កំពង់ឆ្នាំង ៖ បុរសពីរនាក់តែមានមុខរបរជាអ្នករកស៊ីរត់ផាសអាប់ ចៃដន្យបានជួបម៉ូយ ពិសេសសាសងទាក់ទងទៅត្រូវដងត្រូវផ្លែ បង្កើតបានជាភ្លើងស្នេហ៍ផ្លេកបន្ទោរ ឈានទៅដល់ហៅនាងចូលផឹកស៊ីក្នុងហាងមួយ ប៉ុន្តែនាងជើងល្អប្រុងជើងការរួចជាស្រេច ដោយបានលួចដាក់ថ្នាំសណ្តំនៅក្នុងកែវស្រា ឱ្យបុរសទាំងពីរនាក់ផឹករហូតដល់សន្លប់បាត់បង់ស្មារតី ហើយក្រុមនាងទាំងពីរនាក់បានដោះយកចិញ្ចៀនមាស 5 ជី និងលុយ 40 ម៉ឺនរៀល គេចខ្លួនបាត់ដោយសុវត្ថិភាព។
ករណីនេះត្រូវបានគេប្រទះឃើញជនរងគ្រោះ ដេកសន្លប់កាលពីវេលាម៉ោង១១និង៣០នាទីថ្ងៃត្រង់ថ្ងៃទី១៥ ខែកញ្ញា ឆ្នាំ២០២០
នៅក្នុងហាងលក់គ្រឿងក្លែម យីហោចំណូលថ្មី ចំណុចមុខផ្សារទើបសង់ថ្មី ចុងកោះ ស្ថិតក្នុងភូមិទី៧ សង្កាត់ខ្សាម ក្រុងកំពង់ឆ្នាំង ខេត្តកំពង់ឆ្មាំង។
បុរសរងគ្រោះទាំង ២នាក់ មិនត្រូវបានស្គាល់ឈ្មោះទេ មានមុខរបរជាអ្នករត់ផាស្អាប់។
ប្រភពព័ត៌មានបានឲ្យដឹងថា មុនពេលកើតហេតុជនរងគ្រោះទាំង ២នាក់ បានធ្លាក់ក្នុងអន្លង់ស្នេហ៍ស្រីស្អាត ២រូប ហើយក៏ចរចាផ្អែមល្ហែមអូនបងមិនដាច់ពីមាត់ រួចបុរសទាំង ២នាក់ ក៏បានបបួលនាងៗ ទៅផឹកស៊ីបង្កើនស្នេហ៍ឲ្យកាន់តែស្អិតល្មួតបន្ថែមទៀត នៅត្រង់ចំណុចទីតាំងកើតហេតុខាងលើ ដោយនាំគ្មាផឹកស្រាបៀរអស់ច្រើនកំប៉ុង មើលមុខអូនៗកាន់តែស្រស់ស្អាតទៅៗមួយកម្រិតទៀត រហូតនាងៗ លួចដាក់ថ្នាំសណ្ដំក្នុងកែវស្រាផឹកសន្លប់បាត់បង់ស្មារតី រួចនាងដៃឆើតដោះយកចិញ្ជៀនមួយវង់ មានទម្ងន់ ៥ជី និងប្រាក់ ៤០ម៉ឺនរៀល ចែកជើងគ្នារត់បាត់ស្រមោលតែម្ដង។ លុះព្រលប់ព្រាលៗឡើងម៉ោងប្រហែល ៦ល្ងាច ទើបដឹងខ្លួនម្នាក់ ប៉ុន្តែសួរនាំចេះតែគ្រវីក្បាល ដូចគោត្រូវស្រាំងទិច និងម្នាក់ទៀតដេកលង់លក់ដូចសាកសព ឃើញដូច្នោះ ម្ចាស់ហាងក៏រាយការណ៍ជូនសមត្ថកិច្ច ដើម្បីចុះមកទីតាំងខាងលើ ជួយអន្តរាគមន៍និងធ្វើការស្រាវជ្រាវបន្ដ។
ឲ្យតែបងៗធ្វើតែរបៀបនឹងប្តពន្ធកូនចាំនៅឯផ្ទះច្បាស់ស៊ីសៀងលេខ២ហើយ ឌុបភ្ញៀវមិនបានលុយហើយ ថែមទាំងត្រូវភ្ញៀវជាស្រីៗទាំងនោះ ប្រើល្បិចបោកយកលុយលាក់មាសប្រាក់អស់ពីខ្លួនទៀត៕
ដោយ ៖ កាំង ពៅ
