ប្រធានាធិបតីអាមេរិច បានចេញបទបញ្ជាប្រតិបត្តិ កាលពីថ្ងៃព្រហស្បតិ៍ម្សិលមិញ ដើម្បីហាមឃាត់ការធ្វើជំនួយរបស់អាមេរិចជាមួយនឹងក្រុមហ៊ុន ByteDance ដែលជាម្ចាស់របស់កម្មវិធី TikTok និងក្រុមហ៊ុន Tencent ដែលម្ចាស់របស់កម្មវិធី WeChat។ ការហាមឃាត់នោះនឹងកើតឡើងក្នុងរយៈពេល ៤៥ថ្ងៃទៀត។
ការដាក់បញ្ជាដើម្បីហាមឃាត់កម្មវិធីដ៏ល្បីរបស់ចិននេះ កើតឡើងក្រោយពេលរដ្ឋបាលរបស់ លោកត្រាំ បាននិយាយនៅសប្តាហ៍នេះថា ខ្លួនកំពុងខិតខំប្រឹងប្រែងដើម្បីលុបបំបាត់កម្មវិធី ដែលមិនគួរទុកចិត្តរបស់ចិន ពីបណ្តាញឌីជីថលរបស់អាមេរិច និងបានហៅកម្មវិធីរបស់ចិន ដូចជា TikTok និង WeChat ថាជាការគំរាមកំហែងដ៏ខ្លាំង។
លោកត្រាំ បាននិយាយនៅក្នុងបទបញ្ជាដូច្នេះថា កម្មវិធី TikTok ប្រហែលត្រូវគេប្រើប្រាស់សម្រាប់យុទ្ធនាការព័ត៌មានមិនពិត ហើយអាមេរិចត្រូវចាត់វិធានការយ៉ាងម៉ឺងម៉ាត់ប្រឆាំងនឹងម្ចាស់របស់ TikTok ដើម្បីការពារសន្តិសុខជាតិរបស់ពួកយើង។
លោកថ្លែងទៀតថា កម្មវិធី WeChat ចាប់យកព័ត៌មានដោយស្វ័យប្រវត្តិពីអ្នកប្រើប្រាស់។ ការប្រមូលយកទិន្នន័យនេះគំរាមកំហែង និងអនុញ្ញាតិឲ្យបក្សកុម្មុនិស្តចិនចូលដល់ព័ត៌មានផ្ទាល់ខ្លួន និងកម្មសិទិ្ធរបស់ប្រជាជនអាមេរិច។
បញ្ជានោះនឹងធ្វើការហាមឃាត់ WeChat ក្នុងរយៈពេល ៤៥ថ្ងៃខាងមុខ។
នៅសហ្តាហ៍នេះ លោកត្រាំ បាននិយាយថា លោកនឹងគាំទ្រការលក់ប្រតិបត្តិការនៅអាមេរិចរបស់ TikTok ទៅអោយក្រុមហ៊ុន Microsoft ប្រសិនរដ្ឋាភិបាលអាមេរិចទទួលបានចំណែកមួយចំនួនធំនៃការលក់ ប៉ុន្តែលោកបានព្រមានថា លោកនឹងធ្វើការហាមឃាត់ TikTok នៅថ្ងៃទី ១៥ ខែកញ្ញាខាងមុខ៕
អត្ថបទប្រែសម្រួលដោយ៖ សុភ័ក្រ
ប្រភព៖ Reuters
