ភ្នំពេញ៖ ករណីឆក់នោះយើងគ្រប់គ្នាធ្លាប់តែបានឮ ឬឃើញផ្ទាល់ភ្នែកកើតឡើងទៅលើស្ត្រីទន់ខ្សោយ ប៉ុន្តែ សម្រាប់ជាករណីនេះ គឺពិតសាហាវមិននឹកស្មានដល់ ខណៈដែលចោរដ៏មានជំនាញម្នាក់ហ៊ានជិះម៉ូតូចូលឆក់ខ្សែកបុរសមាឌធំម្នាក់ ដែលកំពុងឈរបោសសំរាមនៅមុខផ្ទះ យកទៅបាត់ទាំងព្រឹកតែម្តង។
នេះបើយោងតាមគណនីហ្វេសប៊ុកឈ្មោះ Nith Hpl ដែលត្រូវជាបងប្រុសជនរងគ្រោះ បានបង្ហោះវីដេអូស្តែងៗពីករណីនេះ កាលពីព្រឹកថ្ងៃទី៧ ខែតុលា ឆ្នាំ២០២០ ដោយបង្ហាញពីសកម្មភាពទាំងស្រុងចោរឆក់ខ្សែកប្អូនប្រុសរបស់ខ្លួន បានសម្រេចទាំងព្រឹក ខណៈប្អូនរបស់គាត់កំពុងឈរបោសសំរាមនៅមុខផ្ទះ ស្ថិតនៅម្តុំផ្សារដេប៉ូ១។
បើតាមពិនិត្យឃើញជាក់ស្តែង ក្រុមចោរមានគ្នីគ្នាតែ២នាក់ប៉ុណ្ណោះ ដែលម្នាក់ជាអ្នកឆក់ជិះម៉ូតូ Honda Dream រីឯម្នាក់ទៀតជាគូកនចាំបិទគូទ ជិះម៉ូតូ Honda PCX។
តាមរយៈវីដេអូនេះផងដែរ ក៏សូមបងប្អូនប្រជាពលរដ្ឋមានការប្រុងប្រយ័ត្នខ្ពស់ព្រោះថាចោរឥឡូវសាហាវៗណាស់ ឆក់អត់ស្គាល់ប្រុសឬស្រី ឲ្យតែឃើញឱកាសស្ងាត់ល្អ គឺអត់ទុកនោះទេ៕ ដោយ៖ លឹម ហុង
