បាត់ដំបង៖ប្រភេទសែនក្រអូប បានហក់ឡើងថ្លៃខ្ពស់ជាងឆ្នាំកន្លងទៅ ខណៈដែលការប្រមូលផលស្រូវបង្កើនរដូវឬស្រូវប្រាំង កំពុងចាប់ផ្ដើមជាហូរហែរនិងជិតប្រមូលផលរួចរាល់ហើយ អ្នកខ្លះទៀត បានចាប់ផ្ដើមព្រោះស្រូវឡើងវិញផងដែរ នៅខេត្តបាត់ដំបង។
កសិករម្នាក់ឈ្មោះ រស់ ផែន រស់នៅភូមិខ្នាចរមាស ឃុំខ្នាចរមាស ស្រុកបវេល បានលើកឡើងប្រាប់ថា គ្រួសារគាត់បានធ្វើស្រូវប្រភេទសែនក្រអូប ចំនួនជាង១០ហិកតា ដោយទិន្នផលទទួលបានចាប់ពីជិត ៣តោន ទៅ៥តោន តាមស្រែពេញទឹកនិងខ្វះទឹកស្រោចស្រព ព្រោះស្រែខ្លះនៅជិតប្រភពទឹក និងខ្លះទៀតនៅឆ្ងាយប្រភពទឹក ហើយត្រូវពឹងផ្អែកទៅលើទឹកភ្លៀង។ ចំពោះទិន្នផលស្រូវទទួលបានក្នុងមួយរដូវៗគឺមានឈ្មួញ និងក្រុមហ៊ុនឯកជនមកទិញយកអស់ៗ មិនដែលមានសល់នោះទេ ដោយការលក់នេះ ពួកគេគិតជាប្រាក់ថៃ ក្នុងមួយតោន កាលពីដើមដៃអាចលក់បានជិត មួយម៉ឺនបាត (ប្រហែលជាង ១លាន២សែនរៀល) ហើយវាបានថយចុះខ្លះ ប៉ុន្តែមិនទាន់ចុះក្រោមមួយលានរៀលនោះទេ។
លោក ឈឹម វជ្ជរ៉ា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តបាត់ដំបង បានមានប្រសាសន៍ថា បើទោះបីកម្ពុជាជួបបញ្ហាកូនរដូវប្រាំងអូសបន្លាយយូរ ប៉ុន្តែកសិករនៅបាត់ដំបង បាននាំគ្នាធ្វើស្រូវបង្កើនរដូវជាង ១៦ម៉ឺនហិកតា ដោយបញ្ហាពុំសូវមានទឹកភ្លៀងនេះ ក៏ធ្វើឲ្យទិន្នផលស្រូវមិនសូវទទួលបានច្រើននោះទេ ដែលមួយហិកតា ទិន្នផលជាមធ្យមជិត៤តោន ។
គួរបញ្ជាក់ថា ការធ្វើស្រូវបង្កើនរដូវនៅខេត្តបាត់ដំបង ភាគច្រើនស្ថិតនៅស្រុកសង្កែ ស្រុកបាណន់ ស្រុកថ្មគោល ស្រុកឯកភ្នំ ស្រុកបវេល ស្រុករុក្ខគិរី ស្រុកមោងឫស្សី និងស្រុកគាស់ក្រឡ ព្រោះបណ្ដាស្រុកទាំងនេះ ខ្លះនៅជិតប្រភពទឹក ជាប់ស្ទឹងសង្កែ ដោយតំបន់ខ្លះអាចធ្វើស្រែបង្កើនរដូវនេះ ពី២ទៅ៣ដងក៏មាន ៕ ដោយ៖អ៊ុងសារុំ
