ខេត្តស្វាយរៀង៖ វេលាម៉ោង ១៨និង៣៦នាទីព្រលប់ថ្ងៃទី២០ ខែវិច្ឆិកា ឆ្នាំ២០២០ នៅត្រង់ចំណុចហាងអ៊ុតសក់ ស្ថិតក្នុងភូមិស្រះវង់ សង្កាត់ស្វាយរៀង ក្រុងស្វាយរៀង ខេត្តស្វាយរៀង មានករណី លួចម៉ូតូមួយកើតឡើង។
សមត្ថកិច្ចបានឲ្យដឹងថា ករណីខាងលើនេះបង្កដោយជនសង្ស័យម្នាក់ឈ្មោះ អ៊ុក ចាន់ ហៅ យូ ភេទប្រុស អាយុ៣៣ឆ្នាំ មានទីលំនៅភូមិរោងបន្លែ សង្កាត់ស្វាយរៀង ក្រុងស្វាយរៀង ខេត្តស្វាយរៀង
ប្រភពដដែលបានបន្តថា: នៅមុនពេលកើតហេតុជនសង្ស័យបានធ្វើសកម្មភាពដើរពីរង្វង់មូលនាគព័ន្ធ សំដៅទៅទិសខាងត្បូង ពេលទៅដល់ខាងមុខហាងអ៊ុតសក់ទល់មុខសាលាដំបូងខេត្តស្វាយរៀង ក៏បានឃើញម៉ូតូមួយគ្រឿងម៉ាកសង់សេ១២៥ ពណ៌ខ្មៅ ស៊េរីឆ្នាំ២០០៤ ដែលឈ្មោះ មឿង ស្រីពៅ ភេទស្រី អាយុ៣០ឆ្នាំ មុខរបរមេផ្ទះ មានទីលំនៅភូមិសួនថ្មី សង្កាត់ព្រៃឆ្លាក់ បញ្ឈរទុកនៅចិញ្ចើមផ្លូវខាងមុខហាងអ៊ុតសក់ ហើយមានជាប់ចង្កឹះសោនៅជាមួយផងនោះក៏លួចយក រួចជិះចេញទៅទឹសខាងត្បូងបាត់ ចំណែកម្ចាស់ម៉ូតូឃើញទាន់ដែរតែមិនបានចាប់អារម្មណ៍ បន្តិចក្រោយមក ទើបជនរងគ្រោះដឹងថា បាត់ម៉ូតូក៏រាយការណ៍ជូនសមត្ថកិច្ចតែម្តង។
ប្រភពខាងលើបានឲ្យដឹងបន្ថែមទៀតថា ក្រោយពីទទួលបានព័ត៌មាននេះភ្លាម កម្លាំងជំនាញនៃអធិការដ្ឋាននគរបាលក្រុងស្វាយរៀង សហការជាមួយកម្លាំងជំនាញនគរបាលព្រហ្មទណ្ឌកម្រិតស្រាល និងប៉ុស្តិ៍នគរបាលរដ្ឋបាលសង្កាត់ស្វាយរៀង ចុះទៅស្រាវជ្រាវដល់កន្លែងកើតហេតុ ដើម្បីស្រាវជ្រាវរកមុខសញ្ញាសង្ស័យ និងបាននាំខ្លួនបញ្ជូនទៅការិយាល័យជំនាញខេត្ត ដើម្បីកសាងសំណុំរឿងចាត់ការតាមច្បាប់៕ដោយ៖ វ៉ៃកូ
