ភ្នំពេញ ៖ ក្រុមហ៊ុន ម៉ាវ៉ល ហ្កាមិន ឯ.ក ដែលជាក្រុមហ៊ុនផលិតសម្លៀកបំពាក់ឈានមុខ និងធំជាងគេបំផុតនៅប្រទេសចិន បាននិងកំពុងសាងសង់រោងចក្រថ្មីមួយចាប់តាំងពី ខែមីនា ឆ្នាំ២០១៩ នៅក្នុងតំបន់សេដ្ឋកិច្ចពិសេសភ្នំពេញ។
បន្ទាប់ពីការសាងសង់បានមួយឆ្នាំកន្លះ ក្រុមហ៊ុនបានបញ្ចប់គម្រោងសាងសង់រោងចក្រដំណាក់កាលទី១របស់ខ្លួន និងចាប់ផ្តើមជ្រើសរើសកម្មករ កម្មការនី ដើម្បីចាប់ផ្តើមសង្វាក់ផលិតកម្មនាដើមខែតុលា ឆ្នាំ២០២០ខាងមុខនេះ។ នៅដំណាក់កាលទី១ ក្រុមហ៊ុននឹងជ្រើសរើសកម្មករចំនួន៥.០០០នាក់ សម្រាប់ផលិតកម្មផលិតម៉ាស នាំចេញទៅកាន់ទីផ្សារប្រទេសជប៉ុន។
លើសពីនេះទៅទៀត គម្រោងនេះត្រូវបានរចនាឡើងជាចង្កោមនៃរោងចក្រ ផលិតសម្លៀកបំពាក់ដោយមាន កាត់ដេរ បោះពុម្ព ប៉ាក់ វេចខ្ចប់ និងឃ្លាំង។ គ្របដណ្តប់លើផ្ទៃដី៤៣ហិកតា ទីតាំងផលិតកម្មចំនួន១៦ត្រូវបានគ្រោងនឹងបញ្ចប់នៅឆ្នាំ២០២១ ដែលនឹងបង្កើតឱកាសការងារចំនួន១៧.០០០។
លោក YAN DELIN អគ្គនាយកក្រុមហ៊ុន ម៉ាវ៉ល ហ្កាមិន ឯ.ក បានមានប្រសាសន៍ថា “ទោះបីស្ថិតក្នុងស្ថានភាពដ៏លំបាកនេះក៏ដោយ យើងបានសម្រេចចិត្តឈានទៅមុខ ដូច្នេះយើងអាចរៀបចំខ្លួនសម្រាប់ក្រោយពេលស្ថានភាពកូវីដ១៩។ ដោយធ្វើដូច្នេះ យើងនឹងបន្តបង្កើតឱកាសការងារបន្ថែមទៀតនៅក្នុងប្រទេសកម្ពុជា“ ៕
ដោយ៖CEN
