ភ្នំពេញ៖ ថ្ងៃទីបួននាឱកាសឈប់សម្រាក កម្ពុជាទទួលបានភ្ញៀវទេសចរជាង៣៣ម៉ឺននាក់ ដោយឡែកបើសរុបពេលបួនថ្ងៃមានជាង១លាន១សែននាក់។
ក្នុងថ្ងៃទីបួននាឱកាសឈប់សម្រាកសងថ្ងៃចូលឆ្នាំខ្មែរ ដែលត្រូវនឹងថ្ងៃទៅ២០ ខែសីហា ឆ្នាំ២០២០នេះ មានភ្ញៀវទេសចរ និងប្រជាពលរដ្ឋចេញដើរទស្សនាកម្សាន្តនៅទូទៅប្រទេសមានចំនួន ៣៣៤,៣៩១នាក់ ធៀបនឹងថ្ងៃទីបី កើនឡើង ២.៨៦% បើធៀបនឹងថ្ងៃទីពីរ គឺកើនឡើង ២០.៦៨% បើធៀបនឹងថ្ងៃទីមួយ កើនឡើង ៤៣.៣១%។
ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានប្រាប់ឱ្យដឹងថា ក្នុងចំណោមភ្ញៀវសរុបមានចំនួនសរុប ៣៣៤,៣៩១នាក់នេះ មានភ្ញៀវជាតិចំនួន ៣៣១,៨៣៦នាក់ និងភ្ញៀវអន្តរជាតិចំនួន ២,៥៥៥នាក់។
គោលដៅទេសចរណ៍សំខាន់ៗមួយចំនួនរួមមាន៖ ខេត្តសៀមរាប៖ ៤៥,៣០១នាក់*ខេត្តកែប៖ ៣៧,៦៧២ក់* ខេត្តកំពត៖ ៣៥,៣០១នាក់* ខេត្តបាត់ដំបង៖ ៣៤,៩៩០នាក់* ខេត្តព្រះសីហនុ៖ ២៧,០២០នាក់* ខេត្តពោធិ៍សាត់៖ ១៧,០៦១នាក់* ខេត្តកោះកុង៖ ១៣,៤១១នាក់* ខេត្តកណ្តាល៖ ១២,៥៥១នាក់* ខេត្តព្រះវិហារ៖ ១២,៤៤៨នាក់* ខេត្តកំពង់ឆ្នាំង៖ ១០,៩១៧នាក់* ខេត្តរតនគិរី៖ ១០,២២៨នាក់។
សរុបស្ថិតិភ្ញៀវទេសចររយៈពេលបួនថ្ងៃ ចាប់ពីថ្ងៃទី១៧-២០ ខែសីហា គឺមានចំនួន ១,១៦៩,៨២៤នាក់។
ចំណែកសភាពការណ៍សន្តិសុខ សណ្ដាប់ធ្លាប់នៅតាមកន្លែងមានភ្ញៀវទៅទស្សនានោះ មិនមានបញ្ហាអ្វីធំដុំនោះឡើយ៕
ដោយ៖CEN
