ភ្នំពេញ៖ ស្ថាប័នរូបិយវត្ថុអន្តរជាតិ IMF បានព្យាករណ៍ថា នៅឆ្នាំ២០២១ ប្រទេសកម្ពុជា នឹងក្លាយជាប្រទេសមានសេដ្ឋកិច្ចរីកចម្រើនលឿនបំផុតទី៣ ប្រចាំតំបន់អាស៊ាន នៅពីក្រោយប្រទេសមីយ៉ាន់ម៉ា និងប្រទេសវៀតណាម។
ថ្មីៗនេះ ស្ថាប័ន IMF បានចេញរបាយការណ៍ស្ដីពីទស្សនវិស័យសេដ្ឋកិច្ចពិភពលោក ដោយក្នុងនោះ បានព្យាករណ៍ពីសេដ្ឋកិច្ចរបស់ប្រទេសកម្ពុជានឹងធ្លាក់ចុះ ២,៨% សម្រាប់ឆ្នាំ២០២០នេះ ហើយវាជា អត្រាធ្លាក់ចុះមួយខ្លាំងជាងប្រទេសឥណ្ឌូនេស៊ី ដែលត្រូវបានព្យាករថា ធ្លាក់ចុះ១,៥%។
របាយការណ៍បានបង្ហាញទៀតថា ប្រទេសដែលមានសេដ្ឋកិច្ចដាំក្បាលចុះខ្លាំងជាងគេ នៅក្នុងតំបន់ អាស៊ាន នៅក្នុងពេលមានវិបត្តិជំងឺកូវីដ-១៩នេះ រួមមានប្រទេសហ្វីលីពីន ដែលត្រូវបានព្យាករណ៍ថា នឹងធ្លាក់ចុះសេដ្ឋកិច្ចដល់ទៅ ៨,៣% ថៃ ធ្លាក់ចុះ ៧,១% ម៉ាឡេស៊ី និងសិង្ហបុរី ធ្លាក់ចុះ ៦% ដូចគ្នា។
IMF បានព្យាករណ៍ប្រទេសមីយ៉ាន់ម៉ាថា នឹងមានសេដ្ឋកិច្ច រីកលូតលាស់លឿនជាងគេ បំផុតនៅក្នុងឆ្នាំ២០២០ ដោយមាន GDP កើនឡើង ២% និង GDP របស់វៀតណាម កើន ១,៦%។
លោកស្រី Gita Gopinath ទីប្រក្សាផ្នែកសេដ្ឋកិច្ចរបស់ IMF ការព្យាករណ៍ចុងក្រោយសម្រាប់ ឆ្នាំ ២០២០ បង្ហាញថា ការព្យាករណ៍ថ្មីនេះ មិនមានភាពធ្ងន់ធ្ងរទេ បើធៀបនឹងការព្យាករណ៍របស់ IMF កាលពីខែ មិថុនា ឆ្នាំ២០២០ កន្លងទៅ។
ដោយឡែកការព្យាករណ៍របស់ IMF ក្នុងរយៈពេលមធ្យម បានឲ្យដឹងថា នៅឆ្នាំ២០២៥ កម្ពុជា នឹងមានសន្ទុះនាំមុខប្រទេសជាដៃគូផ្សេងៗទៀត នៅក្នុងតំបន់ ដោយត្រូវបានព្យាករណ៍ថា សេដ្ឋកិច្ចកម្ពុជា នឹងកើនដល់ទៅ ៦,៩% ដែលធ្វើឲ្យកម្ពុជា នឹងក្លាយជាប្រទេសមានសេដ្ឋកិច្ចលូតលាស់លឿនជាងគេបំផុត នៅក្នុងតំបន់អាស៊ាន។
IMF បានព្យាករណ៍ថា សម្រាប់ឆ្នាំ២០២៥ ខាងមុខនេះដែរ ប្រទេសអាស៊ាន ផ្សេងទៀត ដែលមានកំណើនយឺតជាងប្រទេសកម្ពុជា រួមមាន ប្រទេសវៀតណាម (៦,៦%), មីយ៉ាន់ម៉ា និងហ្វីលីពីន (កើន ៦,៥%), ឡាវ (៦,១%), ឥណ្ឌូនេស៊ី (៥,១%), ម៉ាឡេស៊ី (៥%), ថៃ (៣,៧%), សិង្ហបុរី (២,៥%) និងប្រុយណេ (១,៨%)៕ដោយ៖CEN
