ភ្នំពេញ៖ កន្លងមក គណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ១៩ របស់រាជរដ្ឋាភិបាលកម្ពុជា បានដាក់ចេញនូវវិធានការសុខាភិបាលក្នុងការការពារ ទប់ស្កាត់ និងឆ្លើយតបការរីករាលដាលនៃជំងឺកូវីដ១៩ សម្រាប់អនុវត្តលើអ្នកដំណើរបរទេសចូលមកប្រទេសកម្ពុជា ដែលក្នងនោះមានលក្ខខណ្ឌមួយ តម្រូវឲ្យអ្នកដំណើរមួយចំនួន ត្រូវមានការធនារ៉ាបរងសុខភាពលើជំងឺកូវីដ១៩។
ដើម្បីចូលរួមគាំទ្រ និងសម្រួលការអនុវត្តនេះឲ្យមានប្រសិទ្ធភាព និងដំណើរការរលូន ក្រសួងសេដ្ឋកិច្ច និងហិរញ្ញវត្ថុ បានធ្វើការសហការជិតស្និទ្ធជាមួយសមាគមធានារ៉ាបរងកម្ពុជា ក្នុងការសម្របសម្រួលក្រុមហ៊ុនធានារ៉ាប់រងទាំងអស់ ដែលមានចំណាប់អារម្មណ៍ក្នុងការផ្តល់សេវាធានារ៉ាប់រងសុខភាពលើជំងឺកូវីដ១៩នេះ។ ជាលទ្ធផលមានក្រុមហ៊ុនធានារ៉ាប់រងចំនួន៨ និងក្រុមហ៊ុនធានារ៉ាប់រងបន្តចំនួន ១ បានចូលរួមគ្នាបង្កើតជាក្រុមសម្ព័ន្ធធានារ៉ាប់រង ដើម្បីផ្តល់សេវាធានារ៉ាប់រងសុខភាពលើជំងឺកូវីដ១៩ ចំពោះអ្នកដំណើរបរទេសដែលចូលមកប្រទេសកម្ពុជា។
ក្រុមហ៊ុនដែលចូលរួមក្នុងក្រុមសម្ព័ន្ធធានារ៉ាប់រងនេះ នឹងផ្តល់ការធានារ៉ាប់រងរួមគ្នា ទៅលើហានិភ័យនៃធានារ៉ាប់រងសុខភាពលើជំងឺកូវីដ១៩ គិតចាប់ពីពេលដែលបុគ្គលត្រូវបានធានា ត្រូវបានពិនិត្យ ឃើញលទ្ធផលតេស្តវិជ្ជមាននៃជំងឺកូវីដ១៩ ក្នុងរយៈពេលសុពលភាពនៃបណ្ណសន្យារ៉ាប់រង ហើយត្រូវបានដាក់ឲ្យព្យាបាលនៅមន្ទីររដ្ឋដែលកំណត់ដោយក្រសួងសុខាភិបាល រហូតជាសៈស្បើយ។ ក្រុមសម្ព័ន្ធរ៉ាប់រង នឹងទទួលបន្ទុកលើការចំណាយសម្រាប់ការព្យាបាលជំងឺនេះ ដែលអាចរ៉ាប់រង ទឹកប្រាក់ចំណាយហូតដល់ចំនួន ៥ម៉ឺនដុល្លារអាមេរិក។
ក្រុមហ៊ុនចូលរួមក្នុងសម្ព័ន្ធធានារ៉ាប់រងនេះរួមមាន៖ ក្រុមហ៊ុនធានារ៉ាប់រង ហ្វតតេ អ៊ីនសួរីនហ៍ ខេមបូឌា ភីអិលស៊ី, ក្រុមហ៊ុនធានារ៉ាប់រងកម្ពុជាវៀតណាម ក្រុមហ៊ុនធានារ៉ាប់រងមេនូឡាយហ្វ៍ ក្រុមហ៊ុនធានារ៉ាប់រងព្រូដិនសល ក្រុមហ៊ុនធានារ៉ាប់រងហ្វតតេឡាយហ្វ៍ ក្រុមហ៊ុនធានារ៉ាប់រង អេ អាយ អេ ក្រុមហ៊ុនធានារ៉ាប់រងដាយអ៊ិឈិ អ៊ីនសួរិនស៍ ក្រុមហ៊ុនធានារ៉ាប់រងហ្ក្រេន ឆាយណា ក្រុមហ៊ុនធានារ៉ាប់រងបន្តកម្ពុជារី ។
ក្រសួងសេដ្ឋកិច្ចថា រយៈពេលធានា មាន២០ថ្ងៃ ឬតិចជាង ដោយឡែក បុព្វលាភ គឺចំនួន ៩០ដុល្លារ ដែលប្រាក់ធានារ៉ាប់រង ចំនួន ៥០.០០០ដុល្លារ គិតចាប់ពីថ្ងៃមកដល់ប្រទេសកម្ពុជា។ ក្នុងនាមជាក្រុមហ៊ុននាំមុខនៃក្រុមសម្ព័ន្ធ ក្រុមហ៊ុនធានារ៉ាបរង ហ្វតតេ ជាអ្នកចាត់ចែងនិងគ្រប់គ្រងដំណើរការលក់ ការចេញបណ្ណសន្យារ៉ាប់រងជូនអតិថិជន និងការដោះស្រាយសំណង៕
ដោយ៖CEN
