ភ្នំពេញ៖ ខណៈដែលកម្ពុជារងនូវប្រព័ន្ធសម្ពាធទាប ក្រសួងធនធានទឹក និងឧតុនិយម អំពាវនាវដល់ប្រជាពលរដ្ឋទាំងអស់ បន្តបង្កើនការប្រុងប្រយ័ត្នខ្ពស់ចំពោះបាតុភូតធម្មជាតិ ផ្គរ រន្ទះ និងភ្លៀងខ្យល់។
ក្រសួងធនធានទឹក និងឧតុនិយម នៅថ្ងៃទី២២ ខែកញ្ញា ឆ្នាំ២០២០នេះ បានចេញសេចក្ដីជូនដំណឹង ស្ដីពី ស្ថានភាពធាតុអាកាស ចាប់ពីថ្ងៃទី ២៣ ដល់ថ្ងៃទី ២៩ ខែកញ្ញា ឆ្នាំ២០២០។ បើតាមសេចក្តីជូនដំណឹងរបស់ក្រសួងធនធានទឹក បានឱ្យដឹងថា ប្រព័ន្ធសម្ពាធទាបដែលអូសបន្លាយឆ្លងកាត់ភាគខាងជើងប្រទេសកម្ពុជា នៅថ្ងៃទី២៣ ខែកញ្ញា នឹងធ្វើឱ្យស្ថានភាពអាកាសធាតុនៅបណ្តាខេត្តតាមតំបន់ទំនាបកណ្តាលនិង តំបន់មាត់សមុទ្រ អាចមានភ្លៀងធ្លាក់ក្នុងកម្រិតពីមធ្យមទៅច្រើន។ ដោយឡែក បណ្តាខេត្តនៅតាមតំបន់ជួរភ្នំដងរែកនិងខ្ពង់រាបឦសាន អាចមានភ្លៀងធ្លាក់ក្នុងកម្រិតពីមធ្យមទៅបង្គួរ។
ក្រសួងបានអំពាវនាវដល់ប្រជាពលរដ្ឋទាំងអស់ ជាពិសេសពលរដ្ឋដែលរស់នៅតាមបណ្តាខេត្តនៅតំបន់ទំនាបកណ្តាល ឱ្យមានការប្រុងប្រយ័ត្នខ្ពស់ចំពោះបាតុភូតផ្គរ រន្ទះ និងខ្យល់កន្ត្រាក់។
ក្រសួងបានបញ្ជាក់ថា តាមរយៈតាមដាននៃការវិវត្ត និងប្រែប្រួលជាបន្តបន្ទាប់នៃស្ថានភាព អាកាសធាតុ សង្កេតឃើញថា នៅថ្ងៃទី ២៣ ខែកញ្ញា ប្រព័ន្ធសម្ពាធទាប នឹងអូសបន្លាយឆ្លងកាត់លើភាគខាងជើងប្រទេសកម្ពុជា។ ស្ថានភាពបែបនេះធ្វើឱ្យបណ្ដាខេត្តនៅតំបន់វាលទំនាបកណ្ដាល៖ សីតុណ្ហភាពអប្បបរមា មានពី ២៤-២៦°C សីតុណ្ហភាពអតិបរមា មានពី ២៩-៣១°C នឹងអាចមានភ្លៀងធ្លាក់រាយប៉ាយ ក្នុងកម្រិតពីមធ្យមទៅច្រើន។
បណ្ដាខេត្តនៅតំបន់ជួរភ្នំដងរែក និងខ្ពង់រាបមាន៖ សីតុណ្ហភាពអប្បបរមា មានពី ២៣-២៥°C សីតុណ្ហភាពអតិបរមា មានពី ២៨-៣០°C នឹងអាចមានភ្លៀងធ្លាក់រាយប៉ាយ ក្នុងកម្រិតពីមធ្យមទៅបង្គួរ។
បណ្តាខេត្តនៅតំបន់មាត់សមុទ្រ៖ សីតុណ្ហភាពអប្បបរមា មានពី ២៥ -២៧°C សីតុណ្ហភាពអតិបរមា មានពី ២៨-៣០°C
នឹងអាចមានភ្លៀងធ្លាក់រាយប៉ាយ ក្នុងកម្រិតពីមធ្យមទៅច្រើន។
ក្រសួងធនធានទឹក បានអំពាវនាវឲ្យបងប្អូនប្រជាពលរដ្ឋ មានការប្រុងប្រយ័ត្នខ្ពស់ ចំពោះបាតុភូត ផ្គរ រន្ទះ និងខ្យល់ កន្ត្រាក់ ដែលអាចកើតមានជាពិសេស បណ្ដាខេត្តនៅតំបន់វាលទំនាបកណ្ដាល ។ ដោយឡែក ប្រជាពលរដ្ឋនៅតំបន់មាត់សមុទ្រ អ្នកនេសាទ និង អ្នកដំណើរសមុទ្រ សូមប្រុងប្រយ័ត្នចំពោះភ្លៀងខ្យល់បក់ខ្លាំង និងរលកសមុទ្រខ្ពស់ៗ ចាប់ពីថ្ងៃទី ២៤-២៧ ខែកញ្ញា ឆ្នាំ២០២០។
គួរបញ្ជាក់ថា កាលពីសប្តាហ៍មុន ប្រទេសកម្ពុជាបានរងនូវឥទ្ធិពលព្យុះទី១១ ឈ្មោះថា នូល (NOUL) បានធ្វើឱ្យមានភ្លៀងធ្លាក់ច្រើននៅតំបន់ខ្លះ បង្កជាជំនន់ទឹកភ្លៀងហើយជន់លិចនៅក្នុងក្រុងស្រុកចំនួន១០ នៃខេត្តចំនួន៥ រួមមាន ខេត្តព្រះសីហនុ ពោធិ៍សាត់ ឧត្តរមានជ័យ កោះកុង និងប៉ៃលិន។
ឥទ្ធិពលព្យុះនេះក៏បានធ្វើឱ្យមនុស្សចំនួន១១នាក់បានស្លាប់ដោយសាររន្ទះបាញ់ និងជំនន់ទឹកភ្លៀង ខណៈផ្ទះជិត២ពាន់ខ្នងបានលិចលង់។ ក្រៅពីនោះ ក៏មានប្រជាពលរដ្ឋជាង៤០០នាក់ បានជម្លៀសចេញពីភូមិដោយសារឥទ្ធិពលនៃព្យុះនេះ៕ដោយ៖បញ្ញាស័ក្តិ
