ក្មេងស្រីអាយុ ១១ ឆ្នាំ ដែលមានឈ្មោះហៅក្រៅថា Lele ថ្មីៗនេះ ត្រូវបានដឹងថានាងមានផ្ទៃពោះ បន្ទាប់ពីគ្រូសាររបស់នាងបានរកឃើញថា នាងជាជនរងគ្រោះនៃអំពើរំលោភផ្លូវភេទមានរយៈយូរ ហើយត្រូវបានរំលោភជាញឹកញាប់ដោយមន្រ្តីសន្តិសុខសាលារបស់នាង ។
ហេតុការណ៍ដ៏រន្ធត់នេះបានកើតឡើងក្នុងខែធ្នូ ឆ្នាំ ២០១៧ នៅពេល Lele ត្រូវបាននាំយកទៅកាន់គ្លីនិកឯកជនមួយ នៅពេលនាងបានចាប់ផ្តើមត្អូញត្អែរអំពីអាការៈពិបាកក្នុងខ្លួន ។ គ្រូពេទ្យបានបញ្ជាក់ឲ្យដឹងថា ក្មេងស្រីអាយុ ១១ ឆ្នាំ រូបនេះ បានមានផ្ទៃពោះ ៥ ខែ រួចទៅហើយ ។
បន្ទាប់ពីដឹងថា នាងមានផ្ទៃពោះ គ្រួសាររបស់នាងបានចាប់ជជីកសួរនាង អំពីអ្វីដែលបានកើតឡើង ហើយនាងគ្រាន់តែបង្ហើបថា «គ្រូ» ជាអ្នកប្រព្រឹត្តមកលើរូបនាង ។ ទោះយ៉ាងណា រឿងរ៉ាវដ៏គួរឲ្យខ្ពើមរអើមនេះ ក្រោយមកត្រូវបានគេបញ្ចេញឲ្យដឹងថា ក្មេងស្រីនេះត្រូវបានរំលោភជាច្រើនលើក ដោយបុគ្គលិកនៃសាលាបឋមសិក្សាលេខ No.2 ស្ថិតក្នុងភូមិ Magutian ដែលមានរយៈពេលប្រហែល ២ ឆ្នាំ មកហើយ ។
យោងតាមបងថ្លៃប្រុសរបស់ Lele ឈ្មោះ Zhang Jun នោះអំពើរំលោភបំពានផ្លូវនេះ បានចាប់ផ្តើមកើតឡើងដំបូង នៅពេលនាងមានអាយុទើប ៩ ឆ្នាំ និងរៀនថ្នាក់ទី៤ ។
បងថ្លៃរបស់នាងបន្តថា៖ «Lele ធ្លាប់ទទួលបានចំណាត់ល្អៗ និងមានបុគ្គលិកលក្ខណៈរួសរាយ និងចូលចិត្តបង្កភាពសប្បាយៗជាមួយមិត្តរួមថ្នាក់របស់នាង ។ ប៉ុន្តែ នាងតែងបង្ហាញនូវភាពស្ងៀមស្ងាត់ ក្នុងរយៈពេល ២ ឆ្នាំ កន្លងមកនេះ» ។
នៅថ្ងៃមួយ ខណៈនាងកំពុងស្ថិតនៅកន្លែងលេង (playground) នៅពេលនោះ បុគ្គលិកសាលាម្នាក់ដែលគ្រាន់តែបញ្ជាក់ថាមានឈ្មោះ Liu បានដើរចូលទៅកន្លែងពួកគេ និងបង្គាប់ឲ្យក្មេង២នាក់ដែលលេងជាមួយនាង ចាកចេញ ។
បុរសនោះត្រូវបានគេជឿថាមានអាយុខ្ទង់ ៥០ ឆ្នាំ បន្ទាប់មក បានបន្តនាំយកនាងដោយបង្ខំ ទៅកាន់បន្ទប់ក្រោមដី, ជាទីកន្លែងដែលគាត់ចាប់រំលោភនាង ។ បុរសរូបនេះបន្ទាប់មក បានគំរាមថា គាត់នឹងសម្លាប់គ្រួសាររបស់នាង ប្រសិនជានាងហ៊ានប្រាប់នរណាម្នាក់អំពីរឿងនេះ ។ ហេតុនេះ ការរំលោភក៏ចេះតែបន្តរហូតដល់ ២ ឆ្នាំ ។
ទោះយ៉ាងណា នៅថ្ងៃមួយ អំពើដ៏ខ្ពើមរអើមរបស់ Liu ត្រូវបានចាប់បាន បន្ទាប់បុរសរូបនេះបានព្យាយាមដេញតាម Lele ខណៈនាងចេញពីសាលារៀន ក្នុងបំណងទៅរំលោភនាងដល់ផ្ទះ ប៉ុន្តែ សំណាងអាក្រក់ នៅពេលគោះទ្វាក៏ប្រទះនឹងម្តាយរបស់នាង ហើយបុរសនេះយកលេសថា ចង់រកខ្ចីសៀវភៅ ។ សកម្មភាពចម្លែករបស់ Liu ត្រូវបានសង្ស័យ និងឈានដល់ការចាប់ខ្លួន បន្ទាប់ពីត្រូវបានតាមទាន់ចុងក្រោយ កំពុងរំលោភ Lele នៅក្នុងអគារបោះបង់ចោលមួយ ។
Liu ត្រូវបានចាប់ឃុំខ្លួន ខណៈពួកគេរង់ចាំលទ្ធផលតេស្ត DNA ដែលពួកគេទាំងពីរបានធ្វើមុននេះក្នុងខែធ្នូ ៕ ចន្ទី
