ភ្នំពេញ៖ ក្នុងអំឡុងពេលបុណ្យភ្ជុំបិណ្ឌរយៈពេល៣នេះ របាយការណ៍បឋមនៃមន្ទីរទេសចរណ៍រាជធានីខេត្ត បានបង្ហាញឲ្យដឹងថា ភ្ញៀវទេសចរ ដែលបានធ្វើដំណើរកម្សាន្តនៅតាមគោលដៅ ទេសចរណ៍នានាទូទាំងប្រទេស មានចំនួនជាង ១,១ លាននាក់។
ឯកឧត្តមរដ្ឋមន្ត្រី ថោង ខុន បានឱ្យដឹងថា ក្នុងចំណោមភ្ញៀវទេសចរណ៍ជាង ១លាននាក់ ដែលបានធ្វើដំណើរកម្សាន្តនោះ មាន ភ្ញៀវជាតិ ១.១០៥.៦១១ នាក់ និងភ្ញៀវអន្តរជាតិមានចំនួន ៦.៧៩២ នាក់។
ខេត្តដែលទទួលបានភ្ញៀវទេសចរច្រើន រួមមាន៖ ខេត្តបាត់ដំបង ១៣៤.៤៤០ នាក់, ខេត្តសៀមរាប ១២២.៣៧០ នាក់, ខេត្តកំពត ៩៤.៤៧៩ នាក់, ខេត្តកំពង់ឆ្នាំង ៨៥.៥៩៧ នាក់, ខេត្តពោធិ៍សាត់ ៧២.៣៨៩ នាក់, ខេត្តព្រះសីហនុ ៦៥.៨២៥ នាក់, ខេត្តកែប ៦៨.០៥៤នាក់, ខេត្តកណ្តាល ៦២.៧៤១នាក់។
ឯឧត្តមថោង ខុន បានបញ្ជាក់ថា «ជារួមប្រជាជននៅតាមមូលដ្ឋាន និងវិស័យឯកជន មានភាពរីករាយជាមួយលំហូរភ្ញៀវទេសចរណ៍នៅគ្រប់គោលដៅទេសចរណ៍នាឱកាសបុណ្យភ្ជុំបិណ្ឌនេះ ដោយការចំណាយរបស់ភ្ញៀវទេសចរណ៍ បានហូរចូលដោយផ្ទាល់ទៅក្នុងចរន្តសេដ្ឋកិច្ចមូលដ្ឋាន»។
ជាការគួរកត់សម្គាល់លើទិដ្ឋភាពសំខាន់ៗជារួម បើទោះបីមានភ្លៀងធ្លាក់ជាច្រើនកន្លែងក្នុងភូមិសាស្ត្រខេត្តមួយចំនួន ប៉ុន្តែគោលដៅទេសចរណ៍ភាគច្រើននៅតែមានភ្ញៀវទេសចរណ៍ កម្សាន្តយ៉ាងច្រើនកុះករ។ ការគ្រប់គ្រងសន្តិសុខ សណ្ដាប់ធ្នាប់ជាទូទៅមានភាពល្អប្រសើរ មិនមានបញ្ហា ឬការរំខានណាមួយកើតឡើងគួរកត់សម្គាល់ទេ។ បញ្ហាប្រឈមដែលកើតមានឡើងកន្លងមក ជាពិសេសការគ្រប់គ្រងតម្លៃសេវា និងបញ្ហាសំរាម ត្រូវបានយកចិត្តទុកដាក់ដោះស្រាយពីគណៈបញ្ជាការឯកភាពរាជធានីខេត្ត និងកាត់បន្ថយកាន់តែប្រសើរសម្រាប់ពេលឈប់សម្រាកបុណ្យភ្ជុំបិណ្ឌនេះ។
ជារួមគោលការណ៍ណែនាំរបស់ក្រសួងសុខាភិបាល វិធានសុវត្ថិភាពទេសចរណ៍ ពិសេសការរំលឹកដាស់តឿន ជាប្រចាំរបស់សម្តេចតេជោនាយករដ្ឋមន្ត្រី ត្រូវបានយកចិត្តទុកដាក់អនុវត្តន៍ នៅតាមគោលដៅទេសចរណ៍នានាបានកាន់តែល្អប្រសើរ ស្របតាមវិធានដែលបានដាក់ចេញ ក្នុងនោះការរៀបចំប្រដាប់វាស់កម្ដៅ អាល់កុលលាងដៃ ការណែនាំឲ្យពាក់ម៉ាស និងអនាម័យក្នុងបន្ទប់ទឹក ត្រូវបានអនុវត្តត្រឹមត្រូវភាគច្រើន ហើយការយល់ដឹង និងការចូលរួមអនុវត្តរបស់ភ្ញៀវទេសចរក៏មានភាពកាន់តែប្រសើរ៕
ដោយ៖CEN
