ភ្នំពេញ៖ ពន្ធលើចំណេញមូលធន ដែលមានអត្រាពន្ធថេរ ២០% សម្រាប់ការលក់អចលនទ្រព្យ នឹងត្រូវចាប់ផ្ដើមអនុវត្តជាផ្លូវការនៅខែមករា ឆ្នាំ២០២១ ខាងមុខនេះ។ នៅថ្ងៃទី ២៥ ខែកញ្ញា ឆ្នាំ២០២០នេះ សមាគមន៍អ្នកអភិវឌ្ឍន៍លំនៅដ្ឋានកម្ពុជា ដឹកនាំដោយ លោកឧកញ៉ា លី ហួរ ជាប្រធាន ដោយមានក្រុមអ្នកជំនាញ និងអ្នកជំនួញអចលនទ្រព្យជាច្រើននៅកម្ពុជា បានជួបប្រជុំគ្នាស្តីពីច្បាប់ពន្ធដានេះ ដើម្បីបង្ហាញពីក្ដីព្រួយបារម្ភណ៍ ចំពោះការអនុវត្តគិតពន្ធថ្មីនេះ ដោយសមាជិកនីមួយៗអះអាងថា វានឹងធ្វើឲ្យមានការបន្ថែមបន្ទុកចំណាយសម្រាប់ពលរដ្ឋពិសេសអ្នករកស៊ីក្នុងរបរនេះ ខណៈបញ្ហាកូវីដ-១៩ នៅមិនទាន់ផុតរលត់នៅឡើយ។
លោក ច្រឹក សុខនីម ប្រធានសមាគមអ្នកវាយតម្លៃ និង ភ្នាក់ងារអចលនវត្ថុកម្ពុជា បានមានប្រសាសន៍ថា កាលៈទេសៈនេះ រដ្ឋគួតែព្យារពេល ចាប់ផ្តើមអនុវត្តយកពន្ធចំណេញមូលធននេះ ដោយរង់ចាំមើលពេលវេលាសមស្របណាមួយសិន។ លោក បន្តថា ការបង់ពន្ធជូនរដ្ឋ គឺជាកាតព្វកិច្ចរបស់ពលរដ្ឋ ប៉ុន្តែ ក្នុងអំឡុងពេលដ៏លំបាកនេះ រដ្ឋគួរពន្យារពេល រហូតដល់សេដ្ឋកិច្ចដំណើរការល្អប្រសើរឡើងវិញ។
សមាជិកសមាគមន៍អ្នកអភិវឌ្ឍន៍លំនៅដ្ឋានកម្ពុជា បានគូសបញ្ជាក់ថា បើសិនជារដ្ឋសម្រេចយកពន្ធចំពេលវិបត្តិជំងឺសកលនេះ សកម្មភាពនៃដោះដូរអចលនទ្រព្យ អាចនឹងមានការធ្លាក់ចុះ ជាពិសេសប៉ះពាល់ដល់ការសម្រេចចិត្តរបស់អតិថិជន។
ឯកឧត្តម កែន សម្បិត្ត អគ្គនាយករង នៃអគ្គនាយកដ្ឋានពន្ធដារ បានឱ្យដឹងថា ការកំណត់យកអត្រាពន្ធថេរ២០ភាគរយលើប្រាក់ចំណេញមូលធននេះ មិនមានន័យថា រដ្ឋយកពន្ធ២០ភាគរយពីប្រាក់ចំណេញទាំងមូលនោះទេ ពោលគឺរដ្ឋយកតែ២០ភាគរយ នៃតម្លៃអចលនទ្រព្យដែលលក់បាននោះប៉ុណ្ណោះ ដើម្បីយកគណនាគិតពន្ធ២០ភាគរយ ដែលបានកំណត់ក្នុងច្បាប់។
ជុំវិញការសម្រេចអនុវត្តចាប់ផ្តើមគិតពន្ធលើចំណេញមូលធនអចលនទ្រព្យនេះ ត្រូវបានមន្ត្រីអគ្គនាយក នៃអគ្គនាយកដ្ឋានពន្ធដារ បានឱ្យដឹងថា ពន្ធលើចំណេញមូលធននេះ មិនមែនជាការបង្កើតពន្ធថ្មីនោះឡើយ។ ពន្ធនេះ មានក្នុងច្បាប់ថវិកាឆ្នាំ ២០១០មកម្ល៉េះ ប៉ុន្តែ រាជរដ្ឋាភិបាលអនុញ្ញាតឲ្យពន្យារពេលដល់ឆ្នាំ២០២០ ដែលគិតមកដល់បច្ចុប្បន្ន ១០ឆ្នាំមកហើយ៕
ដោយ៖CEN
