដ្ឋជាច្រើនបានចោទប្រកាន់អាជ្ញាធរពីបទពុករលួយ ធ្វេសប្រហែល និងការគ្រប់គ្រងមិនបានល្អ។
ការផ្ទុះដែលមានកម្លាំងរញ្ជួយ ៣,៥ រិចទ័រ បានឆក់យកជីវិតមនុស្សចំនួន ១៣៥នាក់ និងធ្វើឲ្យរងរបួសជាង ៥.០០០នាក់។ ចំនួនអ្នកស្លាប់អាចនឹងកើនឡើងបន្ថែមទៀត ខណៈដែលក្រុមជួយសង្គ្រោះកំពុងរុករកនៅក្រោមគំនរបាក់បែក។
ពលរដ្ឋលីបង់ម្នាក់ រស់នៅក្នុងទីក្រុងរងគ្រោះ Chadia Elmeouchi Noun បាននិយាយថា “ខ្ញុំបានដឹងគ្រប់ពេលវេលាថា ពួកយើងត្រូវបានដឹកនាំដោយមនុស្សគ្មានសមត្ថភាព រដ្ឋាភិបាលអសមត្ថភាព… ប៉ុន្តែខ្ញុំសូមប្រាប់អ្នកនូវអ្វីមួយ- អ្វីដែលពួកគេបានធ្វើនៅពេលនេះគឺជាឧក្រិដ្ឋកម្ម”។
កាលពីថ្ងៃពុធម្សិលមិញនេះ រដ្ឋាភិបាលបានប្រកាសថា មន្ត្រីគ្រប់គ្រងកំពង់ផែបេរ៉ុតមួយចំនួនត្រូវបានចាប់ឃុំខ្លួននៅផ្ទះ ដើម្បីរកចាំការស៊ើបអង្កេតលើករណីផ្ទះនោះ។
ក្រុមប្រឹក្សាការពារជាតិលីបង់ បានបញ្ជាក់ថា អ្នកដែលមានទំនួសខុសត្រូវលើករណីនោះនឹងប្រឈមនឹងទណ្ឌកម្មដ៏ធ្ងន់បំផុត។
នៅពេលជាមួយគ្នានេះដែរ អង្គការលើកលែងទោសអន្តរជាតិ និងអង្គការឃ្លាំមើលសិទ្ធិមនុស្ស បានស្នើឲ្យមានការស៊ើបអង្កេតឯករាជ្យលើករណីនោះ។ នៅក្នុងសេចក្តីប្រកាស អង្គការឃ្លាំមើលសិទ្ធិមនុស្សបាននិយាយថា ខ្លួនពិតជាមានក្តីកង្វល់ខ្លាំងអំពីសមត្ថភាពរបស់ប្រព័ន្ធយុត្តិធម៌លីបង់ ក្នុងការធ្វើការស៊ើបអង្កេតដែលមានតម្លាភាព និងគួរឲ្យទុកចិត្តបាន៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
