ភ្នំពេញ-ចាប់តាំងពីថ្ងៃប្រលងដំបូង បេក្ខភាព Cambodian Idol រដូវកាលទី៣ កញ្ញ ញឹម សួនសោភា ទេពី ត្រូវបានគេមើលឃើញថា នាងបានធ្វើឲ្យទស្សនិកជនចាប់អារម្មណ៍ នឹងចង់តាមដានទស្សនាមិនឲ្យអាក់អានមួយសប្តាហ៍ឡើយ។
សោភា ទេពី បានបកស្រាយបទចម្រៀងបែបស្រែកៗ ខ្ពស់បានល្អ ធ្វើឲ្យគណៈកម្មការទាំងបួន តែងតែសរសើរមិនដាច់ពីមាត់ ពីមួយវគ្គទៅមួយវគ្គ ព្រោះថា ទឹកដមសំលេងរបស់នាង មិនអាចធ្វើឲ្យគណៈកម្មការ ខកចិត្ត ត្រង់ចំណុចណានោះទេ។ យោងតាមការបកស្រាយបទចម្រៀង ចាប់តាំងពីវគ្គ ជម្រុះដំបូង ហូតឈានដល់វគ្គ ផ្សាយបន្តផ្ទាល់ សោភា ទេពី បកស្រាយ កាន់តែល្អ ចាប់ពីមួយវគ្គទៅមួយវគ្គទៀត។
តាមរយៈបទចម្រៀងដែលមានចំណងជើងថា « បេះដូង ១០០ » បានធ្វើឱ្យ សោភា ទេពី ជាប់នៅក្នុងវគ្គ Live Show សម្រាប់សប្តាហ៍ទី ១ នេះដោយគ្មាន លក្ខខណ្ឌ ពីព្រោះនាងទទួលបានការសរសើរច្រើនរួមទាំងមានគាំទ្រច្រើនហួសពីការរំពឹងទុក ៕ ដោយ-គីម ស្រីរ័ត្ន