ខេត្តព្រះសីហនុ៖ សមត្ថកិច្ច នៃស្នងការដ្ឋាន នគរបាលខេត្តព្រះសីហនុ បានឲ្យដឹងថា កាលពីវេលាម៉ោង ១៨ និង៤០នាទី ថ្ងៃទី៥ ខែកុម្ភៈ ឆ្នាំ២០១៨ មានជនជាតិចិន ៣នាក់ បានក្រឡាប់រថយន្ត នៅតាមផ្លូវជាតិលេខ៤ ចន្លោះគីឡូម៉ែត្រ ១០៧-១០៨ ក្នុងភូមិស្ទឹងច្រាល ឃុំអូរបាក់រទេះ ស្រុកកំពង់សិលា ខេត្តព្រះសីហនុ។
រថយន្តម៉ាក NISSAN ពណ៌ខ្មៅ ពាក់ផ្លាកលេខ ភ្នំពេញ2U-6212 បើកបរដោយ ជនជាតិចិន ជិះគ្នា ៣នាក់ មានទិសដៅពីភ្នំពេញ ឆ្ពោះមកខេត្តព្រះសីហនុ ដល់ចំណុចខាងលើ ក៏បានក្រឡាប់បុកដើមឈើ។
មន្ត្រីនគរបាល បានឲ្យដឹងថា គ្រោះថ្នាក់នឹះ បានបណ្ដាលឲ្យអ្នកជិះក្នុងរថយន្ត ម្នាក់ស្លាប់ភ្លាមៗ នៅនឹងកន្លែងកើតហេតុ និង ២នាក់ទៀតរងរបួសធ្ងន់ ហើយជនរងគ្រោះ បានបញ្ជូនទៅសង្គ្រោះនៅមន្ទីរពេទ្យរាជធានីភ្នំពេញ ។
ចំណែករថយន្តជួបគ្រោះថ្នាក់ចរាចរណ៍ សមត្ថកិច្ចវានស្ទូចយកទៅរក្សាទុកនៅ អធិការដ្ឋាននគរបាលស្រុកកំពង់សិលា ដើម្បីដោះស្រាយនៅពេលក្រោយ៕ ដែន សីមា
