នេះគឺជាខណៈដ៏មហារន្ធត់ស្ទើរគាំងបេះដូង ខណៈឃើញកូនក្មេងម្នាក់ ត្រូវរថយន្តដឹកទំនិញ១គ្រឿង បើកថយក្រោយពុំមានការប្រុងប្រយ័ត្ន បណ្តាលឲ្យកូនក្មេងនោះរត់គេចពុំទាន់ ស្លន់ក្រាបចូលក្រោមរថយន្តទាំងកម្រោលតែម្តង។ ប៉ុន្តែ សំណាងហើយ ដែលបានមនុស្សនៅជុំវិញ បានស្រែកខ្លាំងៗ ហើយរថយន្តនោះបានឈប់ភ្លាមៗ ខណៈកង់ក្រោយនៅសល់តែប៉ុន្មានម៉ែត្រ នឹងកិនចប់បាត់ទៅហើយ។
ហេតុការណ៍នេះ ដែលបានកើតឡើងនៅកាលពីថ្ងៃទី២៧ ខែតុលា ឆ្នាំ២០២០ ស្ថិតនៅក្នុងទីក្រុងហាណូយ ប្រទេសវៀតណាម ត្រូវបានកត់ត្រាដោយកាមេរាសុវត្ថិភាពផ្ទះមួយ នៅផ្នែកម្ខាងនៅផ្លូវនោះ។
តាមរយៈវីដេអូ បានបង្ហាញឲ្យឃើញក្មេងស្រីតូចម្នាក់អាយុប្រហែល ២ ឆ្នាំ បានរត់ដេញតាមបុរសម្នាក់ជិះម៉ូតូចេញទៅ (ប្រហែលជាឪពុករបស់នាង) ប៉ុន្តែ ដោយឃើញរថយន្តនៅពាំងពីមុខ ហើយកំពុងថយក្រោយសន្សឹមៗចូលមក នាងរត់ត្រឡប់មកវិញ។ ទោះយ៉ាងណា ដោយសារតែរថយន្តនោះថយក្រោយលឿនពេក ជាហេតុធ្វើឲ្យកូនក្មេងនេះស្លន់ ដាក់គូទចូលក្រោមរថយន្តតែម្តង។ ប៉ុន្តែ សំណាងហើយ ដែលរថយន្តដឹកទំនិញនេះឈប់ទាន់ពេលវេលា ហើយស្ត្រីម្នាក់ប្រហែលជាម្តាយរបស់នាង បានរត់មកលើកកូនស្រីចេញពីក្រោមរថយន្តទាំងព្រលឹងចុងសក់។
នេះត្រូវបានចាត់ទុកថាជាមេរៀនមួយ សម្រាប់ឪពុកម្តាយគ្រប់រូប ត្រូវមើលថែគ្រប់គ្រងកូនចៅឲ្យមានការប្រុងប្រយ័ត្នខ្ពស់ ជាពិសេសអ្នករស់នៅក្បែរដងផ្លូវដែលមានចរាចរណ៍ច្រើន។
ទន្ទឹមនេះផងដែរ គេក៏ឲ្យអ្នកបើកបរទាំងអស់ ត្រូវបំពាក់កាមេរ៉ានៅផ្នែកខាងក្រោយរថយន្ត ដើម្បីងាយស្រួលមើល ខណៈពេលបើករថយក្រោយ។ បើពុំដូច្នេះទេ គួរណាស់ត្រូវមានព្រូ ជាមួយជំនួយការ ជាពិសេសសម្រាប់ឡានធំៗបែបនេះ ដែលចូលនៅក្នុងតំបន់ប្រជុំជន៕ ដោយ៖ លឹម ហុង
