ទាយាទអារ៉ាប៊ី សៅអូឌីត គឺព្រះអង្គម្ចាស់ Mohammed bin Salman ត្រូវបានចោទប្រកាន់ពីបទបញ្ជូនក្រុមឃាតករ ទៅកាន់ប្រទេសកាណាដា ដើម្បីសម្លាប់អតីតមន្ត្រីចារកម្មអារ៉ាប៊ី សៅអូឌីត។
ផែនការក្នុងការសម្លាប់ លោក Saad al-Jabri គឺធ្វើឡើងភ្លាមៗ បន្ទាប់ពីមានការធ្វើឃាតលើអ្នកកាសែតឈ្មោះ Jamal Khashoggi នៅក្នុងប្រទេសតួកគី។ នេះបើតាមឯកសារតុលាការដាក់ប្តឹងនៅនៅអាមេរិច។
លោក Saad al-Jabri ដែលជាទាហានជើងចាស់នៃរដ្ឋាភិបាលអារ៉ាប៊ី សៅអូឌីត បានធ្វើការនិរទេសខ្លួនអស់រយៈពេល ៣ឆ្នាំមកហើយ។ ចាប់តាំងពីពេលនោះមក គាត់បានស្ថិតក្រោមការការពារសុវត្ថិភាពឯកជន នៅក្នុងទីក្រុង Toronto ប្រទេសកាណាដា។
ផែនការធ្វើឃាតលោក Saad al-Jabri បានបរាជ័យ ក្រោយពេលភ្នាក់ងារព្រំដែនកាណាដាមានការសង្ស័យពីក្រុមឃាតករ ខណៈដែលពួកគេប៉ុនប៉ងចូលទៅក្នុងប្រទេសកាណាដាតាមព្រលានយន្តហោះអន្តរជាតិ Pearson។ នេះបើតាមឯកសាររបស់តុលាការបញ្ជាក់។
បណ្តឹងដែលមាន ១០៦ទំព័រ បានចោទប្រកាន់ព្រះអង្គម្ចាស់អារ៉ាប៊ី សៅអូឌីតពីបទប៉ុនប៉ងធ្វើឃាតលោក Saad al-Jabri ដើម្បីបំបិទមាត់គាត់។
លោក Saad al-Jabri និយាយថា នេះដោយសារតែលោកបានដឹងព័ត៌មានជាច្រើន។
តើលោក Saad al-Jabri ជានរណា?
អស់រយៈពេលជាច្រើនឆ្នាំមកហើយ លោកគឺជាបុរសដៃស្តាំរបស់ព្រះអង្គម្ចាស់ Mohammed bin Nayef ដែលបានទទួលការកោតសរសើរយ៉ាងខ្លាំងក្នុងការកម្ចាត់ក្រុម al-Qaeda កាលពីឆ្នាំ ២០០០។ លោកក៏ជាអ្នកមើលការខុសត្រូវផងដែរ នៃទំនាក់ទំនងរបស់ប្រទេសអារ៉ាប៊ី សៅអូឌីតជាមួយនឹងភ្នាក់ងារចារកម្មរបស់ប្រទេសអង់គ្លេស អាមេរិច កាណាដា អូស្ត្រាលី និងញូវហ្សឺឡែន។
បុរសដែលមិនសូវចេះនិយាយស្តីនេះ មានសញ្ញាបត្របណ្ឌិតផ្នែកចារកម្មតាមកុំព្យូទ័រពីសកលវិទ្យាល័យ Edinburgh ប្រទេសស្កុតឡែន។ លោកបានឡើងឋានៈជារដ្ឋមន្ត្រីខុទ្ធកាល័យ និងកាន់តំណែងជាឧត្តមសេនីយ៍ឯក នៅក្នុងក្រសួងមហាផ្ទៃ។
ប៉ុន្តែនៅក្នុងឆ្នាំ ២០១៥ អ្វីៗបានផ្លាស់ប្តូរ។ ស្តេច Abdullah បានសោយទីវង្គត់ ហើយប្អូនប្រុសរបស់គាត់បានឡើងសោយរាជ្យ ដោយបានតែងតាំងកូនប្រុសឈ្មោះ Mohammed bin Salman ធ្វើជារដ្ឋមន្ត្រីក្រសួងការពារជាតិ។
ក្នុងឆ្នាំ ២០១៧ Mohammed bin Salman បានធ្វើរដ្ឋប្រហារដោយគ្មានការបង្ហូរឈាមនៅក្នុងវាំង។ គាត់បានធ្វើការដណ្តើមបានតំណែងជាទាយាទពីព្រះអង្គម្ចាស់ Mohammed bin Nayef។
ព្រះអង្គម្ចាស់ ដែលត្រូវគេទម្លាក់ពីទាយាទ បច្ចុប្បន្ន ត្រូវបានចាប់ខ្លួន ហើយទ្រព្យសម្បត្តិរបស់គាត់ត្រូវបានរឹបអូស ហើយអ្នកដែលធ្វើកិច្ចការឲ្យគាត់ ត្រូវបានដកចេញពីតំណែង។ បន្ទាប់មក លោក Saad al-Jabri បានរត់ភៀសខ្លួនទៅកាន់ប្រទេសកាណាដា៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
