ភ្នំពេញ៖ បច្ចុប្បន្ននេះ បណ្តាក្រសួងស្ថាប័នពាក់ព័ន្ធ អាជ្ញាធរថ្នាក់ជាតិ ថ្នាក់ក្រោមជាតិ និងកងកម្លាំងប្រដាប់អាវុធគ្រប់ប្រភេទ បាននិងកំពុងចេញប្រតិបត្តិការជួយសង្គ្រោះប្រជាពលរដ្ឋបណ្តាខេត្តរាជធានី ដែលរងផលប៉ះពាល់ពីគ្រោះធម្មជាតិទឹកជំនន់ដែលកំពុងកើនឡើងដ៏ធ្ងន់ធ្ងរ ខណៈភ្លៀងនៅតែបន្តធ្លាក់ចុះឥតឈប់ឈរសោះ។
ក្នុងគ្រាដែលប្រជាពលរដ្ឋរងគ្រោះ និងដើម្បីចូលរួមរំលែកការលំបាករបស់រាជរដ្ឋាភិបាល លោកឧកញ៉ា ឡេង ណាវ៉ាត្រា និងលោកជំទាវ នៅថ្ងៃទី១៤ ខែតុលា ឆ្នាំ២០២០ នេះ បានចូលរួមបរិច្ចាគថិវិកាចំនួន៦០ម៉ឺនដុល្លារអាមេរិក ជូនសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា សម្រាប់ជួយសង្គ្រោះប្រជាពលរដ្ឋ ដែលរងគ្រោះដោយសារទឹកជំនន់។
លោកឧកញ៉ា ឡេង ណាវ៉ាត្រា និងលោកជំទាវ នៅថ្ងៃទី១៤ ខែតុលា ឆ្នាំ២០២០នេះ បានចូលរួមបរិច្ចាគថិវិកាចំនួន៦០ម៉ឺនដុល្លារអាមេរិក ជូនសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា តាមរយៈជំនួយការរបស់សម្តេច សម្រាប់ជួយសង្គ្រោះប្រជាពលរដ្ឋ ដែលរងគ្រោះដោយសារទឹកជំនន់។
នេះបើយោងតាម គណនីហ្វេសប៊ុក របស់ លោក ហេង ឡុង បានបង្ហោះថា៖ ពិតជារំភើបយ៉ាងខ្លាំង និងមិននឹកស្មានដល់ថាអតីតពលករមកពីប្រទេសកូរ៉េម្នាក់ប្អូនឧកញ៉ា ឡេង ណាវ៉ាត់ត្រា និងប្អូនស្រីជំទាវ មានលទ្ធភាពបរិច្ចាគរហូតទៅដល់៦០ម៉ឺនដុល្លារ តបតាមការអំពាវនាវដ៏ខ្ពង់ខ្ពស់របស់សម្ដេចតេជោ ហ៊ុន សែន ដើម្បីជួយបងប្អូនប្រជាពលរដ្ឋជួបគ្រោះទឹកជំនន់។
ចំណែកលោកឧកញ៉ា ឡេង ណាវ៉ាត្រា ផ្ទាល់ក៏បានធ្វើការបង្ហោះរូប និងបានបញ្ជាក់ថា លោកបរិច្ចាគថិវិកាចំនួន៦០ម៉ឺនដុល្លារអាមេរិក គឺដើម្បីជួយបងប្អូនរងគ្រោះដោយសាទឹកជំនន់៕ ដោយ៖ លឹម ហុង
